Deposit LDP

11 Polisïau

11.1 Yn yr adrannau a ganlyn, nodir y Polisïau Strategol a fydd yn sail i'r fframwaith ar gyfer gweithredu a chyflawni'r CDLl. Mae'r fformat a'r strwythur yn adlewyrchu elfennau craidd cynaliadwyedd a datblygu cynaliadwy, a'r pedwar amcan llesiant neu'r themâu a nodir yng Nghynllun Llesiant Sir Gaerfyrddin. Mae hyn yn golygu bod modd croesgyfeirio'r Polisïau Strategol i'r amcanion strategol a nodir yn y ddogfen hon, yn ogystal â'r nodau Llesiant perthnasol. Bydd y polisïau strategol felly wedi'u seilio ar y themâu a ganlyn:

• Ymyrraeth Gynnar - Gwneud yn siŵr bod pobl yn cael y cymorth cywir ar yr amser iawn, yn ôl yr angen

• Pobl a Lleoedd Ffyniannus - Manteisio i'r eithaf ar gyfleoedd i bobl a lleoedd yn ardaloedd trefol a gwledig ein sir.

• Arferion Iach - Mae gan bobl ansawdd bywyd da, ac maen nhw'n gwneud dewisiadau iach ynglŷn â'u bywydau a'r amgylchedd.

• Cysylltiadau Cryf - Pobl, lleoedd a sefydliadau y mae cysylltiad cryf rhyngddynt sy'n gallu addasu i newid

11.2 Cydnabyddir y ceir rhywfaint o orgyffwrdd rhwng y themâu a'r polisïau'n gysylltiedig â hwy, felly dylid eu darllen ar y cyd â'i gilydd. Ceir testun esboniadol i gyd-fynd â phob polisi strategol.

Ymyrraeth Gynnar - Gwneud yn siŵr bod pobl yn cael y cymorth cywir ar yr amser iawn, yn ôl yr angen

11.3 Cydnabyddir y goblygiadau o ran llesiant unigolion, eu teuluoedd a'u cymunedau o fewn y Cynllun drwy ganolbwyntio ar greu lleoedd cynaliadwy a chynhwysol. Mae'r ymagwedd gysylltiedig hon ar draws yr holl themâu yn galluogi datrysiadau hirdymor er mwyn sicrhau bod cyfleoedd ar gael i gynnal a gwella llesiant.

11.4 Mae'n cydnabod bod lleoedd cynaliadwy yn cael eu creu drwy gydbwyso nodweddion ecogyfeillgar, economi ffyniannus a chynhwysiant cymdeithasol sy'n anelu i fod o fudd i genedlaethau'r dyfodol yn ogystal â thrigolion presennol.

11.5 Cydnabyddir bod y themâu a'r polisïau a ddyrennir iddynt yn gorgyffwrdd â'i gilydd, ond nodwyd y canlynol o dan y thema hon:

• Polisi Strategol - SP 1: Twf Strategol
• Polisi Strategol - SP 2: Canolfannau Manwerthu a Chanol Trefi

11.6 Mae'r polisïau a ganlyn yn ceisio cefnogi cyflawniad amcanion strategol y Cynllun, ond hefyd yn creu cysylltiadau lefel uchel ac yn sicrhau y cydymffurfir yn fras â'r Nodau Llesiant.

11.7 Yr hyn sydd wrth wraidd y CDLl Diwygiedig hwn yw creu Sir gytbwys a chydlynol. Er mwyn cyflawni hyn, mae'n cydnabod bod rôl y Sir fel sbardun cryf ac economaidd ar gyfer twf yn lleol a hefyd yn rhanbarthol, yn rhoi lle canolog i Sir Gaerfyrddin mewn Cymru ffyniannus a chynaliadwy. Mae strategaeth twf y Cynllun wedi'i seilio ar egwyddorion datblygu cynaliadwy ac yn gyson â nodau a dyheadau Deddf Llesiant Cenedlaethau'r Dyfodol.

11.8 Mae'r ymagwedd strategol yn adeiladu ar y pwyslais corfforaethol ar adfywio a'r cyfleoedd a gyflwynir drwy'r Fargen Ddinesig a thrwy gyfleoedd adfywio a buddsoddi eraill. Ar yr un pryd, y mae hefyd yn cydnabod y cyfleoedd a geir drwy'r economi wledig ac anghenion amrywiol cymunedau ledled y Sir. Mae'r strategaeth felly'n cydnabod rôl cyflogaeth o ran creu Sir ffyniannus - gyda thwf priodol o ran tai ynghyd â chyfleoedd am swyddi a chyflogaeth.

11.9 Yn rhan o'i bolisi corfforaethol, adfywio yw prif amcan y Cyngor. Adlewyrchir hyn drwy:

• Fargen Ddinesig Bae Abertawe;
• Trawsnewidiadau - Cynllun Adfywio ar gyfer Sir Gaerfyrddin; a
• Symud Ymlaen yn Sir Gaerfyrddin: Strategaeth Gorfforaethol Newydd y Cyngor 2018 - 2033.
• Symud Sir Gâr Wledig Ymlaen 2019

11.10 Mae'r ffocws hwn ar greu swyddi a buddsoddi yn seiliedig ar leoliad strategol Sir Gaerfyrddin a'i swyddogaeth ranbarthol o ran yr economi. Mae'r strategaeth hon felly'n ceisio cydnabod ac adlewyrchu hyn, a'r amcanion corfforaethol, drwy gefnogi a chreu lle sy'n ddeniadol i weithwyr a buddsoddwyr.

11.11 Drwy sicrhau bod ein gofynion o ran twf tai yn adlewyrchu, ac yn cefnogi, ein huchelgeisiau economaidd, mae'n galluogi ymagwedd gydgysylltiedig ac integredig er mwyn sicrhau na chaiff y gyd-swyddogaeth o sicrhau twf economaidd ei hystyried ar wahân i dai, ac fel arall.

11.12 Ar gyfer yr ymagwedd hon, mae angen datblygu cyfres gytbwys o amcanestyniadau poblogaeth ac aelwydydd a ddatblygir o amcanestyniadau sail 2014 Llywodraeth Cymru, ond y cymhwysir uchelgeisiau Sir Gaerfyrddin i'w chymunedau iddynt. Gwneir hyn er mwyn sicrhau bod cyflenwad digonol o dai i gefnogi cyflawni ein huchelgeisiau economaidd a bodloni anghenion ein cymunedau.

11.13 Mae'r tueddiadau o ran poblogaeth ac aelwydydd, a bennwyd drwy amcanestyniadau sail 2014 Llywodraeth Cymru, yn deillio o'r patrymau demograffig a gafwyd yn ystod cyfnod o ddirwasgiad. Nid ydynt yn adlewyrchu uchelgeisiau cadarnhaol y Sir na'r Rhanbarth dros oes y cynllun. Yn ogystal â hyn, mae'n rhaid ystyried cyfraddau cwblhau tai dros y blynyddoedd cynt, sydd yn llawer uwch na gofynion amcanestyniad 2014 LlC. Bwriedir i'r strategaeth hon a'i lefelau twf fod yn uchelgeisiol ond yn gyflawnadwy, ac adlewyrchu amcanion ehangach na'r CDLl Diwygiedig hwn yn unig.

11.14 Bydd y Strategaeth hon yn ceisio dosbarthu twf drwy hierarchaeth aneddiadau cynaliadwy sy'n deillio o'r opsiwn gofodol a ffafrir. Mae'n cydnabod yr amrywiaeth ar draws y Sir a chyfoeth ei rhinweddau o ran yr amgylchedd, bioamrywiaeth a'i thirlun naturiol ac adeiledig. Wrth gyflawni'r strategaeth hon, y mae hefyd yn cydnabod cyfraniad ardaloedd gwledig Sir Gaerfyrddin yn ogystal â'i hardaloedd trefol tuag at gyflawni ei gweledigaeth ar gyfer 'Un Sir Gâr'.

11.15 Byddwn yn cydweithio'n agos â phartneriaid, darparwyr seilwaith, datblygwyr, buddsoddwyr a chymunedau i gyflawni'r CDLl Diwygiedig a'i strategaeth, ei bolisïau a'i gynigion.

11.16 Bydd yr uchod a'r defnyddiau a nodwyd, lle bo'n briodol, yn cael eu hystyried ymhellach drwy'r Canllawiau Cynllunio Atodol ar ffurf briffiau datblygu. Bydd y briffiau hyn yn ymdrin yn fanylach â datblygu'r safleoedd, mewn modd cynhwysfawr a chydgysylltiedig, gan sicrhau bod cynigion wedi'u hintegreiddio o ran trefnu gwahanol elfennau fesul cam a darparu sbardunau cyflawnadwyedd allweddol fel seilwaith.

11.17 Dylid darparu tystiolaeth benodol sy'n dangos yn glir, fel bo'r awdurdod cynllunio lleol yn fodlon, fod cynigion datblygu'n gyson â'r polisïau a ganlyn o fewn y CDLl:

• PSD1: Cynaliadwyedd a Dylunio o Ansawdd Uchel
• PSD2: Egwyddorion Prif Gynlluniau - Creu Cymdogaethau Cynaliadwy
• PSD3: Rhwydwaith Seilwaith Gwyrdd
• PSD4: Seilwaith Gwyrdd - Coed, Coetiroedd a Gwrychoedd
• TRA1: Gwelliannau i'r Seilwaith Trafnidiaeth a Phriffyrdd
• TRA2: Teithio Llesol
• SP8: Seilwaith
• INF1: Rhwymedigaethau Cynllunio

11.18 Bydd yr angen am safleoedd wrth gefn yn cael ei fonitro'n agos drwy'r defnydd o safleoedd wedi'u dyrannu yn rhan o fframwaith monitro'r Cynllun hwn, ac adroddir ar hynny drwy drefniadau'r Adroddiad Monitro Blynyddol. Os na fydd y safleoedd sydd wedi'u dyrannu (a nodwyd o dan bolisïau HOM1, EME1 ac EMP5) yn cyfrannu yn ôl y disgwyl at gyflawni strategaeth y Cynllun, bydd y Cyngor Sir yn penderfynu a ddylid defnyddio Safle Wrth Gefn wrth gyflwyno Adroddiad Adolygu'r CDLl.

11.19 Mae angen nodi amrywiaeth o safleoedd wrth gefn er mwyn sicrhau bod strategaeth y CDLl yn rhoi digon o hyblygrwydd os bydd datblygiad ar dir wedi'i ddyrannu ac ymrwymiadau presennol yn dod i stop. Cyfeirir hefyd at y Fframwaith Datblygu Cenedlaethol sydd ar ddod a'r posibilrwydd am Gynllun Datblygu Strategol (CDS).

11.20 Pwrpas y Polisi hwn yw sefydlu'r egwyddor o ddatblygiad defnydd cymysg (gan gynnwys tai) ar y safleoedd hyn a sbarduno'r farchnad i ddatrys materion a chyflwyno'r safleoedd lle bo angen.

11.21 Mae'r Penrhyn yn cynnwys tua 1,780 o hectarau ar hyd yr A484 a choridor trafnidiaeth Llinell Reilffordd Llundain i Abergwaun. Mae'n ymestyn o gyrion tref hanesyddol Cydweli wrth geg Gwendraeth Fach tua'r gogledd. Mae'r A484, Llinell Reilffordd Llundain i Abergwaun a gwastatir Pinged yn ffinio â dwyrain y safle. Mae Parc Arfordirol y Mileniwm yn ffinio â de/de ddwyrain y safle.

11.22 Er bod y Penrhyn mewn lleoliad da i ddenu pecyn integredig a strategol o gynlluniau adfywio a buddsoddi, y mae hefyd mewn ardal ecolegol sensitif sy'n destun amrywiaeth o ystyriaethau o ran datblygu.

11.23 Mae amrywiaeth gyferbyniol o ddefnyddiau a nodweddion yn creu'r cyd-destun ar gyfer y naws am le. Mae'r rhain yn cynnwys Parc Gwledig Pen-bre i'r de, a'r cylchffordd rasio cerbydau modur a maes awyr i'r gogledd.

11.24 Mae'r ardal yn parhau i fod yn adodd allweddol i breswylwyr, ymwelwyr a bioamrywiaeth fel ei gilydd. O ran hynny, ni ellid cefnogi cynigion datblygu a fyddai'n amharu'n ormodol ar barhad yr adnodd i genedlaethau'r dyfodol.

11.25 Bydd y Cyngor yn llunio Canllawiau Cynllunio Atodol er mwyn ymhelaethu ar ddarpariaethau'r polisi hwn a chyfleoedd ar y Penrhyn yn y dyfodol.

11.26 Mae'r polisi'n ceisio cydnabod patrwm cyffredinol y ddarpariaeth mewn hierarchaeth draddodiadol o ganolfannau, sy'n amrywio rhwng mân ddarpariaeth leol a'r canolfannau mwy sy'n darparu dewis mwy dros ystod ehangach o gynnyrch. Mae'r canolfannau mwy hefyd yn gweithredu fel lleoliadau ar gyfer gweithgareddau cysylltiedig ym maes hamdden ac adloniant, gan gynnwys sinemâu a bwytai ac ati, ac ar gyfer defnydd swyddfa masnachol, gan gynnwys cyfreithwyr, cyfrifwyr a gwerthwyr tai ac ati.

11.27 At ei gilydd, mae'r ddarpariaeth leol yn cynrychioli nwyddau a gwasanaethau sydd eu hangen o ddydd i ddydd (eitemau cyfleustra), ac y gall trigolion wneud teithiau byr mynych i'w nôl, tra bo'r canolfannau mwy nid yn unig yn darparu'r cyfleusterau hynny, ond hefyd yn darparu eitemau mwy arbenigol (nwyddau cymharu) y bydd siopwyr yn chwilio amdanynt yn llai aml ac yn barod i deithio ymhellach i'w prynu. Yn draddodiadol, mae darpariaeth siopa wedi esblygu yn hierarchaeth o ganolfannau gyda dalgylchoedd yn gorgyffwrdd y naill a'r llall i adlewyrchu eu maint a'u pwysigrwydd.

11.28 O ran darpariaeth manwerthu, dyma'r patrwm sy'n nodweddu Sir Gaerfyrddin, gyda chanolfannau mwy Caerfyrddin, Llanelli a Rhydaman yn gwasanaethu dalgylchoedd mwy yn y gorffennol, gan gynnig ystod eang ac arbenigol o nwyddau ac eitemau.

11.29 Wrth ddiffinio hierarchaeth manwerthu, rhoddwyd sylw i rolau a swyddogaethau perthynol y trefi mwy a'r pentrefi bach. Cydnabyddir, yn hyn o beth, er bod ystod y ddarpariaeth siopa ar hyd a lled yr hierarchaeth yn chwarae rhan hanfodol, ym Mhrif Ganolfannau Caerfyrddin, Llanelli a Rhydaman y ceir ffocws gweithgarwch manwerthu canol tref. Fodd bynnag, cydnabyddir hefyd fod pob un o'r canolfannau hyn yn cyflawni gwahanol rolau yng nghyd-destun eu cymunedau a'u swyddogaethau daearyddol ehangach. O ran hynny, mae canol tref Caerfyrddin yn cyflawni swyddogaeth is-ranbarthol tra bo canol trefi Rhydaman a Llanelli yn canolbwyntio mwy ar wasanaethu'r cymunedau o'u hamgylch.

11.30 Cydnabyddir fodd bynnag, er gwaethaf y gwahaniaethau cynhenid rhyngddynt, fod pob canol tref yn profi gwahanol heriau wrth i rôl y stryd fawr newid mewn ymateb i bwysau amrywiol y byd manwerthu. Yn hyn o beth, mae TAN4 yn cynnwys darpariaeth i gymhwyso polisïau priodol i'r canolfannau hynny ar sail eu nodweddion a'u cynaliadwyedd. Wrth ymateb i'r ymagwedd hon a gaiff ei hysgogi'n lleol, bydd amrywio'r hyn a ystyrir yn ganolfan lefel uwch a lefel is yn golygu bod modd ymateb yn fanylach ond yn fwy hyblyg ar sail eu gwahanol raddfeydd a nodweddion. Y mae hefyd yn galluogi'r Cynllun i ymateb i newid mewn amgylchiadau economaidd, a cheisio ymdrin ag amrywio mewn gweithgarwch manwerthu.

11.31 Wrth ddisgrifio nodweddion canolfannau manwerthu a masnachol lefel uwch, nodir yn TAN4 eu bod yn hygyrch i nifer fawr o bobl, a bod graddfa ac ystod amrywiol y defnyddiau sy'n bresennol yn adlewyrchu anghenion y boblogaeth - sydd fel arfer yn cynnwys mwy na'r gymuned leol. Nodweddir y canolfannau hynny fel arfer gan gyfuniad o siopau, swyddfeydd, gwasanaethau ariannol a phroffesiynol, sefydliadau bwyd a diod, gwestai, cyfleusterau addysg, adloniant a hamdden, sefydliadau dibreswyl yn ogystal â phreswyl. (TAN4 paragraff 4.2).

11.32 Ar y llaw arall, nodweddir canolfannau lefel is gan ddarpariaeth ar raddfa lai a llai o ddefnyddiau, gyda'r bwriad o wasanaethu anghenion y gymuned leol yn bennaf. Bydd y rhain fel arfer yn cynnwys siopau, gwasanaethau ariannol a phroffesiynol, bwyd a diod, sefydliadau dibreswyl sydd ar lefel briodol, ond gall gynnwys defnyddiau eraill yn ddibynnol ar y ganolfan (TAN4 paragraff 4.3).

11.33 O ystyried statws blaenorol Llanelli a Rhydaman, mae'n glir bod eu strydoedd mawr wedi profi cyfnodau heriol a bod y naill a'r llall wedi cynnal eu swyddogaeth bwysig fel canolfannau manwerthu, er bod y swyddogaeth honno wedi gwanio rhywfaint. Wrth roi ystyriaeth bellach i'r posibiliadau ar eu cyfer hwy, ynghyd â Chaerfyrddin, o ran hierarchaeth manwerthu'r dyfodol, y mae'n bwysig ystyried sut y byddant yn datblygu a'u rôl yn y dyfodol, yn ogystal â'r modd y mae'r Cynllun yn ceisio ymateb i ddirywiad posibl yng nghanol y dref.

11.34 Er nad yw wedi'i hamddiffyn yn llwyr rhag yr heriau hynny, mae Caerfyrddin wedi cynnal rôl is-ranbarthol ac mae ganddi bresenoldeb cenedlaethol cryf ar ei stryd fawr ynghyd ag amrywiaeth o siopau lleol. Mae'r ganolfan yn parhau i wasanaethu ystod o anghenion i boblogaeth sydd y tu hwnt i'w chymuned leol. Yn hyn o beth, gellir ei galw'n rhwydd yn ganolfan fanwerthu lefel uwch ar sail y darpariaethau uchod.

11.35 O ran Llanelli a Rhydaman, ceir llai o gwmnïau cenedlaethol yng nghanol y dref, ac i raddau cynyddol mae'r cynnig yng nghanol y dref yn adlewyrchu canol tref sy'n gwasanaethu cymuned fwy lleol. Mae hyn, ynghyd â'r heriau'n gysylltiedig â throsiant unedau manwerthu, a phroblemau o ran cyfraddau unedau gwag, yn golygu bod angen ailwerthuso eu statws blaenorol fel canol trefi lefel uwch. Mae canol trefi Rhydaman a Llanelli, y naill a'r llall, wedi denu ymyraethau sylweddol o ran adfywio, ac mae Tasgluoedd wedi cael eu sefydlu i wynebu rhai o'r heriau a welir yn y ddwy ganolfan. Mae Gorchymyn Datblygu Lleol manwl hefyd wedi cael ei greu ar gyfer canol tref Llanelli.

11.36 Yn sgil y ddeinameg newidiol yng nghynnig manwerthu'r naill ganolfan a'r llall ceir mwy o ffocws ar yr angen i'r hierarchaeth a'r polisïau manwerthu gynnig ymateb wedi'i ysgogi'n lleol i'w problemau. O ganlyniad i hyn, mae'r hierarchaeth wedi cael ei sefydlu gyda pholisïau priodol er mwyn caniatáu ar gyfer gwahanol fathau o gyd-destunau manwerthu a masnachol yn nhair Prif Ganolfan y Cynllun. Bydd y rhain yn caniatáu ymagwedd fwy hyblyg o ran y modd y bydd y canolfannau hyn yn datblygu yn y dyfodol.

11.37 Mae trefi llai neu drefi marchnad Castellnewydd Emlyn , Llandeilo a Sanclêr, er enghraifft, gyda'u dalgylchoedd llai fel arfer yn bodloni anghenion lleol gyda rhywfaint o ddarpariaeth arbenigol. Bydd pentrefi mwy yn aml yn ychwanegu at hyn, gan ddarparu eitemau hanfodol i fodloni anghenion o ddydd i ddydd.

11.38 Yn debyg i lawer o ardaloedd, mae canolfannau siopa sy'n cynnwys warysau manwerthu mawr (gan gynnwys nwyddau swmpus) wedi cyfrannu at y newid mewn arferion manwerthu ac, mewn rhai achosion, wedi herio hyfywedd a rôl canol trefi presennol a sefydledig. Er bod yr heriau hyn wedi'u cydnabod, nodir hefyd y gallant greu cyfleoedd o ran ehangu'r cynnig manwerthu.

11.39 Mae strategaeth manwerthu'r CDLl yn adlewyrchu egwyddorion cymdeithasol, economaidd ac amgylcheddol datblygu cynaliadwy sy'n tanategu'r Cynllun. Y mae hefyd yn ceisio adlewyrchu natur newidiol manwerthu a'r angen i ganol trefi traddodiadol addasu i gyd-fynd â'r newidiadau hynny. Mae'r Strategaeth yn ceisio:

1. Gwarchod a gwella rôl canolfannau manwerthu er mwyn sicrhau eu bod yn parhau i fod yn atyniadol fel canol trefi, cyrchfannau siopa, masnachol a hamdden, a gwarchod darpariaeth manwerthu leol sydd wedi'i sefydlu yn y sir, yn ogystal â'r busnesau lleol sydd wrth wraidd y ddarpariaeth honno. Yr her fydd cynnal eu cyfran o'r farchnad a sicrhau eu bod yn dal i allu cystadlu, gan ddeall anghenion pob canolfan a'i rôl a'i chyfraniad perthynol yn nhermau manwerthu;
2. Lleoli darpariaeth manwerthu a'i llywio tuag at fannau cynaliadwy sy'n hygyrch ar drafnidiaeth gyhoeddus neu ar lwybrau teithio llesol er mwyn lleihau'r angen i deithio;
3. Mewn canolfannau lefel is llai, sicrhau bod gan gymunedau lleol fynediad rhesymol at ystod foddhaol o gyfleusterau a gwasanaethau stryd fawr, yn enwedig nwyddau cyfleustra (bwyd a hanfodion beunyddiol eraill); ac,
4. Yn y pentrefi mwy, cynnal hyfywedd siop y pentref a chyfleusterau lleol eraill.

11.40 Yn Astudiaeth Manwerthu Gyfredol (2015) ar gyfer Sir Gaerfyrddin, archwiliwyd materion manwerthu ar draws y Sir, ac aseswyd y capasiti ar gyfer twf ar draws y sectorau manwerthu. Fe'i lluniwyd er mwyn darparu tystiolaeth yn gysylltiedig â ffurfio polisi, ac yn sail ar gyfer pennu hierarchaeth manwerthu ar gyfer ardal y Cynllun, er mwyn llywio penderfyniadau, fel sy'n ofynnol yn PCC. O ganlyniad i hynny, defnyddir yr egwyddor "canol trefi yn gyntaf" ar y cyd â dull dilyniannol o ddewis safleoedd i hyrwyddo canol trefi fel prif leoliadau cyfleusterau manwerthu, swyddfa, hamdden ac iechyd newydd. Nod hynny fydd creu mwy o resymau pam y dylai pobl ymweld â'r canolfannau, a chynnydd wedyn mewn gweithgarwch cymdeithasol ac economaidd a fydd yn cynnal eu hyfywedd.

11.41 Gan ganiatáu amrywio o fewn yr hierarchaeth, bydd disgwyl i fanwerthu barhau fel y prif weithgarwch ym mhob un o'r tair canolfan is-ranbarthol a chanolig. Fodd bynnag, nid yw hyn ond un o'r ffactorau a fydd yn cyfrannu at eu llesiant. Ni ellir gwahanu polisïau manwerthu oddi wrth swyddogaethau ehangach y trefi mwy fel canolfannau ar gyfer gwasanaethau a chyfleusterau eraill, gan gynnwys sefydliadau bwyd a diod (caffis, bwytai, tafarndai ac ati) a datblygiadau hamdden masnachol. Mae'r defnyddiau amrywiol hyn mewn yng nghanol trefi o gymorth i sicrhau eu bod yn parhau i fod yn hyfyw ac - yn enwedig o ran defnyddiau hamdden a phreswyl - yn cyfrannu at fywiogrwydd economi lwyddiannus yn y nos, ac at eu rôl fel canol trefi byw.

11.42 Bydd darpariaeth y tu allan i'r canolfannau is-ranbarthol a chanolig, gan gynnwys siopau pentref lleol, yn gwneud cyfraniad pwysig at swyddogaeth manwerthu Sir Gaerfyrddin. Yn hyn o beth, mae'r canolfannau hynny sy'n bodloni angen am ddarpariaeth manwerthu gyfleus a mân anghenion siopa o ddydd i ddydd yn creu amrywiaeth sy'n gyson â'r amcanion o gynnal cymunedau a lleihau'r angen i deithio hyd yr eithaf. Gall yr aneddiadau hyn a'u cynnig manwerthu ategu swyddogaeth manwerthu aneddiadau sydd yn uwch i fyny'r hierarchaeth a chyfrannu hefyd at weithredu Strategaeth y Cynllun. Bydd yn ofynnol i gynigion manwerthu cyfleus y tu allan i ffiniau canol y dref mewn canolfannau o'r fath ddangos tystiolaeth briodol o'r angen am ddarpariaeth manwerthu er mwyn sicrhau nad ydynt yn tanseilio'r gweithgarwch manwerthu yng nghanol y trefi.

11.43 Mae polisïau'r CDLl hefyd yn ceisio sicrhau'r lleoliadau mwyaf priodol ar gyfer datblygiadau manwerthu, anfanwerthol a hamdden wedi'u lleoli yn y lleoliadau mwyaf priodol. Fel arfer, bydd y lleoliadau mwyaf priodol mewn canolfannau presennol, sy'n hygyrch drwy amrywiaeth o fathau o drafnidiaeth, a gallant hyrwyddo teithiau cysylltiedig i ddefnyddiau eraill yn y ganolfan. Bydd yn ofynnol i ddatblygwyr chwilio'n fanwl am safleoedd mewn canolfannau cyn ystyried safleoedd mewn ardaloedd llai canolog.

11.44 Ceir arweiniad pellach o ran y polisi cynllunio cenedlaethol yn PCC: Rhifyn 10 - Pennod 4 Lleoedd Actif a Chymdeithasol ac yn TAN4 Manwerthu a Chanol Trefi.

11.45 Mae Rhifyn 10 PCC yn rhoi cydnabyddiaeth benodol i rôl siopau lleol, siopau pentref a thafarndai mewn cymunedau a'r effaith bosibl yn sgil eu colli. O ganlyniad i hynny, dylid cyfeirio at bolisi RTC3 isod.

11.46 Dylid ystyried cynigion am weithgarwch manwerthu yn ardaloedd gwledig Sir Gaerfyrddin yn unol â pholisi RTC3.

11.47 Nid yw Canol Trefi bob amser yn gallu cynnwys siopau manwerthu neilltuol fel nwyddau swmpus, gan fod angen safleoedd ac adeiladau mawr ac oherwydd y goblygiadau o ran cynhyrchu traffig a pharcio. O ganlyniad i hynny, caniatawyd lleoliadau y tu allan i ganol y dref ar gyfer safleoedd gwerthu o'r fath, yn unol â chanllawiau cenedlaethol, naill ai ar ffurf unedau unigol neu gyda'i gilydd mewn parciau manwerthu. Yn wyneb y pwysau cynyddol am safleoedd gwerthu o'r fath, mae'r CDLl yn ceisio ymdrin â pharciau manwerthu ac yn diffinio'r meini prawf y dylid eu cymhwyso i ddatblygiadau arfaethedig. Yn hyn o beth. mae'r polisïau yn gysylltiedig â pharciau manwerthu yn hyrwyddo cydleoli cyfleusterau manwerthu priodol a lleihau casgliadau ar wahân o gyrchfannau manwerthu o fewn y Sir. Mae strategaeth o'r fath yn fwy cynaliadwy o ran trafnidiaeth, a bydd yn galluogi busnesau manwerthu i elwa ar apêl cydleoli darpariaeth.

11.48 Mae'r Cynllun yn cydnabod nad yw lleoliadau mewn canol trefi yn addas i gynnwys rhai mathau o gyfleusterau manwerthu a hamdden, ac y gall Canolfannau Rhanbarthol (Parciau Manwerthu) gyfrannu at fodloni'r angen hwn. Fodd bynnag ni ddylai graffa, natur na lleoliad datblygiad manwerthu danseilio apêl, bywiogrwydd a dichonadwyedd canol trefi presennol.

11.49 Dylid mabwysiadu dull dilyniannol sy'n golygu y dylid ffafrio lleoliadau mewn canol trefi presennol i ddechrau, fel y cânt eu rhestru yn yr hierarchaeth manwerthu ac, ar ôl hynny safleoedd sy'n union am y ffin â chanol trefi. Os nad oes safleoedd addas ar gael yn y lleoliadau hyn, dim ond wedyn y ceir ystyried datblygu mewn lleoliadau eraill nad ydynt yng nghanol y dref neu wrth ymyl canol y dref, gan gynnwys yn y canolfannau rhanbarthol presennol (parciau manwerthu) a ganlyn ymhlith lleoliadau eraill:

11.50 Canolfannau Rhanbarthol: (Parciau Manwerthu)

• Ffordd Steffan a Pharc Pensarn, Caerfyrddin;
• Parc Trostre a Pharc Pemberton, Llanelli;
• Parc Manwerthu Cross Hands.
• Parc Manwerthu Maes Yr Eithin, Cross Hands

11.51 Mae Caerfyrddin a Llanelli yn cynnwys darpariaeth manwerthu sylweddol ar barciau manwerthu y tu allan i'r canol trefi perthynol. Prif barciau manwerthu Caerfyrddin yw Heol Steffan a Pharc Pensarn, sy'n cynnwys safleoedd gwerthu amrywiaeth o nwyddau swmpus a nwyddau eraill.

11.52 Parc Trostre a Pharc Pemberton sy'n gwasanaethu Llanelli, ac mae Parc Trostre yn cynnwys nifer fawr o unedau wedi'u meddiannu'n bennaf gan siopau sy'n lluosogi'r stryd fawr. I'r gwrthwyneb, ffocws pennaf Parc Pemberton yw DIY, nwyddau trydanol a dodrefn, sy'n adlewyrchu cyfyngiad ar nwyddau swmpus nad yw'n weithredol ym Mharc Trostre.

11.53 Er bod y parc manwerthu yn Cross Hands yn llai na pharciau Caerfyrddin a Llanelli, mae'n cyflawni rôl bwysig drwy ategu'r ddarpariaeth canol tref yn Rhydaman, drwy gynnig nwyddau DIY, trydanol a dodrefn yn bennaf.

11.54 Bydd yn ofynnol i'r ymgeisydd gyflwyno asesiad effaith i ddangos na fyddai'r cynnig yn niweidio canol trefi sefydledig. Dylai'r asesiad hefyd ystyried effeithiau cronnus datblygiadau a gwblhawyd yn ddiweddar â safleoedd lle bo caniatâd cynllunio yn dal yn weithredol. Dylai'r asesiad amlinellu'r math o ddarpariaeth manwerthu a gynigir gan yr ymgeisydd, a'r modd y gallai hyn effeithio ar ddarpariaeth manwerthu sy'n cystadlu mewn canol trefi cyfagos, ac a allai arwain at wyro masnach o ganol y dref.

11.55 Bydd angen i gynigion newydd ddangos yn glir bod angen ychwanegol am unedau warws manwerthu newydd sy'n cynnig yr ystod o nwyddau a ragwelir.

11.56 Mae'r CDLl diwygiedig yn ceisio cadarnhau rôl Caerfyrddin fel canolfan fanwerthu is-ranbarthol sy'n gwasanaethu dalgylchoedd ehangach ar gyfer manwerthu cymharol. Yn hyn o beth, mae ganddi hanes fel canol tref sy'n perfformio'n dda â chynnig manwerthu cryf. Yn hyn o beth mae'r polisi'n ceisio gwarchod ei rôl manwerthu gan adlewyrchu natur newidiol y stryd fawr ac arferion siopa.

11.57 Mae Caerfyrddin yn dref farchnad fawr ac yn gwasanaethu ystod eang o gymunedau yn lleol, ac yn y rhanbarth ehangach, gan gynnig cymysgedd o enwau cenedlaethol y stryd fawr a siopau manwerthu llai sy'n fwy lleol ac arbenigol. Yn ystod y blynyddoedd diwethaf, ychwanegodd datblygiad Rhodfa Santes Catrin at ei darpariaeth manwerthu a masnachol. Mae siop Debenhams yn ganolbwynt i'r datblygiad, ynghyd â sinema aml-sgrin sy'n ychwanegu at gynnig masnachol a hamdden y ganolfan ac at yr apêl i ymwelwyr.

11.60 Yn hyn o beth, manwerthu (A1) yw prif swyddogaeth Prif Ardal Fanwerthu Canol y Dref gydag Ardal Fanwerthu Eilaidd Canol y Dref yn cynrychioli'r prif ardaloedd lle dylid lleoli gwasanaethau eraill yng nghanol y dref sy'n gwneud yr ardal yn fwy diddorol a bywiog, fel hamdden, bwytai, gwasanaethau ariannol ac ati.

11.64 Wrth geisio diffinio a chreu cymunedau cynaliadwy, mae'r Cynllun yn nodi ac yn cydnabod cyfraniad gwasanaethau lleol. Mae'r rhain yn cynnwys cyfleusterau fel siopau, swyddfeydd post, tafarndai, gorsafoedd petrol, a fydd yn cyfrannu at hyfywedd aneddiadau a chymunedau yn y dyfodol, o ran darparu gwasanaeth ond hefyd drwy gynnig 'mannau cyfarfod' lle gall y gymuned ryngweithio a lle gellir cynyddu'r ymdeimlad o gymuned. Ar ben hynny, mae'r CDLl yn cefnogi darpariaeth manwerthu leol a'r budd economaidd a ddaw yn ei sgil yn y cymunedau.

11.65 Mae'r Cyngor hefyd yn cydnabod pwysigrwydd cyfleusterau a gwasanaethau cymunedol os ceir dibyniaeth gref arnynt yn lleol. Mae gwasanaethau o'r fath yn hollbwysig i sicrhau llesiant economaidd cymunedau a hefyd yn hyrwyddo cynhwysiant cymdeithasol, yn enwedig ymhlith aelodau llai symudol y gymuned.

11.66 Cydnabyddir mai'r aneddiadau gwledig yw'r rhai sydd yn fwyaf agored i golli'r cyfleusterau hynny. Bydd ffactorau fel y galw am dir preswyl a gwerth uchel tir preswyl mewn ardaloedd gwledig yn aml yn arwain at bwysau gan berchnogion eiddo i newid neu ailddatblygu'r cyfleusterau hynny i ddibenion preswyl, hyd yn oed lle bo busnes yn ffynnu. Gall yr incwm o siop neu weithgarwch arall fod yn llai na'r hyn y gellir ei ennill o fath arall o ddatblygiad. Mae'r polisi hwn yn ceisio cymedroli'r pwysau i newid drwy sicrhau na chaniateir colli siop neu gyfleuster os yw'n ddichonadwy a bod lefel y rhent yn briodol, onid oes cyfleusterau eraill rhesymol ar gael.

11.67 Er bod y polisi yn ceisio gwarchod rhag colli cyfleusterau, ceir darpariaeth ar gyfer yr amgylchiadau hynny lle gellir dangos nad oes angen y cyfleusterau hynny mwyach, neu lle nad ydynt yn ddichonadwy.

11.68 I dibenion y polisi hwn, mae pellter cerdded yn unol â'r hyn a nodir yn y Llawlyfr Strydoedd: Yr Adran Drafnidiaeth /Cymunedau a Llywodraeth Leol/LlCC - 2007^[1]. Nodir yn y Llawlyfr mai'r hyn sydd fel arfer yn nodweddu cymdogaethau cerddadwy yw ystod o gyfleusterau o fewn 10 munud (hyd at tua 800m) o bellter cerdded o ardaloedd preswyl, y gall preswylwyr eu cyrraedd yn rhwydd ar droed.

11.69 Gellir diffinio marchnata eiddo i ddibenion y polisi hwn fel hysbysebu mewn cyhoeddiad o fewn y diwydiant priodol neu, lle bo'n briodol, drwy werthwyr tai lleol am gyfnod rhesymol o amser ac am bris rhesymol.

11.70 Yn aml gall cynigion am siopau newydd mewn ardaloedd gwledig sy'n ychwanegol at ddefnyddiau eraill wneud cyfraniad pwysig i'r economi wledig. Bydd darpariaeth o'r fath, boed hynny ar ffurf siopau fferm (a fydd o gymorth i fodloni'r galw am gynnyrch ffres), siopau crefft a siopau'n gysylltiedig â gorsafoedd petrol, nid yn unig yn bodloni gofynion lleol ond hefyd yn ffynhonnell i greu swyddi.

11.71 Er bod potensial i'r ddarpariaeth honno wasanaethu cymunedau gwledig, mae'n rhaid iddi adlewyrchu ei chyd-destun gwledig. Yn hynny o beth, dylai'r siop fod yn gysylltiedig i fusnes presennol ac yn israddol i'r busnes hwnnw.

11.72 Cydnabyddir y gall siopau mewn ardaloedd gwledig greu cyfleoedd am swyddi ychwanegol a chefnogi arallgyfeirio economaidd yng nghefn gwlad yn ogystal â darparu gwasanaeth i gymunedau lleol.

11.73 Caiff y Cyngor geisio defnyddio amodau cynllunio i gyfyngu ar ystod y nwyddau a werthir neu i gyfyngu ar yr arwynebedd llawr lle bo'n briodol, er mwyn atal unrhyw niwed sylweddol i weithgarwch manwerthu cyfagos. Yn ogystal â hyn, bydd yn rhaid ystyried y potensial i'r cynnig weithredu ar sail dymhorol os nad yw'n ddymunol iddo weithredu drwy gydol y flwyddyn.

11.74 Fel y nodwyd, gall siopau sy'n ategol i ddefnyddiau eraill, fel siopau fferm a fydd o gymorth i ateb y galw am gynnyrch ffres, siopau crefft a siopau'n gysylltiedig â gorsafoedd petrol, chwarae rôl bwysig mewn ardaloedd gwledig drwy ddarparu ffynonellau newydd ar gyfer swyddi a gwasanaethau. Fodd bynnag, wrth asesu'r cynigion hynny bydd yn rhaid ystyried yr effaith bosibl ar ganolfannau manwerthu a masnachol cyfagos, ac yn enwedig ar siopau pentref^[2]. Ystyrir defnyddio amodau cynllunio i gyfyngu ar ystod y nwyddau a werthir neu gyfyngu ar arwynebedd y llawr os yw hynny'n galluogi bwrw ymlaen â'r datblygiad.

Pobl a Lleoedd Ffyniannus - Manteisio i'r eithaf ar gyfleoedd i bobl a lleoedd yn ardaloedd trefol a gwledig ein sir.

11.75 Cydnabyddir y problemau economaidd gymdeithasol gan gynnwys tlodi ac amddifadedd yn wynebu rhannau gwledig a threfol ein Sir yng ngweledigaeth "Un Sir Gâr" y Cynllun hwn. I'r perwyl hwn, mae'r Cynllun yn ceisio mynd i'r afael â'r problemau hyn drwy sicrhau bod pawb yn cael cymaint o gyfle ag sy'n bosibl i gynnal neu gynyddu eu ffyniant a'u hymdeimlad o lesiant.

11.76 Mae'r cyfleoedd hyn yn cynnwys darparu ar gyfer tai newydd, gan gynnwys tai fforddiadwy, a swyddi, yn ogystal â llywio buddsoddiad newydd a blaenoriaethau o ran seilwaith, gan barchu ffabrig cymdeithasol y Sir ar yr un pryd, gan gynnwys y Gymraeg, diwylliant Cymreig a'i naws am le.

11.77 Cydnabyddir bod y themâu a'r polisïau a ddyrennir iddynt yn gorgyffwrdd â'i gilydd, ond nodwyd y canlynol o dan y thema hon:

• Polisi Strategol - SP 3: Darparu Tai Newydd
• Polisi Strategol - SP 4: Tai Fforddiadwy
• Polisi Strategol - SP 5: Safleoedd Strategol
• Polisi Strategol - SP 6: Cyflogaeth a'r Economi
• Polisi Strategol - SP 7: Y Gymraeg a Diwylliant Cymru
• Polisi Strategol - SP 8: Seilwaith
• Polisi Strategol - SP 9: Darpariaeth i Sipsiwn a Theithwyr
• Polisi Strategol - SP 10: Yr Economi Ymwelwyr
• Polisi Strategol - SP 11: Gwneud Lle, Cynaliadwyedd a Dylunio o Ansawdd Uchel

11.78 Mae'r polisïau a ganlyn yn ceisio cefnogi cyflawniad amcanion strategol y Cynllun, ond hefyd yn creu cysylltiadau lefel uchel ac yn sicrhau y cydymffurfir yn fras â'r Nodau Llesiant.

11.79 Un o nodau'r Cynllun yw hwyluso darparu'r nifer a'r ystod ofynnol o dai newydd o ansawdd, a fydd yn bodloni anghenion tai a nodwyd ac yn hyrwyddo cymunedau cydlynus sydd yn ddeniadol, yn ddiogel, wedi'u cysylltu'n dda ac yn cynnig mynediad at gyfleusterau diwylliannol a hamdden, gwasanaethau cymunedol a chyfleoedd am gyflogaeth.

11.80 Cafodd Strategaeth y Cynllun a'i dull cynaliadwy o ddarparu tai newydd ei seilio ar egwyddorion datblygu cynaliadwy. Mae hyn yn gyson â nodau a dyheadau Deddf Llesiant Cenedlaethau'r Dyfodol a pholisi cynllunio cenedlaethol^[3]. Mae'n canolbwyntio ar fodloni anghenion tai ar draws cymunedau amrywiol y Sir mewn modd sy'n gynaliadwy, yn parchu rhinweddau amgylcheddol y Sir a'i nodweddion o safbwynt diwylliant a'r Gymraeg.

11.81 Mae'r CDLl yn ceisio hyrwyddo naws am le drwy hyrwyddo cymunedau cydlynus sy'n ddeniadol, yn ddiogel, wedi'u cysylltu'n dda ac sy'n cynnig ystod o gyfleoedd i gael mynediad at wasanaethau, gan nodi cymeriad gwledig rhannau o'r Sir.

11.82 Mae ffigur gofyniad tai ar gyfer y Sir yn seiliedig ar amcanestyniad 10 mlynedd o Dwf y Boblogaeth a amlygwyd yn adroddiad Edge Analytics yn 2019^[4]. Mae'r senario hon yn rhagfynegi gofyniad tai a fyddai'n cefnogi uchelgeisiau economaidd y Sir drwy gynorthwyo i greu swyddi, ac yn ceisio cyfrannu at ymdrin unwaith eto â'r diffyg cydbwysedd a achosir gan boblogaeth sy'n heneiddio yn Sir Gaerfyrddin. Mae'r rhesymeg ar gyfer yr opsiwn hwn a ffafrir ar gyfer twf hefyd yn cynnwys ystyriaeth o gyfraddau adeiladu'r gorffennol yn y Sir dros y 12 mlynedd diwethaf, ac yn creu seiliau uchelgeisiol, ond cadarn, er mwyn cyflawni nodau strategol cyffredinol y Cyngor.

11.83 Mae'r Cynllun hwn yn cyfrifo nifer o gydrannau cyflenwi tai er mwyn bodloni'r angen am dai, ynghyd â hyblygrwydd (cynnydd) er mwyn sicrhau y bydd nod cyffredinol y polisi strategol i ddarparu tai newydd yn cael ei gyflawni. Mae'r cyflenwad tai yn cynnwys y cydrannau a ganlyn:

• Dyraniadau Tai (5+ cartref)
  • Ymrwymiadau banc tir
  • Anheddau wedi'u Cwblhau

• Darpariaeth ar gyfer hap-safleoedd
  • Cydran Safleoedd Bach (llai na 5 cartref)
  • Cydran ar Hap-safleoedd (5+ Cartref)
• Hyblygrwydd (+15%)

Dyraniadau Tai

11.84 Cydran fwyaf y cyflenwad tai yw safleoedd a ddyrannwyd i'w datblygu'n breswyl. Caiff dyraniadau tai eu nodi mewn polisïau tai penodol neu eu cynnwys yn rhan o ddyraniadau defnydd cymysg.

11.85 Bydd y polisïau penodol yn ystyried y datblygiadau sydd wedi cael eu cychwyn neu yr ymrwymwyd iddynt ers dyddiad sylfaen y CDLl diwygiedig, a byddant yn cael eu monitro'n barhaus drwy'r gwaith a gyflawnir yn rhan o'r Gydastudiaeth Argaeledd Tir ar gyfer Tai (JHLA) a'r Trywydd Tai (Atodiad 7).

Hap-safleoedd

11.86 Mae'r ddarpariaeth ar gyfer hap-safleoedd wedi'i seilio ar y ffactorau a ganlyn:

1. Cyfraniadau posibl o safleoedd sy'n cynnwys llai na phum annedd (safleoedd bach) o fewn yr aneddiadau diffiniedig.
2. Lwfans annisgwyl trwy safleoedd o bum annedd neu fwy sydd yn draddodiadol wedi gwneud cyfraniad pwysig at gyflenwi tai yn Sir Gaerfyrddin.

11.87 Bydd datblygiadau ar hap-safleoedd yn cael eu hystyried ar sail eu rhinweddau unigol, ac yn erbyn polisïau a chynigion y Cynllun hwn. Cydnabyddir nad yw hi bob amser yn ymarferol nac yn briodol dyrannu pob safle i'w ddatblygu o fewn Prif Ganolfannau a Chanolfannau Gwasanaeth. Yn wir, mewn aneddiadau llai ceir safleoedd sy'n addas i'r datblygu yn aml nad ydynt wedi'u pennu fel dyraniadau - a bydd eu cyfraniad at y cyflenwad o dir ar gyfer tai wedi'i nodi drwy'r ddarpariaeth hap-safleoedd.

11.88 Mae'r tir a ddyrannwyd ar gyfer tai a nodwyd drwy'r polisi hwn a thrwy ddarpariaethau eraill y Cynllun hwn yn ceisio bodloni'r gofynion tir ar gyfer tai yn y Sir. Wrth eu dosbarthu, cafodd y dyraniadau hynny eu llywio at aneddiadau mewn modd a oedd yn gyson â strategaeth gyffredinol y Cynllun ac egwyddorion cynaliadwyedd. Fodd bynnag, mae'r Cynllun yn ceisio cyflawni hyn drwy hierarchaeth strwythuredig a thrwy ddosbarthu twf mewn modd sy'n golygu bod mwyafrif y tir sydd ei angen ar gyfer y tai yng nghanolfannau cynaliadwy Caerfyrddin, Llanelli a Rhydaman/Cross Hands. Mae dyraniadau pellach wedi'u dosbarthu ar draws gweddill yr hierarchaeth.

11.89 Ystyriwyd capasiti safleoedd a ddyrannwyd fesul safle, yn hytrach na thrwy gymhwyso safon benodol. Yn sicr, gwelwyd dwysedd uwch ar safleoedd yn yr aneddiadau lefel uwch, gan ystyried y math o ddatblygwr a fyddai'n cyflwyno'r safle, cynllun safleoedd cyfagos, nodweddion y safle ei hun a ffactorau'n gysylltiedig â datblygu ar y safle. Bydd yr un egwyddorion yn cael eu hystyried mewn aneddiadau mwy gwledig a fydd yn cynnwys dwysedd is ar y cyfan.

11.90 Bwriedir i'r niferoedd ar safleoedd a amlygwyd ym Mholisi HOM1 fod yn niferoedd dangosol, a rhoddir ystyriaeth bellach i'r niferoedd hynny wrth gyflwyno ceisiadau. Bydd yn rhaid rhoi ystyriaeth hefyd i bolisïau a darpariaethau'r cynllun hwn, ac i egwyddorion dylunio eraill perthnasol.

11.91 I gyd-fynd â chynigion i ddatblygu safleoedd a ddyrannwyd ar gyfer tai a gyflwynir mewn ceisiadau am Ganiatâd Cynllunio Llawn neu ganiatâd ar gyfer Materion a Gadwyd yn Ôl, dylid cyflwyno cynllun o'r safle sydd wedi'i ddyrannu yn ei gyfanrwydd, er mwyn sicrhau bod y safle'n cael ei ddatblygu'n unol â'i botensial llawn. Dylid cyfeirio hefyd at bolisi PSD2 yn gysylltiedig â gofynion prif gynlluniau.

11.92 I ategu'r Cynllun ceir Cynllun Cyflawni Seilwaith sy'n rhoi manylion pellach ynghylch amserlennu, ariannu a chyflawni seilwaith sydd ei angen ar gyfer pob safle sydd wedi'i ddyrannu. Yn hyn o beth bydd yn ofynnol i gynigion gynnwys amserlen briodol er mwyn cyflawni'r gwaith fesul cam. Bydd hon nid yn unig wedi'i seilio ar y Cynllun Cyflawni Seilwaith, ond hefyd ar ofynion polisi a mesurau lliniarol yn gysylltiedig ag effeithiau posibl ar y Gymraeg ac ar fioamrywiaeth.,

11.93 Mae safleoedd a all gynnwys pum neu fwy o anheddau wedi'u cynnwys fel safleoedd tai wedi'u dyrannu yn y Cynllun (gweler Polisi HOM1). Fodd bynnag, o fewn ffiniau datblygu aneddiadau diffiniedig gallai cyfleoedd godi i ddatblygu ar safleoedd heb eu dyrannu. O fewn yr hierarchaeth aneddiadau, gelwir tir nad yw wedi'i ddyrannu yn hap-safle yn gysylltiedig â datblygiad tai. Dylai cynigion adlewyrchu cymeriad yr ardal a bod yn gyson â darpariaethau'r Cynllun.

11.94 Mae'r fframwaith aneddiadau ar gyfer ardal y Cynllun a nodir ym Mholisi Strategol SP16 yn cydnabod ac yn adlewyrchu amrywiaeth yr ardal a'i chymunedau. Wrth nodi'r Pentrefi Gwledig, mae'r Cynllun yn ceisio darparu ar gyfer yr aneddiadau hynny sy'n gwneud cyfraniad pwysig o fewn eu cymunedau.

11.95 Bydd y rhain yn aml yn aneddiadau a oedd yn y gorffennol wedi cynnwys gwasanaethau a chyfleusterau penodol sydd bellach, o bosib, wedi diflannu. Er y gellir dadlau bod eu rôl a'u swyddogaeth wedi lleihau, maent yn dal i gynrychioli cymuned sefydledig sy'n cynnig cyfleoedd am dai newydd graddfa fach a phriodol o fewn lleoliadau gwledig.

11.96 Mae'r rhan hon o fframwaith polisi gwledig y Cynllun yn ceisio sefydlu ymagwedd hyblyg ond rheoledig at ddarparu tai newydd o fewn yr aneddiadau hynny. Mae'r Cynllun yn ystyried peidio cymhwyso ffiniau datblygu, ac yn defnyddio asesiad sy'n seiliedig ar feini prawf i ddiffinio cyfleoedd tai graddfa fach mewn pentrefi gwledig. Drwy'r ymagwedd hon sicrheir y byddai'n cefnogi'r cymunedau gwledig ac yn bodloni'r angen am dai newydd yn rhannau gwledig o Sir Gaerfyrddin, ar raddfa ac mewn lleoliadau sy'n cynnal cymeriad hanfodol cefn gwlad.

11.97 Er mwyn adlewyrchu'r cymeriad gwledig ac atal lefelau twf annerbyniol a allai fod yn niweidiol, caniateir cap o 20% yn ychwanegol at nifer y tai presennol yn yr anheddiad, ar ddyddiad sylfaen y Cynllun.

11.98 Cyhoeddir canllawiau pellach ar ffurf Canllaw Cynllunio Atodol er mwyn cynorthwyo i ddehongli a chymhwyso'r uchod, a'r polisi. Bydd y canllaw yn rhan o gyfres o Ganllawiau Cynllunio Atodol i gefnogi ystyriaethau ynghylch dylunio a lleoli yn gyffredinol, ac yn galluogi cynigion i gyfrannu at ddatblygu cymunedau cydlynus a chynaliadwy, ac integreiddio'n effeithiol iddynt.

Canllawiau ar Blotiau Derbyniol

1. Fel rheol, bydd safleoedd mewnlenwi o fewn y pentrefi gwledig hyn yn cael y flaenoriaeth ar leoliadau eraill (safleoedd lle ceir datblygiad adeiledig ar y naill ochr a'r llall yw'r safleoedd hyn fel arfer);
2. Lle bo'n briodol, bydd safleoedd sy'n ffinio â phentref gwledig hefyd yn dderbyniol. Bydd yn ofynnol i safleoedd o'r fath ffinio ag un eiddo sy'n rhan o grŵp y pentref gwledig. Bydd yn ofynnol i bob cynnig sy'n ffinio â grŵp (yn wahanol i safleoedd mewn lenwi) ddangos y canlynol:
   • nodwedd ffisegol neu weledol bresennol sy'n creu ffin i'r grŵp - gan leihau pwysau am ddatblygiad hirgul neu flerdwf trefol annerbyniol;
   • os nad oes nodwedd o'r fath yn bodoli, gellid darparu nodwedd o'r fath ar yr amod ei bod yn cyd-fynd â chymeriad y grŵp o ran graddfa ac ymddangosiad;
3. Ni fydd cynigion mewn caeau agored sy'n ffinio â grŵp, nad oes ganddynt unrhyw nodweddion ffisegol i'w hamgylchynu yn cael eu hystyried yn dderbyniol;
4. Ni chaiff cynigion y tu hwnt i nodweddion ffisegol clir sy'n creu ffiniau cryf o amgylch grŵp (ee, priffyrdd, lleiniau sylweddol o goed, afonydd ac ati) yn cael eu hystyried yn dderbyniol.

11.99 Gan ddarparu ar gyfer ein hardaloedd gwledig a'u cymunedau, mae'r polisi yn ceisio adlewyrchu'r rhan bwysig y gall tai fforddiadwy ei chwarae er mwyn bodloni anghenion penodol ardal leol. Y nod yw caniatáu datblygu yng nghefn gwlad ar raddfa ac mewn lleoliadau sy'n cynnal cymeriad hanfodol y Sir Gaerfyrddin wledig, gan ddarparu ar gyfer anghenion tai pobl leol.

11.100 Nodir hefyd fod angen cyflenwi'r ddarpariaeth honno yn erbyn agenda genedlaethol sy'n canolbwyntio ar gynaliadwyedd â chreu lleoedd yn rhan greiddiol o hynny. Yn hyn o beth, cyfeirir at ddarpariaethau PCC Rhifyn 10, sy'n ei gwneud hi'n ofynnol arfer rheolaeth lem dros bob datblygiad preswyl nad yw wedi'i leoli ger aneddiadau presennol. Gan adlewyrchu darpariaethau polisi cenedlaethol, mae'r polisi felly'n mynnu bod anheddau i fodloni angen lleol am dai fforddiadwy mewn ardaloedd gwledig yn cael eu cyfyngu i bentrefannau neu grwpiau o anheddau sefydledig. Y mae hefyd yn ceisio cyfyngu ar nifer posibl yr anheddau hynny, fel na cheir mwy na 2 annedd i fodloni angen lleol am dai fforddiadwy. Mae'r cyfyngiad hwn yn berthnasol i ganiatadau cynllunio presennol os ydynt yn dal yn ddilys yn dilyn dyddiad sylfaen y cynllun (1 Ebrill 2018).

11.101 Er bod sylfaen gadarn o dystiolaeth i gefnogi'r CDLl Diwygiedig, cydnabyddir bod manylion anghenion tai yn newid dros amser. Ar gyfer cynigion am dai fforddiadwy, bydd yn ofynnol cyflwyno tystiolaeth i ddangos yr angen penodol lleol a sicrhau bod y cynnig yn darparu tai o'r maint, o'r math ac o'r ddeiliadaeth sydd ei hangen. Ni chaiff cynigion i fodloni angen lleol tybiannol eu hystyried. Yn lle hynny, dylent fod yn gysylltiedig ag angen a nodwyd gan unigolion/teuluoedd o fewn yr ardal benodol.

11.102 Lle bônt ar gael, dylid defnyddio arolygon anghenion tai lleol i ddarparu'r dystiolaeth hon. Fel arall, gellir ystyried bod ffurfiau eraill ar dystiolaeth yn briodol, gan gynnwys Asesiadau Ardal Marchnad Dai Strategol, a chofrestrau anghenion/gosod tai lleol.

11.103 Bydd mesurau'n cael eu gorfodi i reoli meddiannaeth, er mwyn sicrhau bod manteision fforddiadwyedd yn cael eu cadw am byth i feddianwyr dilynol. Ceir diffiniad o Aneddiadau Gwledig Anniffiniedig a Thai sy'n Bodloni Anghenion Lleol yn y Rhestr Termau.

11.104 Mae'r polisi hwn yn ceisio adlewyrchu potensial cyfleoedd i addasu anheddau presennol priodol yn lle adeiladu o'r newydd. Yn aml gall cyfleoedd o'r fath greu ystod a deis ychwanegol o fewn y stoc tai, a chynnig opsiynau eraill i berchnogion eiddo, lle nad yw meddiannaeth unigol mewn anheddau mwy yn briodol mwyach.

11.105 Dylai estyniadau fod yn israddol i'r annedd bresennol, a cydweddu â maint, math a chymeriad yr annedd bresennol, a pheidio ag achosi gorddatblygu (dylid cyfeirio at bolisi PSD10: Estyniadau). Lle bo'n briodol, anogir ailddefnyddio deunyddiau yn rhan o unrhyw ddatblygiad mewn cynigion.

11.106 Gallai'r proffil oedran newidiol a'r symudiad parhaus a ragwelir dros gyfnod y cynllun tuag at boblogaeth sy'n heneiddio gynyddu'r angen am Dai Arbenigol. Bydd modd bodloni rhai gofynion am ddarpariaeth byw gyda chymorth neu anghenion cymorth drwy addasu tai presennol neu drwy gyfleusterau presennol. Er hynny, cydnabyddir bod angen i'r Cynllun gynnwys darpariaeth i ystyried yr angen am gartrefi gofal newydd. Gan hynny, mae'r polisi hwn yn ceisio darparu fframwaith ar gyfer ystyried cynigion, er mwyn sicrhau ystyriaeth briodol o anghenion y rhai y mae angen gofal arnynt.

11.107 I ddibenion y polisi hwn, mae'r diffiniad o Dai Arbenigol yn gysylltiedig â chartrefi nyrsio, tai gwarchod, cartrefi gofal ychwanegol neu ofal agos (warden), cyfleusterau ymddeol sy'n adlewyrchu anghenion gofal parhaus, a chyfleusterau eraill lle darperir gofal. Pan gynigir cartref gofal ar safle sydd wedi'i ddyrannu at ddefnydd preswyl yn y Cynllun, rhoddir ystyriaeth i natur y cynnig a'i addasrwydd ar gyfer y lleoliad arfaethedig. Bydd lefel annibyniaeth y preswylwyr yn ystyriaeth bwysig, ac ni fydd tai 'drws caeedig' fel arfer yn cael eu hystyried yn briodol.

11.108 Bydd cynnwys cartrefi gofal oddi mewn i'r ffiniau datblygu, neu gerllaw, yn sicrhau bod preswylwyr yn cael cyfle i integreiddio i'r gymuned, a bod datblygiadau yn rhan o'r ffurf drefol neu adeiledig. I ddibenion y polisi hwn, diffinnir cyfleusterau a gwasanaethau cymunedol fel meddygfeydd teulu a siopau. Mae hygyrchedd y seilwaith a'r cyfleusterau hynny yn elfen bwysig ymhlith anghenion pobl.

11.109 Drwy adnewyddu anheddau wedi'u gadael, gellir gwneud cyfraniad bach ond pwysig at anghenion ardal. Bydd gwerth pensaernïol nifer o anheddau adfeiliedig neu anheddau wedi'u gadael yn aml yn adlewyrchu'r arddull draddodiadol gynhenid, a dylid cydnabod hynny wrth gyflwyno cynigion ar eu cyfer. Dylai estyniadau, gofynion mynediad neu unrhyw agweddau eraill sy'n gysylltiedig â'r cynnig fod yn ystyriol o gymeriad yr adeilad gwreiddiol a'r tirlun. Bydd cynigion sy'n ceisio gwneud cyfraniad cadarnhaol at rinweddau tirweddol yr ardal yn cael eu hannog.

11.110 Os na fydd cynigion yn bodloni'r uchod (gan gynnwys ailadeiladu), fe'u hystyrir yn ddatblygiad mewn ardal o gefn gwlad agored, a gwneir penderfyniad yn eu cylch yn unol â hynny.

11.111 Bydd amodau'n cael eu gosod ynghylch lleoli carafán/cartref symudol sydd ei angen yn gysylltiedig â'r uchod, er mwyn sicrhau y bydd yn cael ei symud o'r safle pan na fydd angen ei defnyddio mwyach. Asesir hyd unrhyw ganiatâd dros dro yn erbyn manylion neilltuol pob cais. Bydd yr hyn a benderfynir o ran yr amserlen angenrheidiol ar gyfer lleoli carafanau / cartrefi symudol yn gysylltiedig ag adeiladu annedd hunanadeiladu wedi'i seilio ar hyd y gwaith adeiladu disgwyliedig.

11.112 Gall llety preswyl ategol fod o ddefnydd werthfawr gan alluogi perthynas i fyw gyda'i deulu gan gadw rhywfaint o annibyniaeth. Fodd bynnag, mae angen lefel o reolaeth dros y llety hwnnw er mwyn sicrhau bod ei swyddogaeth o natur ategol, ac nad arwain at greu annedd hunangynhaliol ar wahân.

11.113 Dylai unrhyw gynnig adlewyrchu ei swyddogaeth ategol a pheidio cynnwys yr ystod lawn o gyfleusterau a gysylltir ag annedd annibynnol. Ni ddylid ychwaith ei ddylunio mewn modd a fyddai'n golygu y gellir ei addasu neu ei feddiannu fel annedd annibynnol. Dylid dylunio cynigion i adlewyrchu anghenion hanfodol a nodwyd gan y meddiannydd, gyda'r darpariaethau syml yn adlewyrchu natur ategol y rhandy. Ar gyfer un preswylydd byddai hyn fel arfer yn cynnwys un ystafell wely en-suite ac ardal fyw gyda chegin fach.

11.114 Bydd yn ofynnol i berchnogaeth y rhandy fod yr un peth â pherchnogaeth y brif annedd, a dylid cynnwys manylion ei feddianwyr gydag unrhyw gais, gan gynnwys perthynas y meddianwyr hynny ac/neu eu dibyniaeth â meddianwyr y brif annedd, a manylion ynghylch perchnogaeth y rhandy.

11.115 Ni chaniateir rhandy fel arfer ond ar ffurf estyniad i'r brif annedd. Bydd yn rhaid ystyried angen y deiliad mewn perthynas â maint unrhyw adeilad allanol y cynigir ei drawsnewid. Yn hyn o beth, mae'n bosibl na fydd hi ond yn dderbyniol addasu rhan o'r adeilad er mwyn sicrhau nad yw'r rhan sy'n cael ei haddasu ond yn darparu cyfleusterau cyfyngedig sy'n gymesur â'i phwrpas ategol.

11.116 Ni ddylai'r rhandy ddisodli defnydd presennol a fyddai'n golygu bod angen codi adeilad arall fel bo modd parhau â'r defnydd hwnnw. Ni ystyrir rhandy ar wahân wedi'i adeiladu o'r newydd ond os dangosir i raddau boddhaol nad yw estyniad nac addasu yn briodol nac yn bosibl, ac ni chaniateir hyn mewn lleoliadau y tu allan i ffiniau anheddiad diffiniedig.

11.117 Mae tai fforddiadwy yn fater allweddol i'w ystyried wrth baratoi'r CDLl Diwygiedig, yn enwedig er mwyn cyfrannu at ddatblygu cymunedau cynaliadwy, cytbwys a chydlynus.

11.118 Mae'r polisi hwn yn ceisio adlewyrchu'r gofynion a nodir yn TAN 2 - Cynllunio a Thai Fforddiadwy (2006) sy'n ceisio sefydlu trefniadau diogel 'er mwyn sicrhau eu bod o fewn cyrraedd i'r rheini sydd heb fod yn gallu fforddio tai ar y farchnad agored, gan gynnwys pobl sy'n eu meddiannu gyntaf a'r bobl sy'n dod ar eu hôl'.

11.119 Ceir dau brif fath o dai fforddiadwy, fel y'u diffinnir yn TAN2:

• Tai Rhent Cymdeithasol: wedi'u darparu gan awdurdodau lleol a landlordiaid cymdeithasol cofrestredig; a
• Thai Canolradd: lle bo'r prisiau neu'r rhent yn uwch na thai rhent cymdeithasol ond yn is na thai'r farchnad^[5].

11.120 Wrth asesu'r angen am anheddau fforddiadwy, rhoddir sylw i'r Asesiad o'r Farchnad Dai Leol (LHMA) diweddaraf ar gyfer Sir Gaerfyrddin. Yn LHMA 2019, nodir ymraniad 76% / 24% rhwng yr aelwydydd ac arnynt angen tai ar y farchnad a'r aelwydydd hynny ac arnynt angen tai fforddiadwy. I ddibenion yr LHMA, mae'r Sir wedi cael ei rhannu i 4 Ardal Gweithredu ar Dai Fforddiadwy, ac mae cyfran sylweddol o'r aelwydydd ac arnynt angen tai fforddiadwy yn Ardal Weithredu Llanelli (47%). Mae'r LHMA hefyd yn nodi math a maint y tai sydd eu hangen drwy'r Sir, ac mae gan Lanelli amrediad cyson o angen ar draws cartrefi 1, 2 a 3 ystafell wely. Yn gyffredinol ar draws yr Ardaloedd Gweithredu eraill, mae angen datblygu tai 2 a 3 ystafell wely er mwyn bodloni'r angen am dai fforddiadwy. Wrth ddadansoddi'r data hyn, gwelir cydberthynas gref rhwng lleoliad yr angen am dai fforddiadwy a dosbarthiad y twf tai arfaethedig a nodir yn strategaeth y CDLl a'r fframwaith aneddiadau (gweler polisi SP16).

11.121 Er bod y CDLl a'r system gynllunio yn ceisio cefnogi darparu tai fforddiadwy, nid yw ond un ymhlith amryw o fecanweithiau a ddefnyddir i fodloni'r angen hwn. Adlewyrchir hyn yng Nghynllun Cyflenwi Tai Fforddiadwy 2016-2020 y Cyngor, sy'n pennu gweledigaeth pum mlynedd ar gyfer darparu tai fforddiadwy. Nodir cyfraniad y CDLl at y targed yn SP4 drwy:

• Ddarparu tai fforddiadwy ar-safle fel canran o'r holl ddatblygiad, neu ar safleoedd a gaffaelir gan ddarparwyr tai cymdeithasol;
• Tai fforddiadwy oddi ar y safle yn lle darpariaeth ar-safle;
• Cyfrannu symiau wedi'u gohirio i gefnogi darpariaeth tai fforddiadwy; a
• Thai i fodloni Anghenion Lleol.

11.122 Cyfeirir hefyd at Astudiaeth Astudiaeth Anghenion Gwledig Sir Gaerfyrddin 2019 sy'n nodi bod cyfran uwch o anheddau mwy yn yr ardaloedd gwledig, a bod hynny'n cyfrannu at brisiau tai uwch.^[6]Mae'r CDLl yn anelu i gefnogi twf unedau mwy fforddiadwy mewn cymunedau gwledig, er mwyn hyrwyddo datblygiadau i brynwyr tro cyntaf neu rai ar aelwydydd incwm isel.

11.123 Nod polisïau AHOM1 ac AHOM2 yw cynorthwyo'r Cyngor i fodloni ei angen am dai, ac yn enwedig i fodloni'r angen am dai fforddiadwy a nodwyd ym Mholisi SP4.

11.124 Mae'r polisi'n pennu'r cyfraniadau y dylid eu darparu ar gyfer tai fforddiadwy sy'n amrywio yn ôl graddfa'r datblygiad arfaethedig. Mae gofynion y polisi yn adlewyrchu canfyddiadau Astudiaeth Hyfywedd y CDLl Diwygiedig ac yn ystyried ffactorau eraill fel yr LHMA, cyfraddau darparu yn y gorffennol a'r angen am hyblygrwydd er mwyn caniatáu amrywio rhwng safleoedd.

11.125 Mae gofynion y Polisi ar gyfer cyfraniadau ar-safle yn berthnasol i bob datblygiad tai arfaethedig sydd wedi'i leoli o fewn ffiniau anheddiad, a chanddo'r capasiti i sicrhau cynnydd net o 10 neu fwy o anheddau newydd. Bydd y safleoedd hynny sydd y tu allan i ffiniau'r anheddiad yn ddarostyngedig i ofynion Polisi AHOM2.

11.126 Mae gofynion y polisi am symiau wedi'u gohirio yn berthnasol i holl gynigion arfaethedig y farchnad agored sy'n creu cynnydd net o 1-9 o anheddau newydd, ac eithrio anheddau sengl sydd wedi'u cynnwys yn categori tai 3 ystafell wely, 4 unigolyn nad yw ei arwynebedd llawr mewnol trigiadwy yn fwy nag 84 metr sgwâr.

11.127 Bydd y gymysgedd o anheddau y mae angen ei darparu ar bob safle o ran maint, math a deiliadaeth, yn amrywio yn ôl anghenion penodol yr ardal leol wrth gyflwyno'r cais. Yn rhan o hyn, bydd angen ystyried yr wybodaeth ddiweddaraf am anghenion tai o'r LHMA, ynghyd ag unrhyw wybodaeth leol berthnasol, fel rhestr aros y Cyngor ac unrhyw unedau tai fforddiadwy a ddarparwyd yn ddiweddar o fewn yr ardal.

11.128 Rhoddir caniatâd cynllunio yn ddarostyngedig i amodau neu rwymedigaethau cynllunio sy'n sicrhau bod y tai fforddiadwy yn parhau i fod ar gael i fodloni'r angen lleol am dai fforddiadwy yn y dyfodol. Er eglurder, mae'n rhaid i safleoedd datblygu sy'n cynnwys 100% o dai fforddiadwy gydymffurfio â meini prawf y polisi hwn. Ni fydd safleoedd eithriadau ond yn cael eu caniatáu os oes tystiolaeth foddhaol ar gael i gefnogi'r ddarpariaeth.

11.129 Fel arfer, ni ddylid ystyried safleoedd eithriadau mewn anheddiad lle mae dyraniadau presennol yn cael eu cyflwyno, a lle bo elfen o fforddiadwyedd yn cael ei ddarparu yn rhan o'r datblygiad hwnnw. Bydd angen tystiolaeth i ddangos nad oes disgwyl i unrhyw gynlluniau ar safleoedd wedi'u dyrannu ddechrau o fewn cyfnod rhesymol.

11.130 Darperir gwybodaeth bellach drwy'r polisi cenedlaethol ar ffurf PCC, TAN2: Cynllunio a Thai Fforddiadwy a TAN6: Cynllunio ar gyfer Cymunedau Gwledig Cynaliadwy. Bydd y Canllawiau Cynllunio Atodol sydd ar ddod yn ymhelaethu ac yn rhoi arweiniad pellach ar weithredu a dehongli tai fforddiadwy.

Pentref Gwyddor Bywyd a Llesiant, Llanelli

11.131 Bydd y Pentref Gwyddor Bywyd a Llesiant yn darparu cyfleusterau a gwasanaethau sy'n hyrwyddo a gwella llesiant, yn integreiddio datblygiad busnes, addysg, gofal iechyd, hamdden, twristiaeth, cymorth llesiant ac ymchwil i wyddorau bywyd mewn un lleoliad, ac yn creu budd cymdeithasol ac economaidd gweddnewidiol. Rhoddwyd caniatâd cynllunio amlinellol ym mis Awst 2019 o dan gyfeirnod cais S/36948.

11.132 Bydd y pentref yn cynnwys sefydliad gwyddor bywyd sy'n cynnig lle i ddatblygu ac ymchwilio i ddyfeisiau meddygol a thechnolegau gofal iechyd newydd. Bydd y sefydliad hefyd yn cynnig gofodau swyddfa, labordy a gofodau clinigol ar gyfer cwmnïau rhanbarthol newydd sy'n tyfu yn ogystal â chyfleoedd i gychwyn busnes.

11.133 Ceir canolbwynt llesiant a fydd yn cynnwys canolfan hamdden, cyfleusterau chwaraeon awyr agored, cyfleoedd hamdden yn ogystal â gweithgareddau sy'n hyrwyddo llesiant. Ceir llety byw gyda chymorth, cartref gofal a thai'n benodol ar gyfer pobl â nam gwybyddol neu sy'n cael eu hailsefydlu'n feddygol. Gwnaed darpariaeth ar gyfer 240 o unedau 'Dosbarth Defnydd C3' o'r safle hwn o dan bolisi HOM1 y CDLl.

11.134 Ceir canolfan gwyddor bywyd a llesiant a fydd yn cynnwys ystod o wasanaethau llesiant o'r sector iechyd, y sector cyhoeddus, y sector preifat a'r trydydd sector fel eu bod ar gael mewn un lleoliad. Bydd y ganolfan hefyd yn cynnwys cyfleoedd hyfforddi a ddatblygir mwyn ymateb i brinder sgiliau. ^[7]

11.135 Bydd y datblygiad hwn sy'n arwain y byd wedi'i leoli ar hyd arfordir Llanelli. Dyma fydd y prosiect adfywio mwyaf erioed yn Ne Orllewin Cymru, a'i nod yw gwella iechyd a llesiant pobl ledled y rhanbarth, gan greu hyd at 2,000 o swyddi o ansawdd uchel sy'n talu'n dda a rhoi hwb o £467 miliwn i'r economi dros 15 mlynedd. Bydd cysylltiadau rhyngddo a'r dirwedd naturiol, a bydd wedi'i gynnwys yn y dirwedd honno, wedi'i leoli o amgylch llyn dŵr croyw o fewn pellter cerdded i Barc Arfordirol y Mileniwm.^[8]

11.136 Mae'r lleoliad arfordirol rhagorol yn ardal ôl-ddiwydiannol De Llanelli yn tystio i'r hen hanes o fentrau adfywio gan y Cyngor a'i bartneriaid, gan gynnwys Llywodraeth Cymru.

11.137 Wrth nodi'r cyd-destun strategol, mae'r prosiect hwn yn parhau i fod wedi'i ymwreiddio'n ddwfn mewn gwaith i hyrwyddo llesiant ar raddfa leol.

Ffigur 9: Cyngor Sir Caerfyrddin - dyfyniad o brif gynllun dangosol ar gyfer y pentref gwyddor bywyd a llesiant arfaethedig

Yr Egin - Clwstwr Digidol Creadigol, Caerfyrddin

11.138 Mae prosiect Yr Egin yn darparu clwstwr digidol a chreadigol newydd yng Nghaerfyrddin; mae'n darparu gofod cychwyn a datblygu busnes i gwmnïau digidol creadigol, ac yn hyrwyddo'r Gymraeg.

11.139 Y prosiect fydd pencadlys corff darlledu Cymraeg S4C a bydd yn darparu gofod i gychwyn a datblygu cwmnïau creadigol a digidol.

11.140 Drwy fanteisio ar gynigion seilwaith newydd Arfordir y Rhyngrwyd, bydd Yr Egin yn creu newid mawr a chadarnhaol yn economi greadigol a digidol Cymru.^[9]

11.141 Ceir cyfleoedd niferus ac amrywiol yn sgil y prosiect hwn. O safbwynt gofodol, rhagwelir y bydd yn ailgadarnhau safle Caerfyrddin fel canolfan allweddol wrth borth Gorllewin Cymru chanolbwynt i'r cymunedau gwledig hynny tua'r gogledd.

Ffigur 10: Cyngor Sir Caerfyrddin – Prif Gynllun Safle Yr Egin

11.142 Dylai datblygiad safleoedd cyflogaeth yn y dyfodol, ac yn wir datblygiad economaidd yn y Sir yn y dyfodol gael ei ystyried yn y cyd-destun ehangach. Llofnodwyd Bargen Ddinesig Bae Abertawe yn 2017, gan sicrhau £1.3 biliwn i gynghorau Abertawe, Sir Gaerfyrddin, Castell-nedd Port Talbot a Sir Benfro. Disgwylir y bydd y Fargen yn trawsnewid tirwedd economaidd yr ardal, yn rhoi hwb o £1.8 biliwn i'r economi leol, ac yn creu bron i 10,000 o swyddi newydd dros y 15 mlynedd nesaf.

11.143 Bydd y Fargen yn golygu tri phrosiect penodol i Sir Gaerfyrddin – y mae dau ohonynt yn ymwneud â datblygiadau ffisegol, sef y Pentref Iechyd a Gwyddor Bywyd yn Llynnoedd Delta, Llanelli a phrosiect y diwydiannau creadigol yn Yr Egin yng Nghaerfyrddin. Mae'r trydydd prosiect yn ymwneud â menter sgiliau a thalent sydd wedi'i chanoli yn Sir Gaerfyrddin, ac sy'n cefnogi datblygiad sgiliau yn y rhanbarth.

11.144 Mae'r Cyngor wedi casglu tystiolaeth i ddarparu dealltwriaeth am yr angen o ran cyflogaeth yn y dyfodol yn anad dim yn y naw sector y rhoddir blaenoriaeth iddynt gan Lywodraeth Cymru.^[10] Paratowyd tystiolaeth bellach ar y cyd â Chyngor Sir Penfro i sefydlu dadansoddiad meintiol o'r galw a ragwelir am safleoedd cyflogaeth ac fe'i hategwyd gan dystiolaeth o'r farchnad a chan gyflogwyr mewn perthynas â'r galw yn y farchnad.

11.145 Mae'r astudiaeth isranbarthol yn ceisio taro cydbwysedd rhwng ateb gofynion Nodyn Cyngor Technegol 23 ar Ddatblygu Economaidd (Chwefror 2014), a gosod pwyslais cryf ar hyblygrwydd, gwireddu twf sectorau a'r gallu i ateb y galw ar raddfa ranbarthol.

11.146 Mae TAN 23 yn ystyried 'efallai y bydd y targedau darparu tir yn uwch na'r galw disgwyliedig', i ddarparu ar gyfer y siawns i ateb y galw. Mae'r Canllawiau Ymarfer sy'n cyd-fynd â'r Nodyn Cyngor Technegol (Awst 2015) yn ystyried, lle gellir cyfiawnhau hynny, efallai y bydd y targedau darparu tir yn uwch na'r galw disgwyliedig, i ddarparu ar gyfer y siawns bod yr asesiadau'n rhy isel ac i sicrhau nad oes unrhyw gyfleoedd yn cael eu colli. Wrth gydnabod pwysigrwydd peidio â dibynnu dim ond ar ragolygon cyflogaeth pan eir ati i adnabod portffolio o dir cyflogaeth, mae'r astudiaeth yn pwysleisio galw a hyder busnesau brodorol i aros a thyfu, a dyhead gan randdeiliaid i warchod manteision lleoliadol ac asedau strategol ar gyfer twf yn y dyfodol.

11.147 Gan gydnabod yr uchod, mae'r astudiaeth wedi adnabod portffolio o safleoedd yn ardal yr astudiaeth yr ystyrir eu bod yn cynnig manteision strategol a chyfle i dyfu a chreu swyddi.

Hierarchaeth Cyflogaeth

11.148 Er bod y ffocws strategol yn gysylltiedig â Bargen Ddinesig Bae Abertawe a chamau posibl i greu swyddi 'â gwerth ychwanegol', bydd y CDLl yn darparu ystod o safleoedd a chyfleoedd ar gyfer mewnfuddsoddi ac adleoliadau posibl. Mae hyn yn cynnwys safleoedd posibl ar gyfer cyflogwyr mwy yn ogystal â safleoedd ar gyfer defnyddiau ar raddfa lai gyda'r fframwaith polisi hefyd yn darparu cyfle ar gyfer busnesau newydd ac i ddechrau busnesau.

11.149 Wrth ystyried lefel y dyraniadau tir cyflogaeth mewn perthynas â'r CDLl, rhoddwyd sylw pellach hefyd i ystod o ystyriaethau i sicrhau bod lefel y ddarpariaeth yn adlewyrchu nid dim ond ystod o safleoedd y gellir eu cyflawni ond hefyd ei bod yn seiliedig ar ddealltwriaeth gadarn am eu cymeriad ac ardaloedd y safleoedd.

11.150 Mae'r pwyslais ar Brif Ganolfannau nid dim ond yn adlewyrchu eu nodweddion cynaliadwyedd ond hefyd eu gwaddol hanesyddol. Mae hefyd (yn enwedig mewn perthynas â Llanelli) yn arwydd o'r cyfraddau diweithdra a lefelau amddifadedd cymharol uchel ac o ymrwymiad cryf i fynd i'r afael â'r problemau. Mae dosbarthiad tir cyflogaeth hefyd wedi'i alinio'n dda â'r lleoliadau cynaliadwy yn y Sir sy'n hygyrch gan ddefnyddio trafnidiaeth gyhoeddus neu lwybrau teithio llesol sy'n lleihau i'r eithaf yr angen i deithio.

11.151 Mae'r tabl canlynol yn nodi'r ddarpariaeth tir cyflogaeth yn y polisi ac yn nodi lefelau cwblhau a safleoedd lle mae caniatâd cynllunio dilys.

	A. Dyraniad yn y CDLl	B. Cwblhawyd	C. Cwblhawyd ond nid yn rhan o'r ffigwr dyranedig	D. Gyda chaniatâd cynllunio	E. Cyflenwad Gweddilliol (A-B-D=E)
PC1 - Caerfyrddin	19.14	0	0	2.18	16.96
PC2 - Llanelli	15.77	0	0	0	15.77
PC3 – Rhydamman/Cross Hands	35.48	0	0	10.39	25.09
Canolfannau Gwasanaeth	7.54	0	0	3.93	3.61
Pentrefi Cynaliadwy	0	0	0	0	0
Pentrefi Gwledig	0	0	0	0	0
Cyfanswm	77.93	0	0	16.50	61.43

Tabl 6: Darpariaeth Tir Cyflogaeth

11.152 Dylid nodi bod y ddarpariaeth safleoedd cyflogaeth wedi'u dyrannu'n cynnwys tir nad yw'n weithredol gyda chyfle ar gyfer tirlunio, clustogfeydd a defnyddiau eraill tebyg.

11.153 Mae'r polisi hwn yn ceisio sicrhau bod safleoedd cyflogaeth presennol yn cael eu gwarchod rhag defnyddiau eraill. Er mwyn cynnal cyflenwad digonol o dir cyflogaeth sy'n darparu ar gyfer ystod a dewis o ddefnyddiau posibl, mae'r polisi hwn yn ceisio gwarchod ardaloedd cyflogaeth diffiniedig rhag defnyddiau sydd mewn cystadleuaeth â chyflogaeth a ddylai fod mewn lleoliadau sy'n well ac, o bosibl, yn fwy priodol.

11.154 Gan gydnabod y pwysau ar ardaloedd cyflogaeth o du defnyddiau eraill (nad ydynt yn perthyn i Ddosbarth B), mae'r polisi'n derbyn y gall fod angen rhywfaint o hyblygrwydd mewn rhai achosion. Mae defnyddiau o'r fath yn aml yn ddefnyddiau dosbarth B rhannol sy'n cyfuno elfen fanwerthu ar raddfa fach â defnydd busnes, diwydiannol neu storio yn bennaf, neu'n ddefnyddiau sui generis. Derbynnir hefyd, wrth ddiwallu anghenion defnyddiau o'r fath, bod ardaloedd cyflogaeth yn aml yn debygol o fod yn fwy derbyniol na lleoliadau eraill megis ardaloedd preswyl, neu hyd yn oed canol trefi. Bydd disgwyl i unrhyw elfen fanwerthu fod yn atodol i'r prif ddefnydd, ac at ddibenion masnach yn hytrach na'r cyhoedd.

11.155 Lle y bo angen, bydd yn ofynnol i gynigion datblygu ymgorffori mesurau priodol i warchod amwynder eiddo cyfagos neu gerllaw. Gall mesurau o'r fath gynnwys nodi clustogfeydd a chynigion tirlunio addas.

11.156 Lle y bo'n briodol, bydd amodau cynllunio'n cael eu gosod i atal cyflogaeth rhag cael ei cholli fel y prif ddefnydd.

11.157 Ni fydd cynigion sy'n ceisio estyn a/neu ddwysáu defnydd neu weithgaredd yn cael ystyriaeth ffafriol os nad ydynt yn gydnaws â defnyddiau o'u hamgylch, neu os ydynt yn debygol o arwain at faterion sy'n niweidiol i amwynder a fyddai'n peryglu cynigion ailddatblygu eraill.

11.158 Gall datblygiadau priodol i ehangu busnesau presennol gyfrannu'n sylweddol at yr economi leol, a bydd cefnogaeth i ailddatblygu safleoedd presennol lle bydd yn gwella ansawdd arwynebedd llawr cyflogaeth yn enwedig i ddiwallu anghenion cyflogaeth modern.

11.159 Mae'r polisi hwn yn gwneud darpariaethau ar gyfer, ac yn cefnogi, yr economi wledig a chynigion priodol i ehangu mentrau gwledig sefydledig.^[11] Dylid cyfeirio hefyd at PCC a TAN23 Datblygu Economaidd.

11.160 Mae'r cyfanswm yn y tabl uchod yn cynnwys ffigyrau tybiannol ar gyfer cyflogaeth defnydd B ar safleoedd Defnydd Cymysg (Polisi SG1) a safleoedd Strategol (Polisi SP5).

11.161 Lle y bo'n briodol bydd defnyddiau cyflogaeth ac atodol eraill yn cael eu caniatáu ar safleoedd cyflogaeth dyranedig lle mae'r datblygiad arfaethedig yn ategu ac yn gwella rôl y safle fel a nodir yn y tabl Dyrannu Safleoedd Cyflogaeth.

11.162 Mae Polisi EME3 hefyd yn ei gwneud yn bosibl darparu defnyddiau cyflogaeth atodol sydd y tu allan i'r dosbarthiadau defnydd B lle mae hyn yn gwella hyfywedd y safle ac yn ei gwneud yn bosibl datblygu safleoedd newydd. Mae defnyddiau atodol a allai fod yn ategol yn cynnwys meithrinfeydd dydd, canolfannau hyfforddi, ailgylchu gwastraff ac atgyweirio cerbydau. Bydd defnyddiau manwerthu'n cael eu hystyried yn erbyn polisïau manwerthu'r CDLl.

11.163 Mae'n amlwg na fydd safleoedd cyflogaeth dyranedig yn briodol ar gyfer pob cynnig cyflogaeth. Felly mae Polisi EME4 yn cefnogi'r economi trwy ei gwneud yn bosibl, mewn ardaloedd trefol a gwledig, darparu cyfleoedd economaidd ar safleoedd heb eu dyrannu.

11.164 O fewn terfynau datblygu aneddiadau diffiniedig, mae'r polisi'n ei gwneud yn ofynnol i gynigion ddangos eu gofyniad lleoliadol trwy ddull dilyniannol o ddethol safleoedd. Yn y lle cyntaf, rhaid iddynt ystyried dyraniadau arfaethedig a phresennol i ddiwallu'r angen o ran cyflogaeth. Dim ond wedyn y dylid ystyried safleoedd heb eu dyrannu.

11.165 Ar gyfer cynigion y tu allan i derfynau datblygu anheddiad diffiniedig, rhaid iddynt ddangos eu bod yn uniongyrchol gysylltiedig ag anheddiad neu bentrefan, neu'n cael eu hategu gan achos busnes sy'n cyfiawnhau eu lleoliad. Mae'r Cynllun yn cydnabod bod gan fentrau ar raddfa fach rôl hanfodol yn yr economi wledig, a'u bod yn cyfrannu at gystadleurwydd a ffyniant lleol a chenedlaethol. Gall nifer o weithgareddau masnachol a gweithgynhyrchu ysgafn gael eu lleoli'n briodol mewn ardaloedd gwledig heb darfu mewn modd annerbyniol neu achosi unrhyw effeithiau niweidiol eraill. Yn hyn o beth, byddai datblygu busnesau bach yn mynd i'r afael ag unrhyw angen lleol am adeiladau cyflogaeth.

11.166 Cyfeirir at bolisïau RD3 Arallgyfeirio ar Ffermydd, RD4 Addasu ac Ailddefnyddio Adeiladau Gwledig ar gyfer Defnydd Dibreswyl ac EME5 Gweithio Gartref i gael gwybodaeth am gyfleoedd pellach ar gyfer ymgymeriadau cyflogaeth y tu allan i derfynau datblygu.

11.167 Mae'r polisi'n ymwneud â busnesau bach sy'n gweithredu gartref gan ddarparu ar gyfer ystyriaethau sy'n deillio o'r duedd gynyddol ar gyfer gweithio gartref (yn awr ac yn y dyfodol).

11.168 Mae'r Cynllun hwn yn cydnabod y gall busnesau o'r fath fod â rôl bwysig o ran datblygu a chefnogi economi amrywiol ledled ardal y Cynllun. Cydnabyddir bod nifer o fusnesau bach yn cael eu dechrau gan unigolion sy'n gweithio yn eu cartrefi eu hunain, a bod achosion o'r fath yn debygol o gynyddu wrth i arloesi technolegol gynyddu. Wrth ystyried gweithio gartref yng nghyd-destun cynllunio, cydnabyddir nad yw'n ofynnol cael caniatâd cynllunio o anghenraid. Er enghraifft, ni fydd caniatâd cynllunio'n ofynnol fel arfer lle nad yw defnydd arfaethedig o ran o'r tŷ at ddibenion busnes yn achosi newid i gymeriad cyffredinol yr eiddo a'i ddefnydd fel annedd.

11.169 Ar y cyfan mae'r gofyniad am ganiatâd cynllunio'n deillio lle mae'r gweithgaredd busnes yn peidio â bod yn atodol i'w ddefnydd fel annedd neu lle mae cymeriad preswyl yr eiddo'n cael ei addasu. Lle mae busnesau o'r fath ar raddfa a dwyster sy'n golygu y byddai caniatâd cynllunio'n ofynnol, bydd y Cyngor yn rhoi ystyriaeth i oblygiadau'r cynnig ar gyfer eiddo cyfagos ac ar gyfer y trefniadau mynediad a pharcio tebygol a fyddai'n deillio o natur y cynnig.

11.170 Mae PCC yn rhoi anogaeth i dyfu hunangyflogaeth a microfusnesau mewn ardaloedd gwledig. Mae'r polisi'n ceisio mabwysiadu ymagwedd gefnogol tuag at weithio gartref a chynigion lle mae'n ofynnol cael caniatâd cynllunio (gan gynnwys newid defnydd).

11.171 Wrth ystyried cynigion ar gyfer mentrau gwledig dylid rhoi ystyriaeth i ddarpariaethau polisi cenedlaethol ar ffurf PCC a TAN6 a Pholisi EME4.

11.172 Mae gan y Gymraeg a diwylliant Cymru rôl bwysig ym mywyd cymdeithasol, diwylliannol ac economaidd preswylwyr ag ymwelwyr â Sir Gaerfyrddin. Mae cyfran y siaradwyr Cymraeg yn Sir Gaerfyrddin yn sylweddol uwch na chyfartaledd cenedlaethol Cymru a chan hynny mae'n rhan arwyddocaol o wead cymdeithasol cymunedau'r Sir, gan ddarparu ymdeimlad cryf o le a hunaniaeth.

11.173 Ystyrir bod Sir Gaerfyrddin yn ei chyfanrwydd yn ardal o sensitifrwydd ieithyddol. Mae Cyfrifiad 2011 yn dynodi bod 19.0% o boblogaeth Cymru'n gallu siarad Cymraeg, tra bo'r ffigwr cyfatebol yn Sir Gaerfyrddin yn 43.9%. O ran dadansoddiad daearyddol o gyfran y siaradwyr ledled y Sir, mae ar ei hisaf yn ward etholiadol Glan-y-môr lle mae 19.2% yn siarad Cymraeg, ac ar ei huchaf yn Chwarter Bach lle mae 68.7% yn siarad Cymraeg. Mae cyfran y siaradwyr Cymraeg yn uwch na'r cyfartaledd cenedlaethol ar draws pob ward yn y Sir, ac am y rheswm hwn yn bennaf y mae Sir Gaerfyrddin yn ei chyfanrwydd yn cael ei hystyried yn sensitif yn ieithyddol. Hefyd, mae data'r Cyfrifiad diwethaf wedi dangos gostyngiad sylweddol yn nifer y siaradwyr Cymraeg ledled y Sir sy'n dangos natur fregus yr iaith yn Sir Gaerfyrddin.

11.174 Mae'r Cynllun yn ceisio 'hyrwyddo'r Gymraeg a diwylliant Cymru^[12] ac mae'n cynnwys ymrwymiad i gyfrannu at nod hirdymor Llywodraeth Cymru i gyrraedd miliwn o siaradwyr Cymraeg erbyn 2050^[13]. I gyrraedd y nod hwn bydd y Cyngor yn cefnogi, hyrwyddo a gwella'r Gymraeg fel iaith gymunedol hyfyw trwy sicrhau bod cyfleoedd cyflogaeth a thai digonol a chymesur i gynnal cymunedau gwledig a threfol yn y Sir a thrwy roi fframwaith monitro effeithiol ar waith. Wrth wneud hynny, mae'r Cynllun yn ceisio sicrhau bod y boblogaeth leol yn cael y cyfle i aros yn Sir Gaerfyrddin yn hytrach na gadael i chwilio am gyfleoedd gwaith a thai, yn ogystal â'r cyfle i ddychwelyd. Trwy amcanu at dwf cynaliadwy, bydd y Cynllun hefyd yn cynyddu i'r eithaf y cyfleoedd i siaradwyr di-Gymraeg sy'n symud i mewn i'r Sir gael eu hintegreiddio i fywyd cymunedol ar raddfa a chyflymder na fydd yn tanseilio bywiogrwydd a hyfywedd y Gymraeg a diwylliant Cymru.

11.175 Mae'r angen i ddiogelu, hyrwyddo a gwella'r Gymraeg yn berthnasol i ddatblygiadau a gynigir ledled y Sir ac nid yw'n gyfyngedig i ardaloedd penodol yn y Sir. Bydd yn ofynnol i gynigion datblygu gydnabod statws swyddogol y Gymraeg ac ymrwymo i beidio â thrin y Gymraeg yn llai ffafriol na'r Saesneg.

11.176 Mae polisïau penodol yn darparu canllawiau pellach i sicrhau bod datblygiadau ar raddfa ac o fath a chymeriad priodol yn cael eu cyflawni i ddiwallu anghenion y cymunedau. Ar ben hynny, bydd y CDLl Diwygiedig yn ceisio sicrhau bod datblygu'n digwydd ar gyflymder sy'n golygu y gellir eu hamsugno a'u cymhathu heb niweidio cymeriad y gymuned.

11.177 Mae'r Cynllun hefyd yn ceisio diogelu, hyrwyddo a gwella'r Gymraeg yn Sir Gaerfyrddin trwy amcanion polisi perthnasol eraill, sef trwy ddarparu tai a thai fforddiadwy, hybu economi ffyniannus a chyfleoedd cyflogaeth a darparu a chadw cyfleusterau cymunedol, ymhlith eraill.

11.178 Mae'r Cynllun Gweithredu Iaith Gymraeg yn nodi'r mesurau a fydd yn cael eu cymryd i ddiogelu, hyrwyddo a gwella'r Gymraeg. Dylai'r Cynllun Gweithredu Iaith Gymraeg nodi hefyd sut y mae'r datblygiad yn cynnig gwneud cyfraniad cadarnhaol tuag at grwpiau iaith Gymraeg y gymuned. Gallai hyn, ymhlith mesurau eraill, gynnwys rhoi cymorth a chyllid i sefydliadau a chyrff sy'n darparu gweithgareddau, cyfleusterau ac addysg ar gyfer siaradwyr a dysgwyr Cymraeg, a chymorth a chyllid tuag at ddosbarthiadau Cymraeg. Bydd yn ofynnol bod Asesiadau o'r Effaith ar y Gymraeg yn nodi effeithiau disgwyliedig y datblygiad arfaethedig ar y Gymraeg yn y Sir. Mae canllawiau ynghylch sut i gynhyrchu Asesiad o'r Effaith ar y Gymraeg wedi'u cynnwys yn y Canllawiau Cynllunio Atodol ar y Gymraeg.^[14]

11.179 Er y gellir rhoi cymorth i brosiectau trwy gyfraniadau ariannol, gellir ei roi trwy ddulliau eraill hefyd. Bydd caniatâd cynllunio'n cael ei roi gydag amodau neu'n amodol ar gytundebau cyfreithiol i sicrhau bod y mesurau lliniaru a gwella a gynigir yn y Cynllun Gweithredu'n cael eu rhoi ar waith. Bydd canllawiau pellach ar gynnwys Cynlluniau Gweithredu Iaith Gymraeg yn cael eu darparu trwy Ganllawiau Cynllunio Atodol.

11.180 Mae dosbarthiad tai'r CDLl wedi'i nodi yn Atodiad 7 y Cynllun. Mae effeithiau graddfa, lleoliad a chyfradd datblygu wedi cael eu hasesu yn unol â'r dosbarthiad y cytunwyd arno. O ganlyniad nid yw cynigion ar gyfer datblygiadau nad ydynt yn gyson â graddfeydd amser y dosbarthiad yn cael eu hasesu'n llawn. Felly bydd angen i gynigion o'r fath gael eu hategu gan gynllun fesul cyfnod sy'n nodi nifer yr anheddau a fydd yn cael eu cyflawni ym mhob blwyddyn ariannol. Mewn achosion o'r fath, gellir rhoi caniatâd cynllunio gydag amod i sicrhau bod anheddau'n cael eu cyflawni yn unol â'r cynllun fesul cyfnod lle ystyrir bod hynny'n angenrheidiol.

11.181 I osgoi amheuaeth, dylid nodi y dylai meini prawf a, b, d ac e uchod gael eu goleuo gan hierarchaeth aneddiadau'r CDLl fel a nodir ym Mholisi SP16. Mae Strategaeth y Cynllun yn darparu ar gyfer twf organig ar raddfa fach yn y Pentrefi Gwledig. Ystyrir bod datblygiad bob yn dipyn ar y raddfa hon yn gallu gwneud cyfraniad cadarnhaol tuag at dwf cynaliadwy'r Gymraeg mewn cymunedau gwledig, a bod unrhyw effeithiau negyddol yn debygol o gael eu hamsugno gan y gymuned. Mae datblygiad ar unrhyw raddfa fwy yn annhebygol o fod yn gydnaws â Strategaeth y Cynllun, ac felly mae eu heffeithiau heb eu hasesu ac yn anhysbys. Os caiff cynigion o'r fath eu cyflwyno i gael eu hystyried, bydd angen cyflwyno asesiad llawn gyda hwy sy'n nodi eu heffeithiau tebygol ar y Gymraeg.

11.182 Mae'n ofynnol bod yr Arfarniad o Gynaliadwyedd/Asesiad Amgylcheddol Strategol ar gyfer y CDLl yn asesu effeithiau tebygol y CDLl ar y Gymraeg. Gwneir hyn yn ailadroddol ar adegau allweddol trwy gydol y broses o gynhyrchu'r Cynllun. Caiff yr effeithiau disgwyliedig tebygol eu cyflwyno yn yr adroddiadau ar yr Arfarniad o Gynaliadwyedd/Asesiad Amgylcheddol Strategol, ac mae rhagor o wybodaeth ar gael o fewn sail dystiolaeth y CDLl.

11.183 Mae'r CDLl yn darparu canllawiau pellach ynghylch darparu hysbysebion dwyieithog ym Mholisi PSD9 – Hysbysebion. Er mwyn hybu hunaniaeth ddiwylliannol ac i ddiogelu cymeriad ieithyddol lleol Sir Gaerfyrddin, bydd y Cyngor yn rhoi anogaeth i farchnata datblygiadau tai a masnachol newydd yn ddwyieithog yn ogystal a rhoi anogaeth i roi enwau Cymraeg i strydoedd a datblygiadau.

11.184 Mae darparu seilwaith, gwasanaethau a chyfleusterau'n hanfodol i sicrhau bod polisïau a chynigion y Cynllun yn cael eu cyflawni. Mae seilwaith priodol yn allweddol i hwyluso datblygu ond mae hefyd yn angenrheidiol i gefnogi anghenion a galwadau parhaus datblygiad a chymunedau Sir Gaerfyrddin.

11.185 Efallai y bydd amrywiaeth o seilwaith yn ofynnol, a bydd y rhain yn amrywio'n fawr yn ôl y natur neu fath, graddfa, lleoliad a darpariaeth bresennol o ran seilwaith. Wrth ystyried anghenion cynigion datblygu gall y seilwaith, gwasanaethau a chyfleusterau canlynol fod yn ofynnol:

• Ffyrdd a chyfleusterau trafnidiaeth eraill gan gynnwys trafnidiaeth gynaliadwy, trafnidiaeth gyhoeddus, llwybrau cerdded a beicio
• Ysgolion a chyfleusterau addysgol a hyfforddi eraill
• Tai Fforddiadwy
• Iechyd
• Mannau agored cyhoeddus a seilwaith gwyrdd
• Amddiffynfeydd rhag llifogydd
• Hamdden, chwaraeon ac adloniant
• Gwasanaethau cyfleustodau
• Bioamrywiaeth a diogelu a gwella'r amgylchedd
• Cyfleusterau cymunedol
• Seilwaith Digidol
• Cymorth ar gyfer y Gymraeg
• Cyfleusterau a gwasanaethau eraill yr ystyrir eu bod yn angenrheidiol

11.186 Mae'r Cynllun yn ceisio sicrhau bod y seilwaith, gwasanaethau a chyfleusterau y mae eu hangen i gefnogi datblygu'n cael eu cyflawni mewn modd amserol cyn dechrau, neu ar ôl dechrau'r datblygiad, neu lle y bo'n briodol yn cael eu cyflawni fesul cam trwy'r broses ddatblygu. Mae'r Cynllun yn rhoi anogaeth i gyflawni seilwaith mewn modd cydgysylltiedig gan darfu cyn lleied â phosibl ar gymunedau presennol.

11.187 Bydd cyfraniadau tuag at seilwaith yn cael eu sicrhau trwy amodau neu Rwymedigaethau Cynllunio yn unol â'r fframwaith deddfwriaethol a pholisi a ddarperir.^[15] Dylid cyfeirio at Bolisi INF1: Rhwymedigaethau Cynllunio.

11.188 Dylai datblygwyr ystyried Atodiad 7: Dosbarthiad Tai a'r dystiolaeth sy'n dod i'r amlwg ar weithredu a chyflawni sy'n darparu gwybodaeth ychwanegol mewn perthynas â gofynion safleoedd allweddol y CDLl o ran cyflawni a seilwaith. Dylid rhoi ystyriaeth hefyd i ofynion Polisi PSD2: Uwchgynllunio. Anogir datblygwyr i gychwyn deialog gynnar gyda'r Cyngor er mwyn adnabod y seilwaith sy'n ofynnol i gyflawni a chefnogi cynllun arfaethedig.

11.189 Bydd gofynion rhwymedigaethau cynllunio'n ystyried hyfywedd ariannol datblygiad arfaethedig. Mewn achosion lle ceir anghydfod ynghylch effeithiau'r gofynion ar hyfywedd ariannol y cynllun, bydd yn ofynnol i'r ymgeisydd dalu costau sicrhau arfarniad annibynnol o hyfywedd, a hwnnw'n cael ei gwblhau gan drydydd parti sy'n meddu ar gymwysterau a chymeradwyaeth addas.

11.190 Bydd y rhwymedigaethau cynllunio sy'n ofynnol yn cael eu hystyried fesul achos unigol yn amodol ar natur y cynnig a'r gofynion sy'n deillio ohono. Efallai y bydd achosion lle na ellir sicrhau'r holl rwymedigaethau gofynnol oherwydd eu heffaith ar hyfywedd ariannol y cynllun. Mewn achosion o'r fath, bydd angen i'r blaenoriaethau o ran seilwaith ar gyfer y safle hwnnw gael eu hadnabod. Er bod y blaenoriaethau'n gallu amrywio yn ôl anghenion penodol pob safle a'u cymunedau dylid nodi bod gofynion Polisi NE4 Datblygu o fewn Ardal CCA Caeau Mynydd Mawr yn cael eu blaenoriaethu uwchlaw'r holl gyfraniadau eraill mewn perthynas â safleoedd o fewn Ardal y CCA. Ym mhob achos arall, ystyrir yn gyffredinol mai'r flaenoriaeth i'r Awdurdod fydd darparu tai fforddiadwy ac yn y rhan fwyaf o achosion bydd eu darparu'n cael ei flaenoriaethu uwchlaw cyfraniadau eraill.

11.191 Caiff y cysylltiadau rhwng iechyd a llesiant a chynllunio eu hadlewyrchu mewn deddfwriaeth a pholisi cynllunio cenedlaethol. Yn hyn o beth mae PCC yn ceisio darparu fframwaith i gyflawni cyfres o Ganlyniadau Cenedlaethol Creu Lleoedd Cynaliadwy. Mae'r dull cyfannol hwn o gynllunio a dylunio datblygiadau a mannau'n adlewyrchu ffocws ar ganlyniadau cadarnhaol sy'n hybu ffyniant, iechyd, hapusrwydd a llesiant pobl. Mae hybu iechyd a llesiant corfforol a meddyliol fel Canlyniad Hwyluso Amgylcheddau Hygyrch ac Iach yn adlewyrchu'r cysylltiadau hyn rhwng iechyd, llesiant a chynllunio a'r angen i adlewyrchu unrhyw effeithiau posibl a all godi o'r broses gynllunio.

11.192 Gall Asesiad o'r Effaith ar Iechyd wneud cyfraniad gwerthfawr wrth gynnig neu wneud penderfyniadau ynghylch datblygiadau newydd. Gall tystiolaeth o'r effeithiau ar iechyd helpu'r system gynllunio i ddatblygu dulliau cryfach a mwy cydlynol o gynyddu iechyd a llesiant i'r eithaf^[16]. Mae Deddf Iechyd Cyhoeddus (Cymru) 2017 yn nodi darpariaethau ar gyfer gwneud gwelliannau i iechyd gan gynnwys bod Gweinidogion Cymru yn cyhoeddi strategaeth genedlaethol ar drechu gordewdra ac yn gwneud rheoliadau ynglŷn â chwblhau asesiadau o'r effaith ar iechyd gan gyrff cyhoeddus.

11.193 Mae Asesiadau o'r Effaith ar Iechyd yn asesu effaith unrhyw newid neu ddiwygiad i bolisi, gwasanaeth, cynllun, gweithdrefn neu raglen ar iechyd y boblogaeth ac ar ddosbarthiad yr effeithiau hynny o fewn y boblogaeth, yn enwedig o fewn grwpiau agored i niwed. Mae cynnal Asesiad o'r Effaith ar Iechyd yn cynhyrchu gwybodaeth am y modd y gellir lleihau effeithiau negyddol ar iechyd a rhoi anogaeth ar gyfer manteision i iechyd. Gall tystiolaeth o'r fath o effeithiau ar iechyd helpu'r system gynllunio i ddatblygu dulliau cryfach a mwy cydlynol o gynyddu iechyd a llesiant i'r eithaf.

11.194 Mae'n bwysig bod cynigion yn ystyried ystod eang o ffactorau sy'n gysylltiedig ag iechyd a llesiant fel rhan o lunio a pharatoi unrhyw gynllun neu ddatblygiad. Mae'n bwysig bod y rhain yn cael eu hystyried o'r dechrau un. O ganlyniad, anogir datblygwyr i ymgysylltu â'r awdurdod cynllunio lleol a rhanddeiliaid eraill, megis y Bwrdd Iechyd Lleol (BILl) mor gynnar â phosibl yn y broses o baratoi cynigion datblygu. Dylid darparu Asesiad o'r Effaith ar Iechyd gydag unrhyw gais ar gyfer mwyngloddio brig.

Cymunedau Iach: Rhestr Wirio Ddilyniannol ar gyfer Asesu'r Effaith ar Iechyd

11.195 I roi cymorth i hybu iechyd a llesiant corfforol a meddyliol, dylai'r dull dilyniannol canlynol gael ei ystyried gan ddatblygwyr i bennu'r gofyniad ar gyfer, a chwmpas a chynnwys posibl Asesiad o'r Effaith ar Iechyd. Mae'r gofyniad hwn yn berthnasol i ddatblygiadau mawr a ddiffinnir mewn deddfwriaeth cynllunio fel:

• Datblygiadau preswyl o 10 annedd neu fwy neu 0.5 hectar neu fwy;
• Darparu adeilad neu adeiladau lle mae'r arwynebedd llawr a fydd yn cael ei greu gan y datblygiad yn 1,000 metr sgwâr neu fwy; neu
• Datblygiad ar safle sydd ag arwynebedd o 1 hectar neu fwy

11.196 Mae'r dull dilyniannol canlynol o ystyried yr angen i gwblhau Asesiad o'r Effaith ar Iechyd yn adlewyrchu'r canllawiau a nodir yn Asesiadau o'r Effaith ar Iechyd – Canllaw Ymarferol^[17].

• CAM 1: Sgrinio – Mae penderfynu a ddylid cynnal Asesiad o'r Effaith ar Iechyd yn bwrw golwg gychwynnol ar effeithiau posibl y cynnig ar y boblogaeth leol ac unrhyw grwpiau agored i niwed penodol a ddiffiniwyd ynddi. Dylai amlygu unrhyw risgiau neu fanteision posibl i iechyd ac unrhyw grwpiau y gallai'r cynnig effeithio'n arbennig arnynt. Mae canlyniad y broses sgrinio'n benderfyniad a ddylid cynnal Asesiad o'r Effaith ar Iechyd ai peidio ac, os felly, pa fath o Asesiad o'r Effaith ar Iechyd sy'n ofynnol. Dylai hefyd ddarparu esboniad o'r modd y daethpwyd i'r penderfyniad.
• CAM 2: Ymarfer Cwmpasu – Pennu'r ffocws, dulliau a chynllun gwaith. Mae'r cam hwn yn golygu gofyn nifer o gwestiynau a gwneud nifer o benderfyniadau i gadarnhau'r amodau gorchwyl, rolau a chyfrifoldebau a'r cynllun y cytunwyd arno ar gyfer yr Asesiad o'r Effaith ar Iechyd.
• CAM 3: Arfarniad o'r Dystiolaeth – Adnabod yr effeithiau ar iechyd. Hwn yw'r cam allweddol yn yr asesiad o'r effaith ar iechyd. Y diben yw casglu gwybodaeth am natur, maint, tebygolrwydd a dosbarthiad posibl effeithiau'r cynnig ar iechyd. Mae hefyd yn gyfle i awgrymu ffyrdd posibl o gynyddu i'r eithaf y manteision i iechyd a lleihau'r risgiau i'r eithaf, yn enwedig i'r rhai sydd â'r iechyd mwyaf bregus o bosibl neu'r grwpiau mwyaf difreintiedig yn y boblogaeth. Mae hefyd yn gyfle i adnabod ac awgrymu camau gweithredu a allai fynd i'r afael â 'bylchau' yn y cynnig neu'r cynllun.

Er nad yw Asesiad o'r Effaith ar Iechyd ynddo'i hun yn ddull ymchwil, mae'n tynnu ar ystod o ffynonellau gwybodaeth a dulliau o gasglu a dadansoddi data, y bydd rheolau a gweithdrefnau methodolegol priodol yn berthnasol iddynt.

• CAM 4: Adrodd ac Argymhellion – Unwaith y mae'r dystiolaeth a'r data wedi cael eu casglu, dylid datblygu set o argymhellion, a'r rheiny wedi'u goleuo gan gamau blaenorol yr Asesiad o'r Effaith ar Iechyd. Dylai'r argymhellion hyn amcanu at gynyddu i'r eithaf unrhyw fanteision posibl i iechyd a llesiant a lliniaru effeithiau negyddol posibl. Gallant fod yn gyfle i 'lenwi' unrhyw fylchau a ganfuwyd yn y cynnig a mynd i'r afael o'r newydd ag unrhyw anghydraddoldebau iechyd (neu eraill) a all gael eu hachosi.

Mae angen i argymhellion fod:

• Yn eglur a chryno
• Yn realistig
• Yn rhai y gellir eu cyflawni
• Yn hydrin o ran eu nifer
• Yn ddiduedd
• Yn rhai sy'n adlewyrchu'r holl dystiolaeth a barn yr holl gynrychiolwyr
• Yn rhai y cytunwyd arnynt drwy gonsensws

Dylid cyfeirio at ganllawiau ar ffurf CCA.

Ni fydd yr holl faterion sy'n ymwneud ag iechyd a llesiant yn berthnasol i bob math o ddatblygiad ac mae'r Cyngor yn cydnabod yr angen am ddull cytbwys o benderfynu ynghylch cynigion datblygu lle mae materion sy'n gysylltiedig ag iechyd yn un o nifer o ystyriaethau perthnasol. Bydd disgwyl i ddatblygwyr ddefnyddio'r dull dilyniannol a nodir uchod i nodi'r hyn sy'n berthnasol a sicrhau ei fod yn cael ei gynnwys yn y ddogfennaeth ategol a anfonir gydag unrhyw gynnig fel y bo'n briodol.

11.197 Mae'r polisi'n ceisio adlewyrchu galwadau Cymru fodern ar gyfer rhwydweithiau cyfathrebu cyflym a chapasiti uchel dibynadwy. Yn hyn o beth mae'n ategu amcan Llywodraeth Cymru i gynnig band eang cyflym a dibynadwy i bob eiddo yng Nghymru ac i roi cymorth i roi seilwaith symudol ar waith ledled y wlad^[18]. Mae'n ceisio adlewyrchu cyd-destun seilwaith band eang fel gwasanaeth hanfodol ac un a all helpu i gefnogi a datblygu'r economi leol yn ogystal â chymunedau ffyniannus a chynhwysol.

11.198 Wrth roi'r polisi ar waith, dylid nodi bod BT Openreach a darparwyr eraill yn cynnig cyswllt band eang cyflym iawn ar gyfer pob datblygiad newydd, naill ai'n rhad ac am ddim, neu fel rhan o bartneriaeth a ariennir ar y cyd gan gynnwys partneriaethau a ariennir gan gymunedau. Bydd FTTP yn cael ei ddarparu'n rhad ac am ddim ar gyfer datblygiadau tai â chant neu fwy o anheddau. Efallai y bydd rhaid i ddatblygiadau llai na hyn ddarparu cyfraniadau i sicrhau cyswllt FTTP, neu efallai y byddant yn cael cysylltiadau copr am ddim.

11.199 Wrth roi cymorth i gyflawni ffeibr llawn, mae BT Openreach wedi pennu targedau ledled y DU, ac maent yn rhoi arweiniad a chymorth i ddatblygwyr ynghylch adeiladu rhwydweithiau FTTP llawn ar safleoedd preswyl neu breswyl/masnachol cymysg newydd.

11.200 Mae'r polisi hefyd yn cydnabod, mewn cyfran fach o achosion, na fydd yn bosibl darparu band eang ar gyfer datblygiadau newydd oherwydd eu lleoliad gwledig iawn. Felly mae'r polisi'n cynnwys y potensial i ddarparu swm o arian i gyfrannu tuag at ddatrysiad arall. Fodd bynnag, lle bynnag y bo'n bosibl dylai'r datrysiad gynnwys bod y datblygiad yn trefnu darpariaeth angenrheidiol ar gyfer seilwaith ar y safle i hwyluso'r gwelliannau.

11.201 Bydd darparu band eang cyflym iawn a dibynadwy mewn ardaloedd gwledig o gymorth i gyflawni strategaeth y Cynllun trwy ddarparu cyfleoedd ychwanegol i hybu'r economi wledig ac arallgyfeirio economaidd.

11.202 Yn nalgylch Gwaith Trin Dŵr Gwastraff (GTDG) Llanelli, ceir pryderon bod cysylltu llifoedd dŵr budr a gaiff eu creu gan ddatblygiadau newydd yn cyflwyno risg o ddirywiad yn ansawdd dŵr Safle Morol Ewropeaidd Bae ac Aberoedd Caerfyrddin (SMEBAC). Y rheswm dros hyn yw bod y mwyafrif o'r system garthffosiaeth yn ardal GTDG Llanelli yn gyfunol (dŵr wyneb a llifoedd dŵr budr).

11.203 Er bod Dŵr Cymru Welsh Water (DCWW) wedi cadarnhau bod digon o gapasiti yn GTDG Llanelli i gyflawni'r twf a nodir yn y Cynllun hwn, maent hefyd wedi gofyn am wneud datblygiadau perthnasol yn nalgylch GTDG Llanelli yn ddarostyngedig i ofyniad i gymryd mesur cydbwyso i dynnu dŵr gwastraff o'r system fel rhan o roi caniatâd cynllunio.

11.204 Ceir pryder bod cyflwyno llif dŵr budr ychwanegol yn gallu arwain at orlwytho GTDG Llanelli, yn ogystal â chynyddu amlder gollyngiadau o orlifoedd carthffosiaeth storm allan i SMEBAC yn ystod glaw sylweddol. Gall fod potensial ar gyfer problemau llifogydd lleol posibl o ganlyniad i'r materion hyn hefyd.

11.205 Paratowyd CCA Cilfach Porth Tywyn i ddarparu canllawiau penodol ynghylch ystyried cynigion datblygu perthnasol sydd wedi'u lleoli yn nalgylch GTDG Llanelli. Er bod Llanelli (Prif Ganolfan) a Phorth Tywyn (Canolfan Wasanaethau) wedi'u hadnabod fel ffocws ar gyfer twf yn y Cynllun hwn, maent hefyd yn ddarostyngedig i ystyriaethau amgylcheddol lefel uchel, yn anad dim ansawdd dŵr SMEBAC. Gellir cyfeirio hefyd at bolisi CCH3 yn y CDLl: Ansawdd Dŵr a Diogelu Adnoddau Dŵr.

11.206 Mae CCA Cilfach Porth Tywyn wedi'u seilio ar gonsensws ac yn ceisio darparu sicrwydd ar gyfer rhanddeiliaid a datblygwyr fel ei gilydd. Eu prif swyddogaeth yw rhoi cymorth i gyflawni twf fel a nodir yn y Cynllun hwn. Maent yn darparu mecanwaith ar gyfer y gofyniad i ddatblygiadau perthnasol gymryd mesurau cydbwyso i dynnu dŵr wyneb. Mae hyn wedi'i fwriadu i alluogi datblygiadau i gyfrannu tuag at wella'r sefyllfa ar y cyfan, gan leddfu pryderon y bydd cynigion yn cael eu gwrthwynebu gan randdeiliaid allweddol – yn anad neb DCWW a Cyfoeth Naturiol Cymru.

11.207 Ceir dull partneriaeth sydd wedi hen ennill ei blwyf mewn perthynas â'r mater hwn, gan gynnwys Memorandwm Cyd-ddealltwriaeth.

11.208 Mae'r CCA hefyd yn rhoi eglurhad ar achosion pan mai Cyngor Sir Caerfyrddin yw'r ymgeisydd a'i fod yn ceisio defnyddio gwelliant dros ben y mae wedi'i gronni'n flaenorol ar y gofrestr tynnu dŵr wyneb.

11.209 I ystyried y ddarpariaeth ar gyfer Sipsiwn a Theithwyr yn y dyfodol yn Sir Gaerfyrddin, mae'r Cyngor Sir wedi cwblhau dau Asesiad o Anghenion Llety Sipsiwn a Theithwyr (ALlSaTh) sy'n nodi'r angen cyfredol sydd heb ei ddiwallu am leiniau ar gyfer Sipsiwn a Theithwyr yn y Sir. Gaeth yr Asesiad gwreiddiol ei gwblhau yn 2015 er mwyn ymhél a'r cyfnod hyd at 2031. Mae'r diweddariad yn 2019 yn sicrhau fod y Cynllun yn briodol o rhan anghenion Sipsiwn a Theithwyr am y cyfnod hyd at 2033.

11.210 Gwnaeth yr Asesiadau ystyried y fethodoleg a nodir yng Nghanllawiau Llywodraeth Cymru ac mae'n nodi dau fath o asesiad o anghenion; mae'r cyntaf yn ystyried 5 mlynedd gyntaf cyfnod yr ALlSaTh; ac mae'r ail yn ystyried cyfnod yr ALlSaTh o 15 mlynedd yn ei gyfanrwydd.

11.211 Yn seiliedig ar asesiad Sipsiwn a Theithwyr 2019, yr angen cyfredol sydd heb ei ddiwallu 19 llain, tra bod amcangyfrif angen am 23 llain bellach am y 5 mlynedd cyntaf. Mae cyfran fawr o'r angen hwn wedi codi o aelwydydd sy'n byw mewn llety brics a morter, a thwf aelwydydd newydd o'r aelwydydd hyn. Mae cyfansoddiad yr angen hwn wedi'i leoli yn Llanelli, lle'r oedd nifer fawr o'r aelwydydd hyn wedi byw'n flaenorol ar y safle cyhoeddus ym Mhenybryn.

11.212 Gwnaed amcangyfrif hefyd ar gyfer aelwydydd Sipsiwn a Theithwyr newydd sy'n codi ym mlynyddoedd 6-15 o'r ALlSaTh. Byddai hyn yn cynnwys, er enghraifft, oedolion ifainc sy'n byw ar safleoedd presennol a fydd, ymhen amser, yn ffurfio'u haelwyd eu hunain ac felly y byddai angen eu llain eu hunain arnynt. Mae'r ALlSaTh yn amcangyfrif angen am 8 llain bellach ym mlynyddoedd 6-15, sy'n rhoi cyfanswm gofyniad o 31 o leiniau hyd at 2033.

11.213 Gwnaeth yr ALlSaTh fwrw golwg ar anghenion llety Sioemyn Teithiol yn Sir Gaerfyrddin hefyd. Canfu'r elfen hon o'r asesiad 9 llain awdurdodedig neu a oddefir ar gyfer Sioemyn Teithiol yn y sir. Wrth ystyried y rhagamcaniad ar gyfer y dyfodol, mae asesiad 2019 yn nodi gofyniad o 4 llain ychwanegol ym mhum mlynedd gyntaf yr asesiad.

11.214 Bydd y gofyniad am leiniau a'r defnydd ohonynt yn cael eu monitro fel rhan o fframwaith monitro'r cynllun hwn hefyd a byddir yn adrodd ar hynny trwy drefniadau'r Adroddiad Monitro Blynyddol.

11.215 Mae'r polisi'n darparu'r fframwaith a'r cyd-destun ar gyfer ystyried ac asesu cynigion ar gyfer safleoedd newydd, ac estyniadau i safleoedd Sipsiwn a Theithwyr (ac ar gyfer Sioemyn Teithiol) gan adlewyrchu'r darpariaethau a ddiffinnir mewn deddfwriaeth sylfaenol^[19].

11.216 Bydd yn ofynnol bod dyluniad unrhyw safleoedd yn rhoi ystyriaeth i ddarpariaethau'r Canllawiau Dylunio priodol gan Lywodraeth Cymru^[20].

11.217 Bydd y canllawiau hyn yn ystyriaeth berthnasol wrth benderfynu ynghylch unrhyw geisiadau cynllunio a gyflwynir. Mewn perthynas ag unrhyw safle a ddatblygir gan gorff cyhoeddus, gan gynnwys yr awdurdod lleol, bydd darpariaethau Canllawiau Llywodraeth Cymru: Dylunio Safleoedd Sipsiwn a Theithwyr yn berthnasol.

11.218 Rhaid i gynigion ystyried mynediad ar gyfer cerbydau o'r briffordd gyhoeddus; yn ogystal â darpariaeth ar gyfer parcio, troi a gwasanaethau ar y safle; a diogelwch ar y ffyrdd ar gyfer meddianwyr ac ymwelwyr.

11.219 Dylid gwneud gwaith tirlunio a phlannu coed a llwyni priodol er mwyn i safleoedd gydblethu â'u hamgylchoedd, rhoi strwythur a phreifatrwydd, a chynnal amwynder gweledol. Dylid osgoi tirlunio caled, waliau uchel, neu ffensys gormodol gan bod y rhain yn gallu ynysu safle oddi wrth y gymuned ehangach.

11.220 Bydd angen i gynigion roi sylw i seilwaith lleol a dangos bod y safle'n gallu darparu digon o gyfleusterau a mynediad at gyfleustodau. Dylai graddfa cynigion fod yn gymesur â'u hamgylchoedd ac â'r gymuned leol. Dylid ceisio arweiniad pellach o Ganllawiau Llywodraeth Cymru ynghylch Dylunio Safleoedd Sipsiwn a Theithwyr.

11.221 Bydd disgwyl i geisiadau gynnwys tystiolaeth i ddangos bod y safle newydd neu'r estyniad i safle presennol yn ofynnol yn y lleoliad hwnnw. Dylai gwybodaeth o'r fath gynnwys tystiolaeth sy'n dangos diffyg argaeledd lleiniau parhaol neu dramwy addas ar safleoedd presennol, neu gyfle i estyn y safleoedd hynny i ddiwallu'r angen gofynnol.

11.222 Gwnaeth yr Asesiadau Llety Sipsiwn a Theithwyr (ALlSaTh) 2015 a 2019 asesu'r angen am safleoedd tramwy neu fannau aros brys ar gyfer y Gymuned Deithiol sydd naill ai'n teithio'n barhaol neu'n teithio am ran o'r flwyddyn. Gwnaeth yr asesiadau geisio dadansoddi cofnodion o safleoedd a gwersylloedd anawdurdodedig a chafodd data o'r Cyfrifiad Carafanau Teithwyr ei ystyried hefyd. Dangosodd dadansoddiad fod nifer cofnodedig y carafanau awdurdodedig ac anawdurdodedig yn Sir Gaerfyrddin wedi gostwng.

11.223 Cyflwynodd Llywodraeth Cymru fecanwaith monitro newydd i dracio a canfod gwersylloedd tramwy anghyfreithlon. Gwnaeth AMB 2018/19 nodi nifer o wersylloedd anghyfreithlon, ond nid oedd yr un ohonynt ar ddibenion tramwy. O ganlyniad nid yw'r data'n dynodi unrhyw batrwm eglur eto sy'n golygu ei bod yn ofynnol ymyrryd trwy adnabod safle tramwy. Dylid cyfeirio at fframwaith monitro'r cynllun.

11.224 Mewn perthynas â'r anghenion sy'n codi ar gyfer Sioemyn Teithiol fel a ddynodir trwy'r ALlSaTh, ar hyn o bryd nid oes cydberthynas ofodol â'r angen hwnnw a fyddai'n ei gwneud yn bosibl adnabod safle mewn lleoliad addas. Mae'r cynllun yn ceisio darparu'r hyblygrwydd priodol i ddiwallu'r angen hwnnw trwy ddarpariaethau'r polisi uchod a chyswllt â'r gymuned i adnabod unrhyw angen lleoliadol penodol.

11.225 Mae twristiaeth yn elfen allweddol o economi Sir Gaerfyrddin. Mae'n brif ffynhonnell cyflogaeth a refeniw sy'n cefnogi dros 6,176 o swyddi cyfwerth ag amser llawn naill ai'n uniongyrchol neu'n anuniongyrchol. Mae'n creu refeniw o fwy na £441m i economi'r Sir yn flynyddol.^[21]

11.226 Mae'r Sir yn gartref i ystod eang o atyniadau, gan gynnwys Cae Ras Ffos Las, yr Ardd Fotaneg Genedlaethol a Pharc Gwledig Pen-bre. Sir Gaerfyrddin yw "canolbwynt beicio Cymru", gyda'r Strategaeth Feicio'n cyfleu dyheadau'r Cyngor i fod ar flaen y gad yn genedlaethol o ran darparu seilwaith a digwyddiadau beicio a datblygu beicio.^[22]

11.227 Mae twristiaeth yn ddiwydiant deinamig a chanddo ddemograffig / sylfaen cwsmeriaid eang. Mae Sir Gaerfyrddin mewn sefyllfa dda i fanteisio ar botensial y sector o ystyried ei bod yn sir hardd sydd wedi'i lleoli o fewn pedair awr yn y car i Lundain ac o fewn cyrraedd rhwydd i Iwerddon mewn llong. Fodd bynnag, mae'r galwadau a'r tueddiadau bythol newidiol yn y sector yn darparu heriau o ran drafftio polisïau cynllunio defnydd tir dros 15 mlynedd. Mae'r arlwy dwristiaeth yn Sir Gaerfyrddin yn amrywio o'r nodweddion naturiol hynny megis hawliau tramwy / cerdded i atyniadau cenedlaethol uchel eu bri sydd wedi hen ennill eu plwyf. Mae twristiaeth treftadaeth a gweithgareddau'r Sir yn uchel ei bri, tra gallai ei hamgylchedd naturiol neilltuol apelio at y sector twristiaeth iechyd.

11.228 Mae SP10 yn pennu'r fframwaith ar gyfer dull polisi o fewn y CDLl Diwygiedig sy'n ddigon ymatebol a hyblyg i alw'r farchnad hyd at 2033, gan hefyd geisio gwarchod yr union gymunedau, tirwedd a threflun sy'n gwneud Sir Gaerfyrddin yn lle gwych i ymweld ag ef ac i'w fwynhau. Tra bo'r polisi strategol yn darparu'r cyd-destun trosfwaol, mae polisïau penodol yn darparu manylder. Mae hyn yn cynnwys egluro unrhyw rôl sydd gan derfynau anheddu aneddiadau diffiniedig o ran goleuo penderfyniadau ynghylch cynigion.

11.229 Wrth ddehongli SP10, dylid nodi bod datblygiadau sy'n gysylltiedig â thwristiaeth yn cynnwys cyfleusterau newydd, yn ogystal ag estyniadau i gyfleusterau presennol.

11.230 Dylai estyniadau i gyfleusterau presennol fod yn israddol o ran graddfa a swyddogaeth i'r cyfleuster presennol a dylai cynigion sy'n gyfystyr ag estyniadau sylweddol gael eu hystyried yn ddatblygiadau newydd.

Ychwanegu Gwerth

11.231 Gall cynigion ychwanegu gwerth at economi ymwelwyr y Sir trwy gyfrannu at greu arlwy cyrchfannau a llety o ansawdd da trwy gydol y flwyddyn. Gallai manteision economaidd amrywio o gynnydd yn nifer yr ymwelwyr a diwrnodau ymwelwyr i greu swyddi, gan gyfrannu at gymysgedd ehangach o fathau o lety ac atyniadau – yn ogystal ag estyn y tymor twristiaeth y tu hwnt i fisoedd yr haf. Mae cyfleoedd i gynigwyr geisio alinio â'r blaenoriaethau corfforaethol hynny sy'n dod i'r amlwg a'u cefnogi, gan gynnwys dyheadau beicio'r Cyngor. Derbynnir y bydd gwerth ychwanegol yn gymesur â graddfa a natur y cynnig. Mae cynigion sy'n cyfrannu at ddatblygu rhwydwaith ehangach o atyniadau o fewn y Sir, gan felly gynyddu'r arlwy a'r cyfnod aros/gwario ar y cyfan, yn cynnig potensial amlwg i ychwanegu gwerth.

Parchu gwead cymdeithasol, economaidd ac amgylcheddol y Sir

11.232 Mae pob rhan o'r Sir yn meddu ar nodweddion sy'n cyfrannu at yr ymdeimlad cyffredinol o le. Mae'r rhain yn cynnwys tirwedd, cadwraeth natur, gwead cymdeithasol a'r amgylchedd adeiledig. Mae'r rhain yn asedau y mae'n rhaid eu gwarchod ar gyfer cenedlaethau'r dyfodol ac ni allant gael eu peryglu'n ormodol gan ddatblygiadau sy'n gysylltiedig â thwristiaeth.

11.233 Dylai fod pwyslais hefyd ar ansawdd da ym mhob agwedd ar gynigion, yn enwedig dylunio. Wrth ystyried derbynioldeb cynigion, bydd ystyriaeth yn cael ei rhoi i leoliad y safle, lleoliad adeiladau ar y safle, dyluniad a graddfa, mynediad at y prif rwydwaith priffyrdd a'r rhwydwaith priffyrdd craidd ac effaith unrhyw draffig a gaiff ei greu o ganlyniad. Ar ben hynny, mae i ba raddau y gall y safle gael ei wasanaethu gan drafnidiaeth gyhoeddus a llwybrau cerdded a beicio yn ystyriaethau pwysig. Bydd graddfa a maint unrhyw gynigion yn ogystal â'u math yn cael eu harfarnu ochr yn ochr â'u lleoli a'u heffaith. Dylai cynigion adlewyrchu cymeriad ac ymddangosiad yr ardal gyda thirlunio a sgrinio priodol yn cael eu defnyddio fel y bo'n ofynnol.

Lleoliad cynaliadwy

11.234 Wrth gydnabod galw'r farchnad, dylai datblygiadau sy'n gysylltiedig â thwristiaeth gael eu cyfeirio at leoliadau cynaliadwy. Cyfeirir at yr Hierarchaeth Trafnidiaeth Gynaliadwy ar gyfer Cynllunio^[23]. Dylid rhoi sylw i strategaeth ofodol y CDLl wrth benderfynu ynghylch priodoldeb unrhyw leoliad. Yn hyn o beth bydd graddfa a natur y cynnig yn ystyriaethau pwysig, ac felly hefyd lleoliad adeiladau ar y safle, priodoldeb y cynnig a'i gyd-destun gofodol. Mae'r polisïau penodol yn darparu canllawiau pellach ynghylch rhoi'r dull gofodol hwn ar waith.

11.235 Dylai cynigion sy'n gysylltiedig â thwristiaid adlewyrchu cymeriad yr ardal a'r effeithiau ar gyffiniau'r safle fel rhan o ddull creu lleoedd. Dylai cydnabyddiaeth i'r ymdeimlad o le yng nghyffiniau'r cynnig fod yn ymhlyg yng nghyd-destun y dull seiliedig ar glystyrau sy'n grwpio'r fframwaith aneddiadau. Mewn termau gofodol byddai hyn yn dynodi bod y cynigion twristiaeth hynny ar raddfa fwy sy'n creu nifer o deithiau yn benthyca'u hunain i gael eu lleoli yn ne'r Sir lle mae'r seilwaith yn ei le i'w cefnogi.

11.236 Wrth nodi'r arlwy sefydledig sy'n arfordirol yn bennaf ac sy'n nodweddu de-orllewin y Sir, bydd angen rhoi sylw dyledus i unrhyw effaith ar y dirwedd sy'n deillio o unrhyw botensial ar gyfer gor-ddwysáu defnyddiau.

11.237 Mae ardaloedd gwledig y Sir mewn sefyllfa dda i dderbyn cynigion ar gyfer datblygiadau cynaliadwy ac o ansawdd da sydd ar raddfa briodol. Dylai cynigion barchu asedau'r Sir gan gefnogi cymunedau gwledig ffyniannus.

11.238 Rhaid i rai datblygiadau sy'n gysylltiedig â thwristiaeth, yn ôl eu hunion natur, gael eu lleoli yng nghefn gwlad. Mae'n bwysig nad yw'r datblygiadau hyn yn cael unrhyw effaith negyddol sylweddol ar y dirwedd, yr amgylchedd naturiol nac amwynder. O ran y polisïau manwl ar gyfer y CDLl Diwygiedig, mae'r pwyslais ar egluro'r 2 her a chyfle nodedig sy'n wynebu'r economi ymwelwyr yn Sir Gaerfyrddin sef atyniadau (rhywle i fynd) a llety (rhywle i aros).

11.239 Mae'r polisi hwn yn cydnabod y cyfleoedd economaidd a gynigir gan y sector twristiaeth ond mae hefyd yn pwysleisio pwysigrwydd cynnal cyfanrwydd cymdeithasol, economaidd ac amgylcheddol y Sir. Ni ddylai fod unrhyw niwed cymdeithasol, economaidd ac amgylcheddol o ganlyniad i'r cynnig a rhaid bod lefelau hygyrchedd yn foddhaol.

11.240 Gall darparu ystod a dewis o atyniadau a chyfleusterau fod o gymorth i ddatgloi potensial economi ymwelwyr y Sir. Mae atyniadau 'ar gyfer diwrnodau glawog' yn cynnig potensial arbennig i wrthsefyll materion tymoroldeb, tra dylai cyfleoedd i greu swyddi gael eu cynyddu i'r eithaf hefyd. Mae cyfleusterau defnydd deuol – h.y. atyniadau sydd ar agor i deithwyr dydd a'r gymuned leol – yn cynnig manteision ehangach posibl. Mae cynigion sy'n ceisio alinio â rhwydwaith ehangach o atyniadau yn y Sir yn cynnig potensial i ehangu'r arlwy ar y cyfan yn ogystal â chynyddu hyd arosiadau a swm y gwariant ariannol yn economi ymwelwyr Sir Gaerfyrddin.

11.241 Dylai cynigion nad ydynt wedi'u lleoli o fewn, neu nad ydynt yn uniongyrchol gysylltiedig ag, anheddiad a ddiffinnir ym Mholisi SP16 ddangos bod y lleoliad penodol yn hanfodol o ran hyfywedd a dichonoldeb y datblygiad. Bydd angen i'r ymgeisydd ddangos pam fod y lleoliad penodol yn hanfodol a pham fod y cynnig yn dibynnu i raddau helaeth ar briodoleddau'r safle. Gellid gwneud hyn trwy egluro sut y mae'r safle / cynnig wedi'i gysylltu'n weledol, yn swyddogaethol ac yn ofodol â nodwedd ddiffiniedig. Gallai hyn gynnwys nodweddion naturiol, hanesyddol, neu o waith dyn).

11.242 Dylai cynigion nad ydynt wedi'u lleoli o fewn, neu nad ydynt yn uniongyrchol gysylltiedig ag, anheddiad a ddiffinnir ym Mholisi SP16 roi ystyriaeth yn gyntaf i ailddefnyddio neu estyn adeiladau presennol. Os na fydd unrhyw adeilad presennol i dderbyn y cynnig newydd, dylid defnyddio tir a ddatblygwyd yn flaenorol, gyda safleoedd maes glas yn olaf.

11.243 Lle y bo'n berthnasol, bydd y Cyngor yn gofyn i ymgeiswyr gyflwyno datganiad ategol twristiaeth. Mae datganiad o'r fath yn darparu mecanwaith i'r ymgeisydd ddangos aliniad polisi'r cynnig. Gall datganiad hefyd roi'r cyfle i ymgeisydd ddangos nodweddion economaidd y cynnig yn llawn (fel sy'n gymesur â maint/graddfa a.y.b.).

11.244 Mae'r polisi hwn yn cydnabod manteision arlwy llety amrywiol o ran darparu ystod a dewis o leoedd i aros. Caiff cyfraniad posibl gwestai a llety arall â gwasanaeth sydd o ansawdd uchel o ran cynyddu ac ehangu economi sector gwasanaethau'r Sir ei nodi'n briodol. Gall hyn gynnig ystod o fanteision economaidd, gan hefyd alluogi'r Sir i ehangu ei harlwy ac apelio at ddemograffeg / sylfeini cwsmeriaid ehangach, a sicrhau mwy o wariant gan ymwelwyr a hynny am gyfnod hwy.

11.245 Mae'r polisi hwn yn berthnasol i amrywiaeth o wahanol fathau o westai o ansawdd da i lety gwely a brecwast bach.

11.246 Lle rhoddir caniatâd cynllunio ar gyfer llety gwyliau parhaol, bydd y Cyngor yn ystyried atodi amodau sy'n cyfyngu ar y defnydd fel mai defnydd fel llety gwyliau yn unig ydyw. Gellir defnyddio amodau meddiannaeth dymhorol hefyd i atal llety o'r fath rhag cael ei feddiannu'n barhaol ar sail breswyl.

11.247 Yn gyffredinol, ni fydd adeiladau sydd o adeiladwaith iwtilitaraidd modern is-safonol (gan gynnwys deunyddiau megis gwaith bloc concrit croen sengl, adeiladau ffrâm porth wedi'u gorchuddio â dalennau metel) neu adeiladau o ansawdd is-safonol a/neu ymddangosiad anghyson yn cael eu hystyried yn briodol ar gyfer eu troi'n llety gwyliau. Dylid cyfeirio hefyd at bolisi RD4: Addasu ac Ailddefnyddio Adeiladau Gwledig ar gyfer Defnydd Dibreswyl.

11.248 Lle y bo'n berthnasol, bydd y Cyngor yn gofyn i'r ymgeisydd gyflwyno datganiad ategol ar dwristiaeth. Mae datganiad o'r fath yn darparu mecanwaith i'r ymgeisydd ddangos aliniad polisi'r cynnig.

11.249 Cyfeirir at Bolisi RD3: Arallgyfeirio ar Ffermydd sy'n darparu'r fframwaith polisi ar gyfer prosiectau arallgyfeirio ar ffermydd sy'n ceisio gwneud cyfraniad cadarnhaol at yr economi wledig a'i chryfhau.

11.250 Mae'r polisi hwn yn cydnabod y dylid cefnogi cynigion priodol sydd o ansawdd da. Mae hyn yn cydnabod yr angen i ddarparu arlwy llety amrywiol o ran darparu ystod a dewis o leoedd i aros yn y Sir.

11.251 Mae'r polisi hwn yn darparu ar gyfer ystyried cynigion ar gyfer carafanau teithiol, pebyll, podiau ac unedau glampio, pebyll ar drelars a chartrefi / carafanau modur – h.y. llety ymwelwyr nad yw'n barhaol.

11.252 Wrth ymateb i dueddiadau sy'n dod i'r amlwg yn y sector, mae'r polisi hwn hefyd yn darparu ar gyfer ystyried unedau llety glampio. Efallai na fydd y rhain yn debyg i bebyll traddodiadol ac maent hefyd yn annhebygol o gyd-fynd â'r diffiniad statudol o garafán. Gall llety glampio gynnwys tipis, podiau, iyrtau, wigwamiau a.y.b. Er mwyn i uned o'r fath gael ei hystyried yn un nad yw'n barhaol, dylai fod ag angoriad / cyswllt ffisegol cyfyngedig â'r llawr a dylai fod yn dramwy a chreu effaith fach. Dylai'r uned fod yn hawdd i'w symud oddi ar y safle. Ni ystyrir bod defnyddio sylfeini concrit yn briodol, tra dylai unrhyw lwyfannau neu ddecin pren allu cael eu symud yn rhwydd oddi ar y safle. Dylai'r uned ddarparu llety sylfaenol ar gyfer gwyliau yn unig – e.e. cysgu, bwyta ac eistedd.

11.253 Bydd y Cyngor yn ystyried defnyddio amodau – gan gynnwys cyfyngu'r defnydd i ddefnydd fel llety gwyliau yn unig, neu gyfyngu ar gyfnod gweithredol y safle. Ceir disgwyliad bod y safle'n gallu cael ei adfer i'w gyflwr gwreiddiol a bod unrhyw unedau llety'n cael eu symud oddi ar y safle pan fo ar gau.

11.254 Er bod natur amharhaol cynigion a gaiff eu hystyried dan y polisi hwn yn golygu eu bod yn debygol o gael llai o effaith ar y dirwedd a'r amgylchedd nag unedau sefydlog, mae'n dal yn ofynnol iddynt gyd-fynd yn foddhaol â'r dirwedd a/neu'r treflun. Bydd angen i'r Cyngor fod wedi'i argyhoeddi nad oes unrhyw effaith niweidiol, yn enwedig o safbwynt capasiti'r dirwedd. Dylai fod pwyslais ar gynigion sydd wedi'u sgrinio'n dda lle gall unedau gael eu cymhathu'n rhwydd â'r dirwedd heb yr angen am ormod o nodweddion o waith dyn megis arwyneb solet a ffensys. Dylid rhoi sylw dyladwy i bolisïau'r CDLl SP11: Creu Lleoedd a Lleoedd Cynaliadwy a PSD1: Dylunio Cynaliadwy ac o Ansawdd Da.

11.255 Lle y bo'n berthnasol, bydd y Cyngor yn gofyn i ymgeiswyr gyflwyno datganiad ategol twristiaeth. Mae datganiad o'r fath yn darparu mecanwaith i'r ymgeisydd ddangos aliniad polisi'r cynnig. Yng nghyd-destun y polisi hwn, mae'n debygol y bydd y Cyngor yn ceisio cynllun tirlunio i'w gwneud yn bosibl arfarnu lleoliad adeiladau ar y safle, cynllun y safle, a sgrinio. Bydd hefyd yn galluogi'r ymgeisydd i ymhelaethu ar fanteision economaidd y cynnig (fel sy'n gymesur â maint/graddfa a.y.b.).

11.256 Mae'r polisi hwn yn cydnabod y dylid cefnogi cynigion priodol o ansawdd da. Mae hyn yn cydnabod yr angen i ddarparu arlwy llety amrywiol o ran darparu ystod a dewis o leoedd i aros yn y Sir.

11.257 Bydd y Cyngor yn ystyried cymhwyso amodau – gan gynnwys cyfyngu'r defnydd i ddefnydd fel llety gwyliau yn unig, neu gyfyngu ar gyfnod gweithredol y safle. Mae'n debygol mai ar achlysuron prin y bydd safleoedd yn meddu ar y nodweddion hynny a fyddai'n caniatáu iddynt aros ar agos ym misoedd y gaeaf.

11.258 Lle y bo'n briodol, bydd y Cyngor yn ei gwneud yn ofynnol i weithredwyr safleoedd gynnal cofrestr gyfoes o enwau holl berchnogion/meddianwyr yr unedau sefydlog a'u prif gyfeiriad cartref er mwyn sicrhau nad yw'r unedau gwyliau'n dod yn brif fan preswylio'r perchennog/meddiannwr.

11.259 Yr egwyddor ddylunio danategol y dylid ei dilyn ar gyfer llety ymwelwyr sefydlog yw ansawdd da – yn anad dim o ran cynllun ac ymddangosiad. Dylai cynigion fod wedi'u lleoli mewn lleoliadau anymwthiol sydd wedi'u sgrinio'n addas gan nodweddion presennol y dirwedd a/neu lle gall yr unedau gael eu cymhathu'n rhwydd â'r dirwedd mewn ffordd nad yw'n achosi niwed sylweddol i ansawdd gweledol y dirwedd, y morlun neu'r treflun. Dylid rhoi sylw dyledus i bolisïau'r CDLl SP11: Creu Lleoedd a Lleoedd Cynaliadwy a PSD1: Dylunio Cynaliadwy ac o Ansawdd Da.

11.260 Dylai dangos perthynas ofodol a swyddogaethol â chyfleuster neu atyniad twristiaeth presennol perthnasol fod yn gymesur â maint a natur y cynnig. Ystyrir bod cynigion ar gyfer llety gwyliau sefydlog sydd o natur wasgaredig a digysylltiad yn hynod annhebygol o allu dangos y berthynas ofynnol.

11.261 Mae llawer o unedau sefydlog presennol wedi'u lleoli mewn ardaloedd sy'n sensitif yn weledol, yn enwedig ar hyd morlin Sir Gaerfyrddin. Mae'r polisi'n ceisio hybu gwelliannau ac uwchraddio safon llety ymwelwyr ar safleoedd presennol, a lleihau effaith y safleoedd hyn ar y dirwedd / morlun. Dylai cynigion o'r fath fodloni polisïau a darpariaethau'r Cynllun yn ei gyfanrwydd.

11.262 Mae'r polisi'n ceisio adlewyrchu Deddf Llesiant Cenedlaethau'r Dyfodol 2015 yn yr ystyr ei fod yn cydnabod y risgiau a achosir gan berygl llifogydd a / neu erydiad sy'n deillio o newid arfordirol. I'r perwyl hwn, dylid cyfeirio at bolisi'r CDLl NE7: Ardal Rheoli Newid Arfordirol o ran adleoliad posibl carafán/carafannau sefydlog, caban(nau) gwyliau neu uned(au) llety ymwelwyr arall barhaol/eraill parhaol.

11.263 Lle y bo'n berthnasol, bydd y Cyngor yn gofyn i ymgeiswyr gyflwyno datganiad ategol twristiaeth. Mae datganiad o'r fath yn darparu mecanwaith i'r ymgeisydd ddangos aliniad polisi'r cynnig. Yng nghyd-destun y polisi hwn, mae'n debygol y bydd y Cyngor yn ceisio cynllun tirlunio i'w gwneud yn bosibl arfarnu lleoliad adeiladau ar y safle, cynllun y safle, a sgrinio, yn ogystal â chynllun gwella ar gyfer estyniadau. Caiff materion capasiti'r dirwedd eu nodi hefyd. Dylai'r datganiad roi'r cyfle i'r ymgeisydd ymhelaethu ar fanteision economaidd y cynnig hefyd (fel sy'n gymesur â maint/graddfa).

11.264 Mae Polisi Cynllunio Cymru yn nodi polisïau cynllunio defnydd tir Llywodraeth Cymru. Ei amcan canolog yw hybu a darparu fframwaith ar gyfer datblygu cynaliadwy yng Nghymru.

11.265 Mae un o elfennau allweddol yr agenda bolisi genedlaethol hon, a'r amcanion datblygu cynaliadwy sy'n ei thanategu, yn ymwneud â'r angen i gofleidio creu lleoedd fel rhan o'r broses o baratoi cynlluniau a gwneud penderfyniadau. Mae'r polisi cynllunio cenedlaethol yn nodi Lleoedd Cynaliadwy fel nod y system cynllunio defnydd tir yng Nghymru. Mae PCC yn nodi mai allbwn y system gynllunio ydynt yn hytrach na'r broses o'u cyflawni. Dylai'r holl benderfyniadau ynglŷn â datblygu, naill ai trwy ddewisiadau polisi cynlluniau datblygu neu benderfyniadau unigol ynglŷn â rheoli datblygu, geisio cyfrannu tuag at greu lleoedd cynaliadwy a llesiant gwell^[24].

11.266 Mae Llywodraeth Cymru yn ymrwymedig i hybu mathau mwy cynaliadwy o ddatblygu, ac mae ei chynllun datblygu cynaliadwy, Cymru'n Un: Cenedl Un Blaned (2009) yn nodi ei dull o fynd ar drywydd datblygu cynaliadwy. Trwy'r system gynllunio yng Nghymru, gellir defnyddio dylunio da i gyflawni rôl bwysig o ran cyflawni mathau cynaliadwy o ddatblygu gyda'r CDLl Diwygiedig yn ymrwymedig i ganlyn arni â'r agenda creu lleoedd cynaliadwy trwy ei bolisïau sy'n cydnabod rôl datblygiadau newydd o ran eu potensial i gyfrannu at greu lleoedd, a nodweddion yr ardal. Mae'r dull hwn yn ceisio cyd-fynd â Deddf Llesiant Cenedlaethau'r Dyfodol (Cymru) 2015 gan hybu cynhwysiant cymdeithasol, cyfle cyfartal a mynediad ar gyfer pawb yn ogystal ag iechyd a llesiant ein cymunedau.

11.267 Er mwyn cyflawni dyluniad da a chreu ymdeimlad effeithiol o le mae gofyn deall y berthynas rhwng pob elfen o'r amgylchedd naturiol ac adeiledig. Mae dylunio'n elfen hanfodol o greu datblygu cynaliadwy, sydd ynddo'i hun yn flaenllaw yn Neddf Llesiant Cenedlaethau'r Dyfodol 2015.

11.268 Mae'r Ddeddf yn golygu bod rhaid i gyrff cyhoeddus megis awdurdodau lleol weithio i sicrhau y dylai datblygiadau gydnabod a cheisio gwella llesiant economaidd, cymdeithasol, amgylcheddol a diwylliannol ardal.

11.269 Mae'r polisi'n integreiddio elfennau allweddol o greu lleoedd cynaliadwy sy'n cyfrannu at wireddu Gweledigaeth y Cynllun, sef creu cymunedau llewyrchus, cydlynol a chynaliadwy. Mae hefyd yn cydnabod rôl nodweddion amgylcheddol a hanesyddol a diwylliannol unigryw'r Sir o ran diffinio amgylchedd iach, diogel a llewyrchus. Mae rôl Seilwaith Gwyrdd a'i rwydwaith o fannau agored amlbwrpas yn elfen bwysig fel y mae ei ddarpariaethau ar gyfer iechyd a llesiant a chyfleoedd gwell ar gyfer Teithio Llesol ac mae'n hyrwyddo gwell.

11.270 Mae manteision amgylcheddol a chymdeithasol yn ogystal ag economaidd i greu datblygiad a ddyluniwyd yn dda. Mae dylunio amgylchedd o ansawdd da'n elfen hanfodol o gyflawni llewyrch economaidd gan y bydd yn fwy deniadol i fuddsoddwyr posibl yn ogystal ag apelio'n fwy at gwsmeriaid, gweithwyr allweddol a thwristiaid. Yn yr un modd, bydd adeiladau a lleoedd ar gyfer gwaith sydd wedi'u dylunio'n well yn arwain at gyflogeion mwy cynhyrchiol. Ar yr un pryd, bydd cymdogaethau sydd wedi'u dylunio'n dda'n creu cymunedau hapusach ac iachach a fydd yn fwy ymrwymedig i gynnal a chadw eu hamgylchoedd. Gallai'r manteision amgylcheddol gynnwys llai o lygredd trwy leihad yn y traffig, diogelu neu wella bioamrywiaeth, a gwarchod y dreftadaeth adeiledig. Mae'r holl fanteision hyn yn ganolog i gyflawni datblygu cynaliadwy ac i lewyrch economaidd hirdymor ardal.

11.271 Mae'r polisi hwn wedi'i fwriadu i sicrhau bod cynigion datblygu'n gallu cyflawni canlyniadau economaidd, cymdeithasol, amgylcheddol a diwylliannol cadarnhaol, ac yn gallu lleihau rhai niweidiol i'r eithaf. Ynghyd â pholisïau mwy manwl a gaiff eu datblygu yn y CDLl Adneuo, bydd yn sail i'r holl benderfyniadau cynllunio, a bydd dangosyddion yn cael eu datblygu fel rhan o fframwaith monitro'r Cynllun i ddangos effeithiolrwydd y polisïau.

11.272 Mae Deddf Rheoli Llifogydd a Dŵr 2020 (Atodlen 3) yn sefydlu Corff Cymeradwyo Draenio Cynaliadwy (SAB) ac yn ei gwneud yn ofynnol i ddatblygiadau newydd gynnwys nodweddion Systemau Draenio Cynaliadwy (SuDS) sy'n cydymffurfio â safonau cenedlaethol.

11.273 Er bod y broses gydsynio ar gyfer Systemau Draenio Cynaliadwy yn rhan o gyfundrefn reoleiddiol ar wahân i gynllunio, mae'r Cynllun hwn yn cydnabod pwysigrwydd cynnwys ystyriaeth i Systemau Draenio Cynaliadwy fel rhan o'r cysyniad dylunio o'r dechrau un fel rhan o ddull creu lleoedd. Yn hyn o beth, mae'r Cynllun yn cydnabod bod Systemau Draenio Cynaliadwy yn gallu cael eu defnyddio'n effeithiol mewn ardaloedd gwledig a threfol i gefnogi datblygu ac ailddatblygu newydd, gan hefyd leihau perygl llifogydd dŵr wyneb a chreu cyfleoedd ar gyfer ansawdd dŵr gwell, cynefinoedd cyfoethog bio-amrywiol a mannau hamdden cymunedol newydd.

11.274 Cynghorir datblygwyr i gysylltu â Chorff Cymeradwyo Draenio Cynaliadwy y Cyngor ar adeg amserol er mwyn egluro a chwmpasu'r gofynion.^[25]

11.275 Mae'r cynllun hwn a'r polisi'n ceisio sicrhau bod cynigion datblygu'n arddangos egwyddorion dylunio cynaliadwy ac o ansawdd da sy'n adlewyrchu'r cyd-destun lleol. Mae dylunio o ansawdd da'n ganolog i'n huchelgeisiau ar gyfer creu cymunedau llewyrchus, cydlynol a chynaliadwy. Rhan bwysig o hyn yw sefydlu dull adfywio seiliedig ar ddylunio sy'n darparu ar gyfer datblygiadau a dyluniadau o ansawdd da mewn ffordd sy'n cydnabod unigrywiaeth lleol, a'r berthynas rhwng y ffurf adeiledig bresennol a datblygiadau newydd.

11.276 Mae'r Cynllun yn ceisio adlewyrchu darpariaethau polisi cenedlaethol a'r ffaith bod datblygu cynaliadwy wedi'i wreiddio o fewn y cynllun gan gydnabod y dylai tai a datblygiadau newydd gael eu darparu mewn ffordd sy'n gyson ag egwyddorion cynaliadwyedd. Mae materion megis cynllun, graddfa, ffurf, trwch, uchder, dwysedd, deunyddiau a manylion penodol (gan gynnwys y paled lliwiau) yn elfennau pwysig. Fodd bynnag, cydnabyddir nad yw'r rhain yn gallu bod yn gyfarwyddol ac y byddant yn amrywio ar draws datblygiadau ac ardal y Cynllun.

11.277 Ni ddylai creu dyluniad da fod yn gyfyngedig i ymddangosiad ffisegol adeiladau yn unig ac ni fydd manylion strwythurol penodol ar eu pennau eu hunain yn creu lle cynaliadwy. Yn hytrach, mae'r cymysgedd posibl o ddefnyddiau mewn datblygiad a/neu adeiladau, mannau (gan gynnwys bylchau a golygfeydd pwysig) a'r gymuned ehangach yn berthynol i'w gilydd yr un mor bwysig er mwyn i'r datblygiad gyflawni'r ymdeimlad o le a ddymunir.

11.278 Mae'r polisi hwn ar y cyd ag SP11: Creu Lleoedd a Lleoedd Cynaliadwy, PSD3: Rhwydwaith Seilwaith Gwyrdd a PSD2: Egwyddorion Uwchgynllunio – Creu Cymdogaethau Cynaliadwy ynghyd â pholisïau eraill yn y cynllun yn pennu fframwaith trosfwaol ar gyfer ansawdd dylunio da mewn cynigion datblygu, cadwraeth a gwella yn y Sir.

11.279 Dylai adeiladau hanesyddol, treflun a thirwedd y Sir gael eu trin fel ased a'u gwarchod a'u gwella'n gadarnhaol er budd preswylwyr ac ymwelwyr fel ei gilydd. Ceir canllawiau pellach ynghylch datblygu a gwarchod hunaniaethau hanesyddol a diwylliannol ym Mholisi Strategol SP14.

11.280 Dylai cynigion adlewyrchu'r angen i warchod nodweddion yr ardal ac amwynder y rhai sy'n byw ac yn gweithio yn yr ardal ac yn ymweld â hi. Dylai lleoliad adeiladau ar y safle a natur defnyddiau gael eu hystyried yng ngoleuni eu potensial i achosi niwsans annerbyniol. Gall ystyriaethau i amwynder ymwneud â phob math o ddatblygiad ledled y Sir. O ganlyniad, mae'r polisi'n ceisio parchu a, lle y bo'n briodol, gwarchod amwynder preswylwyr presennol.

11.281 Bydd lleoliad adeiladau ar y safle, cynllun a dyluniad manwl datblygiad yn aml yn hollbwysig i lwyddiant ymdrechion i ddarparu dewisiadau gwirioneddol yn lle teithio mewn car. Gall lleoliadau da ar gyfer safleoedd a datblygiadau wedi'u dylunio'n dda gynyddu eglurder safleoedd a mynediad at lwybrau cerdded, beicio a thrafnidiaeth gyhoeddus gan felly leihau maint traffig a chyflymder ceir. Mae'r Cynllun hwn, a strategaethau eraill, yn sicrhau bod datblygiadau newydd yn cyflawni cynaliadwyedd cymdeithasol, economaidd ac amgylcheddol, gan greu lleoedd sy'n gydlynol ac yn gymdeithasol gynhwysol sy'n atgyfnerthu hunaniaeth leol.

11.282 Mae dyluniad o ansawdd gwael nid yn unig yn gallu tanseilio cymeriad, nodweddion ac ymddangosiad ardal, ond mae hefyd yn gallu effeithio ar amwynder preswylwyr presennol a'u hansawdd bywyd. Dylai datrysiadau dylunio ystyried effeithiau o'r fath mewn perthynas ag: effaith weledol, colli golau, edrych drosodd/preifatrwydd, aflonyddwch a goblygiadau tebygol symudiadau traffig neu ystyriaethau gweithredol.

11.283 Dylai cynigion ystyried ansawdd bywyd meddianwyr posibl y datblygiad hefyd. Ystyrir bod maint mannau byw yn bwysig hefyd o ran cynnal safon byw briodol gan gynnwys darparu ar gyfer amgylcheddau iach a deniadol i fyw ynddynt. Dylid nodi y bydd ystyriaethau o'r fath yn berthnasol i addasiadau lle mae potensial ar gyfer gor-ddwysáu defnydd a hynny'n arwain at amodau byw cyfyng.

11.284 Lle y bo'n briodol, dylid cyflwyno Datganiad Dylunio a Mynediad (DAS) gyda cheisiadau cynllunio. Dylai'r Datganiad Dylunio a Mynediad gynnwys y manylion sy'n angenrheidiol i sicrhau bod y cais a'r ystyriaethau dylunio ar gyfer unrhyw ddatblygiad yn cael eu mynegi'n llawn gan roi sylw i ddarpariaethau polisi a'u cyd-destun.

11.285 Bydd yn ofynnol i gynigion ar gyfer datblygiadau sydd â thros 100 o dai roi sylw i ddarpariaethau Polisi PSD2: Egwyddorion Uwchgynllunio – Creu Cymdogaethau Cynaliadwy. Bydd CCA yn ymhelaethu ymhellach ar y polisi gan gynnwys arweiniad penodol ar Egwyddorion Creu Lleoedd a Dylunio. Bydd Seilwaith Gwyrdd a'i rwydwaith o fannau agored amlbwrpas yn rhan annatod o unrhyw ddatrysiad dylunio effeithiol. O ganlyniad bydd disgwyl i gynigion roi sylw dyledus i Bolisi PSD3: Rhwydwaith Seilwaith Gwyrdd.

11.286 Mae gwyliadwriaeth naturiol yn ystyriaeth bwysig wrth sicrhau lleoedd diogelach a datblygiadau a chymunedau mwy cynhwysol.

11.287 Mae'r Cynllun yn cydnabod y gall tir ansad ddigwydd am nifer o resymau, er eu bod yn aml yn perthyn i'r categorïau canlynol:

1. Effeithiau ceudodau tanddaearol – boed â tharddiad naturiol neu o ganlyniad i waith cloddio neu beirianneg sifil;
2. Llethrau ansad – gall y rhain fod yn naturiol (e.e. morlinau sy'n erydu) neu o waith dyn (megis chwareli, trychfeydd neu argloddiau) neu,
3. Cywasgiad tir – gall hyn fod â tharddiad naturiol oherwydd priddoedd mawn, llifwaddodol, aberol neu forol; neu o ganlyniad i weithgareddau dynol e.e. tir gwneud, tirlenwi neu lofeydd brig wedi'u hadfer; a thir sy'n symud o ganlyniad i gleiau sy'n crebachu ac yn chwyddo.

11.288 Yn yr ardaloedd hynny lle mae ansadrwydd tir yn hysbys, rhaid cyflwyno adroddiad cwmpasu gyda chynigion datblygu, a hwnnw'n nodi natur yr ansadrwydd (posibl). Dylai'r adroddiad fod yn ddigon manwl er mwyn i'r awdurdod lleol ac unrhyw asiantaeth statudol arall gadarnhau:

1. nad oes bygythiad posibl i ddatblygiad fynd yn ei flaen;
2. na ellir goresgyn problemau ansadrwydd; neu
3. y gellid rhoi mesurau ar waith i oresgyn problemau dynodedig. Bydd yn ofynnol cyflwyno adroddiad sadrwydd manwl gyda'r cais sydd:
   1. Wedi'i lunio gan "berson cymwysedig", yn fwyaf priodol arbenigwr geotechnegol sy'n gallu dangos profiad arbenigol perthnasol o asesu a gwerthuso ansadrwydd; ac
   2. Yn adnabod y mesurau sy'n ofynnol i liniaru'r risg(iau) d(d)ynodedig.

11.289 Mae'n bwysig bod cynigion yn cael eu dylunio ar gyfer oes y datblygiad. Dylai cynigion nodi cyfrifoldeb am gynnal a chadw, a'r trefniadau cyllido ar gyfer cynnal a chadw dros oes y datblygiad arfaethedig.

11.290 Mae'r polisi'n nodi uwchgynllunio fel un o'r gofynion ar gyfer datblygiadau o ran cyflawni dull creu lleoedd cyfannol ar gyfer yr holl safleoedd dyranedig a hapsafleoedd â 50 neu fwy o dai. Bydd angen cytuno ar uwchgynllun ar gyfer yr holl safleoedd a ddyrannwyd ar gyfer 50 o dai neu fwy cyn rhoi caniatâd cynllunio mewn perthynas â'r safleoedd hynny.

11.291 Mae'r polisi'n cydnabod y manteision a all godi o uwchgynllunio effeithiol nid dim ond o ran ansawdd yr amgylchedd a'r ymdeimlad o le y gall ei greu, ond hefyd fel cyfle i integreiddio'r holl ystyriaethau a gofynion datblygiadol perthnasol yn un mynegiad ar y ffurflen gynigion.

11.292 Gan ddefnyddio'r dull hwn bydd cynigion yn gallu mynegi mewn ffordd eglur a chydlynol sut y gall ffactorau megis seilwaith newydd neu wella seilwaith presennol ychwanegu gwerth ar gyfer preswylwyr presennol a darpar breswylwyr, gan ffurfio a rhoi arweiniad ar gyfer darpariaeth yn y dyfodol. Bydd dull o'r fath yn darparu mwy o sicrwydd ac yn integreiddio cyfleoedd ar gyfer byw cysylltiedig, strydoedd eglur, dilyniant o fannau agored a Seilwaith Gwyrdd a datblygiadau sy'n cyd-fynd â'u hamgylchoedd.

11.293 Dylai cynigion uwchgynllunio ystyried a chynllunio ar gyfer cyflwyno'r datblygiad fesul cyfnod mewn modd effeithiol ac integredig gan ystyried gwahanol gymysgeddau o ddeiliadaethau a darpariaeth addas o ran cyfleusterau ar adegau priodol yn natblygiad safle. Bydd hyn yn sicrhau bod datblygiad yn cael ei gynllunio'n gynhwysfawr gyda chymunedau cydlynol a chynaliadwy'n ganolog iddo.

11.294 Dylai'r uwchgynllun gael ei ystyried ar adeg y cais cynllunio amlinellol gyda'i baramedrau a'i gynnwys yn cael eu cytuno, y dylai materion a gadwyd yn ôl at y dyfodol fod yn gyson â hwy.

11.295 Nod y polisi hwn yw sicrhau bod asedau seilwaith gwyrdd Sir Gaerfyrddin yn cael eu gwerthfawrogi, eu gwarchod, eu gwella a'u rheoli trwy rwydwaith seilwaith gwyrdd. Ar raddfa'r dirwedd gall asedau seilwaith gwyrdd gynnwys ecosystemau llwyr megis gwlypdiroedd, coetiroedd, rhostiroedd a dyfrffyrdd. Ar raddfa leol, gallant gynnwys parciau, caeau, llwybrau troed, Hawliau Tramwy Cyhoeddus, llwybrau beicio, tir comin a gerddi. Ar raddfeydd llai, gall ymyriadau trefol unigol megis coed stryd, ymylon ffyrdd, a thoeau gwyrdd oll gyfrannu at rwydweithiau seilwaith gwyrdd.

11.296 Bydd yn ofynnol i Asesiad Seilwaith Gwyrdd ddangos:

1. lleoliad, ansawdd a chyflwr yr holl asedau SG ac elfennau a nodweddion tirwedd ac ecolegol presennol ar, ac ar bwys, y safle, a'r rhai sy'n ddarostyngedig i:
   1. effeithiau posibl o ganlyniad i'r datblygiad, a manylion sut y mae'r effeithiau wedi cael eu hosgoi a'u lleihau i'r eithaf trwy fesurau dylunio a gwarchod penodol.
   2. effeithiau na ellir eu hosgoi o ganlyniad i'r datblygiad, a manylion sut y mae'r effeithiau wedi cael eu lliniaru, neu eu cydbwyso o fewn cynllun y datblygiad arfaethedig a'r cynllun dylunio tirwedd ar ei gyfer;
2. datrysiadau dylunio effeithiol sy'n cynyddu i'r eithaf gyfleoedd i: wella ansawdd a maint asedau SG ac elfennau a nodweddion tirwedd ac ecolegol presennol; ac yn ei gwneud yn bosibl creu asedau SG ac elfennau a nodweddion tirwedd ac ecolegol newydd, i wella cysylltedd a natur amlbwrpas y rhwydwaith SG

11.297 Pan fo wedi'i gynllunio, ei ddylunio ac yn cael ei reoli'n dda, mae gan seilwaith gwyrdd y potensial i ddwyn ystod eang o fanteision i bobl a byd natur. Trwy ystyried y swyddogaethau niferus y mae ased SG yn gallu eu darparu ar yr un pryd â'i gilydd, gall leihau costau'n sylweddol i unigolion, busnesau a chyrff cyhoeddus, gan hefyd wella ansawdd bywyd ac iechyd preswylwyr, gweithwyr ac ymwelwyr â Sir Gaerfyrddin.

11.298 Mae'r swyddogaethau hyn y gall seilwaith gwyrdd eu darparu'n perthyn yn fras i'r themâu canlynol:

Ffigur 11: Seilwaith Gwyrdd

Bioamrywiaeth: Gall SG wella cysylltedd rhwng ardaloedd natur presennol, gan leihau darniad a cholled cynefinoedd a chynyddu cydnerthedd ecolegol. Bydd cynigion datblygu'n gwarchod ac yn gwella bioamrywiaeth ar safleoedd, a rhwydweithiau cynefinoedd o fewn ac ar bwys y safle. Dylai hyn gynnwys adnabod ffyrdd o leihau i'r eithaf neu wrthdroi darniad cynefinoedd a gwella cysylltedd cynefinoedd trwy hybu coridorau byd natur ac adnabod cyfleoedd i adsefydlu tir, rheoli tirwedd a chreu cynefinoedd newydd neu well.

Ymdeimlad o le:Mae ymgorffori nodweddion SG mewn datblygiad newydd yn elfen bwysig o ddull creu lleoedd Llywodraeth Cymru a gall gyfrannu at yr ymdeimlad unigryw o le mewn ardal neu anheddiad. Mae cadw nodweddion presennol mewn cynigion yn helpu i greu lleoedd sy'n unigryw ac yn gallu helpu i leddfu effaith newid trwy greu ymdeimlad o barhad sy'n cydnabod hunaniaeth leol. Mae seilwaith gwyrdd yn hanfodol i greu lleoedd ac felly rhaid iddo fod yn rhan o'r broses o ddylunio datblygiad o'r dechrau un, yn hytrach na chael ei ddarostwng i dir 'dros ben'.

Y Newid yn yr Hinsawdd: Gall SG chwarae rhan hollbwysig mewn ymdrechion i frwydro yn erbyn y newid yn yr hinsawdd, ei liniaru ac addasu iddo, a bydd ganddo rôl fwyfwy pwysig i ddiogelu ardaloedd trefol a gwledig rhag y newid yn yr hinsawdd. Mae'r rhain yn cynnwys dal a storio carbon, gwella gwres a lleihau perygl llifogydd yn ogystal â lliniaru gostyngiadau mewn ansawdd aer a dŵr a achoswyd gan y newid yn yr hinsawdd. Hyd y bo'n bosibl, dylai datblygiadau geisio cynyddu'r manteision hyn i'r eithaf, a dylid ystyried blaenoriaethu manteision yn y meysydd canlynol:

• O fewn parthau llifogydd a adnabuwyd gan Cyfoeth Naturiol Cymru, darparu capasiti ar gyfer storio dŵr os ceir llifogydd
• Yn y Prif Ganolfannau, darparu rhyddhad rhag tymheredd uchel trwy fwy o orchudd canopi a defnydd effeithlon o arwynebau i gynyddu i'r eithaf y seilwaith gwyrdd a ddarperir gan gynnwys trwy doeau gwyrdd a waliau gwyrdd.
• Mewn ardaloedd lle mae iechyd trigolion yn wael ar gyfartaledd, darparu cyfleoedd ar gyfer gweithgarwch corfforol.
• Mewn Parthau Rheoli Ansawdd Aer, darparu mesurau i waredu llygryddion aer trwy blannu coed a deiliant addas.

Bydd cynigion datblygu hefyd yn integreiddio Systemau Draenio Cynaliadwy brodorol yn nyluniad seilwaith gwyrdd a dylent, hyd y gellir, sicrhau bod darpariaeth Systemau Draenio Cynaliadwy yn amlbwrpas.

Iechyd a Llesiant: Gall seilwaith gwyrdd fod yn fodd effeithiol i wella iechyd a llesiant, trwy gysylltu anheddau, gweithleoedd a chyfleusterau cymunedol a darparu mannau gwyrdd hygyrch o ansawdd da. Dylai datblygiadau geisio cynyddu'r manteision i'r eithaf a, lle y bo'n briodol, defnydd y cyhoedd o seilwaith gwyrdd, gyda phwyslais ar hybu cymunedau iachach. Bydd cynigion datblygu'n cyrraedd safonau lleol o ran hygyrchedd, ansawdd a maint mannau agored, a byddant wedi'u dylunio fel eu bod yn diwallu anghenion y gymuned. Bydd cynigion datblygu yn cynnal a gwella ansawdd a chysylltedd rhwydweithiau mynediad, gan integreiddio llwybrau teithio llesol (gan gysylltu gweithleoedd, ysgolion, cyfleusterau cymunedol a hybiau trafnidiaeth gyhoeddus) a llwybrau hamdden i mewn i seilwaith gwyrdd.

Yr Economi: Mae gwarchod a buddsoddi mewn Seilwaith Gwyrdd yn gallu cefnogi llwyddiant economaidd a thwf cynaliadwy. Gall SG ddenu mewnfuddsoddiad, gan wneud ardal leol yn fwy deniadol i fusnesau ac ymwelwyr. Gall hefyd arbed arian i ddatblygwyr gan bod gan asedau SG y potensial i ateb nifer o ofynion mewn datrysiad amlbwrpas, e.e. man agored a Systemau Draenio Cynaliadwy. I'r perwyl hwn dylai datblygiadau geisio adnabod a chynyddu i'r eithaf ansawdd, defnydd a natur amlbwrpas darpariaeth seilwaith gwyrdd ar y safle.

11.299 O ganlyniad bydd canllawiau pellach ar Seilwaith Gwyrdd fel rhan o ddatblygu'n cael eu paratoi fel CCA i ategu'r agenda creu lleoedd a chreu amgylcheddau byw sydd o ansawdd da ac yn fioamrywiol.

11.300 Mae'r polisi'n cydnabod y cyfraniad pwysig y gall coed, coetiroedd a pherthi ei wneud tuag at yr amgylchedd a'n cymunedau. Mae gan goed a choetiroedd rôl bwysig o fewn ardal y cynllun ac maent yn rhan annatod o'r dirwedd a chymeriad trefol a hefyd yn darparu cynefin ac yn cynyddu cydnerthedd yn wyneb y newid yn yr hinsawdd.

11.301 Mae eu cyfraniad o fewn y ffurf drefol yn cael ei gydnabod yn arbennig. Maent yn helpu i drapio llygryddion aer, darparu cysgod, amsugno dŵr glaw a hidlo sŵn. Maent hefyd yn darparu ardaloedd helaeth o gynefin ar gyfer byd natur, yn enwedig coed aeddfed. Mae rhwydwaith Seilwaith Gwyrdd Sir Gaerfyrddin yn adlewyrchu pwysigrwydd haenau yn y tir trefol ac o fewn ein trefi a'n pentrefi – mewn mannau cyhoeddus a phreifat, ar hyd dyfrffyrdd a llwybrau llinol a, ac mewn ardaloedd amwynder.

11.302 Rydym yn ystyried bod eu cadw a phlannu rhai newydd yn rhan bwysig o greu cymunedau cydlynol ac iach mewn cyd-destun gwledig a thirweddol gwerthfawr a bioamrywiol. Dylid cyflwyno arolwg coed gyda phob cais cynllunio lle mae coed yn bresennol ar y safle. Dylai hyn gynnwys mesurau gwarchod, lliniaru a rheoli. Rhaid rhoi mesurau rheoli priodol ar waith i warchod coed, coetiroedd a/neu berthi sydd newydd eu plannu ac sydd eisoes yn bodoli.

11.303 Mae'r polisi'n adlewyrchu'r cysylltiadau trwy greu lleoedd o ansawdd a Seilwaith Gwyrdd o ansawdd. O ganlyniad bydd canllawiau pellach ar Goed a phlannu fel rhan o ddatblygiadau newydd yn cael eu paratoi fel CCA i ategu'r agenda creu lleoedd a chreu amgylcheddau byw bioamrywiol o ansawdd da.

11.304 Dylai coed newydd a gaiff eu plannu fod o rywogaeth sy'n frodorol i'r safle, ac o aeddfedrwydd sy'n berthynol i'r safle a hynny wrth fodd y Cyngor.

11.305 Elfen allweddol o fewn PCC Rh10 yw'r symudiad tuag at gofleidio economi fwy cylchol yng Nghymru. Mae economi gylchol yn un sy'n ceisio cadw deunyddiau, cynnyrch a chydrannau mewn defnydd am gyhyd ag y bo modd. Ceir manteision amgylcheddol, cymdeithasol ac economaidd i weithredu yn y fath fodd, yn fwyaf nodedig y cynnydd yng ngwerth a chynhyrchiant deunyddiau, arbedion ariannol i'r sector adeiladu ac atal gwastraff.

11.306 Er mwyn hwyluso gofynion y polisi hwn, bydd angen cyflwyno cynllun rheoli deunyddiau naturiol gyda chynigion datblygu. Dylai'r Cynllun nodi'r holl ddeunyddiau naturiol ar y safle cyn y datblygiad, gall y rhain fod yn adeiladau presennol i'w dymchwel neu'r tir naturiol y byddir yn tarfu arno. Dylai esbonio sut y bwriedir cyfyngu i'r eithaf ar y gwastraff a fydd yn cael ei gynhyrchu o'r deunyddiau hyn a bod y dyluniad a'r cynllun wedi rhoi ystyriaeth lawn i sicrhau bod cydbwysedd rhwng torri a llenwi mor agos â phosibl at fod yn niwtral.

11.307 Rhoddir anogaeth ar gyfer cynigion datblygu sy'n cynnwys nodweddion dylunio a deunyddiau sy'n galluogi hyblygrwydd a'r gallu i addasu drwy gydol oes dylunio adeilad ac a fydd yn galluogi'r deunyddiau i gael eu hailddefnyddio ar ôl ei ddadadeiladu.

11.308 Lle y bo'n briodol, rhoddir anogaeth i ddefnyddio deunyddiau o ffynonellau lleol, deunyddiau amgen neu ddeunyddiau wedi'u hailgylchu, gan gynnwys ailddefnyddio ac ailgylchu agregau eilaidd, gwastraff adeiladu, dymchwel a chloddio, lludw gwaelod llosgydd a deunyddiau priodol eraill wedi'u hailgylchu.

11.309 Yn anochel, mae ar safleoedd adeiladu angen rhywfaint o weithrediadau peirianneg torri a'u llenwi. Fel rhan o'r broses o drin y safle, dylid asesu'r cydbwysedd torri a llenwi rhwng y deunyddiau a gloddiwyd er mwyn osgoi creu gwastraff na ellir ei ailddefnyddio'n effeithiol oherwydd diffyg cyfleusterau storio addas. Fel rhan o'r cynllun rheoli adnoddau naturiol dylai datblygwyr ddylunio cynigion i sicrhau cydbwysedd mewn cloddwaith sy'n ceisio lleihau'r gwaith torri a llenwi i'r eithaf neu a allai ddarparu ar gyfer adfer tir mewn rhannau eraill o'r ardal.

11.310 Bydd yr Awdurdod Cynllunio yn rhoi anogaeth ar gyfer dulliau arloesol o ailgylchu, yn enwedig y rhai sy'n dwyn manteision niferus megis lleihau costau ynni ac allyriadau cysylltiedig. Gall hyn gynnwys yr arfer o ailgylchu ar y safle lle mae safleoedd mwynau yn y cwestiwn ac ailgylchu gwastraff adeiladu a dymchwel ar y cyd â defnyddiau addas eraill, megis o fewn iardiau cyflenwyr adeiladwyr.

11.311 O dan amgylchiadau lle nad yw'n bosibl ailddefnyddio neu ailgylchu'r gwastraff, bydd angen i'r ymgeisydd ddarparu tystiolaeth i ddangos ble y caiff y gwastraff gweddillol ei waredu. Mae'r opsiynau y byddir yn rhoi anogaeth ar ei cyfer yn cynnwys y potensial i ddefnyddio'r gwastraff fel ffynhonnell tanwydd, megis mewn adfer ynni effeithlon iawn o wastraff, o bosibl yn gysylltiedig â systemau gwresogi ardal.

11.312 Mae darparu ystod o gyfleusterau cymunedol sy'n hygyrch i gynifer o bobl â phosibl yn hanfodol o ran sicrhau cymunedau cynaliadwy. Mae cyfleusterau o'r fath yn werthfawr nid dim ond o ran yr amwynder y maent yn ei ddarparu, ond maent hefyd yn bwysig o ran creu cyflogaeth a denu pobl i fyw mewn ardal. Mae cyfleusterau cymunedol yn cyfrannu'n sylweddol at lesiant, ansawdd bywyd, mwynhad a chynwysoldeb aneddiadau a chymunedau o fewn y sir. Yn hyn o beth, dylai'r posibilrwydd o'u colli gael ei ystyried yn ofalus o gofio'r effeithiau canlyniadol o ran cynaliadwyedd a hunaniaeth gymunedol. Lle bynnag y bo'n ymarferol, dylid ystyried diogelu a chadw cyfleusterau cymunedol a mabwysiadu dulliau ymatebol i helpu i'w cadw.

11.313 Mae'r polisi uchod hefyd yn cydnabod y potensial y bydd datblygu lle mae'n digwydd yn rhoi straen ar gyfleusterau presennol. O ganlyniad, mae digonolrwydd cyfleusterau presennol fel gofal iechyd yn ystyriaeth bwysig. O ganlyniad, mae'r polisi yn ceisio sicrhau bod cyfleusterau digonol yn cael eu darparu i ateb galwadau cymunedau lleol yn y dyfodol.

11.314 Mae'r polisi yn ceisio hybu'r potensial ar gyfer defnydd deuol o gyfleusterau, yn enwedig lle byddai'r gweithgarwch ychwanegol yn helpu i ehangu'r ddarpariaeth gwasanaethau a gwella hyfywedd a defnydd. Gallai cadarnhau hyfywedd cyfleuster, yng nghyd-destun nodweddion demograffig cyfnewidiol, cyflwr a gwaith cynnal a chadw a phatrymau newidiol o ran y galw olygu nad yw rhai cyfleusterau yn ateb y gofynion mwyach. Mewn amgylchiadau o'r fath, gallai ffurfiau amgen o ddarpariaeth a defnydd fod yn briodol. Dylai penderfyniad o'r fath gael ei oleuo, lle y bo'n briodol, gan dystiolaeth leol, y darparwr cyfleuster/gwasanaeth a'r gymuned leol.

11.315 Mae hybu hygyrchedd i hamdden ac adloniant ffurfiol ac anffurfiol yn ystyriaeth bwysig ar gyfer y CDLl. Mae meysydd chwaraeon, rhandiroedd, parciau ac amwynderau naturiol ehangach fel dyfrffyrdd a choetiroedd yn darparu cyfleoedd ar gyfer manteision iechyd posibl ac yn ychwanegu at yr ymdeimlad o le mewn cymuned, yn ogystal ag integreiddio seilwaith gwyrdd yn y ffurf drefol.

11.316 Mae ganddynt hefyd y potensial i liniaru achosion ac effeithiau'r newid yn yr hinsawdd, a gallant ddarparu mannau ar gyfer rhyngweithio cymdeithasol a chydlyniant cymunedol. Dylid cyfeirio at bolisi PSD7 mewn perthynas â Hamdden a Mannau Agored.

11.317 Mae'r berthynas rhwng mynediad at gyfleusterau gofal iechyd a datblygiadau newydd yn cael ei chydnabod a dylid cyfeirio at Bolisi INF2: Cymunedau Iach.

11.318 Byddir yn rhoi cefnogaeth i ddarparu cyfleusterau cymunedol lle maent yn cyd-fynd â Pholisi Strategol SP16: Dosbarthu Cynaliadwy – Fframwaith Aneddiadau. Caiff lleoliad cynigion ar gyfer darparu cyfleusterau addysgol ac iechyd newydd ei gefnogi ar safleoedd sydd o fewn ac yn union ar bwys terfynau aneddiadau diffiniedig lle maent yn gyson â strategaeth a pholisïau'r CDLl hwn.

11.319 Gall y Cyngor geisio cyfraniadau gan ddatblygwyr trwy rwymedigaethau cynllunio i liniaru effeithiau datblygiadau penodol, ac i hwyluso'r broses o gyflawni polisïau a chynigion y Cynllun.

11.320 Rhoddir diffiniadau o fannau agored ac eglurhad o safonau hygyrchedd y Sir yn Asesiad Mannau Agored Sir Gaerfyrddin a cheir gwybodaeth ychwanegol hefyd yn Asesiad Seilwaith Gwyrdd Sir Gaerfyrddin. At ddibenion y cynllun hwn, diffinnir mannau agored fel ardaloedd sy'n cynnwys caeau chwarae, ardaloedd chwarae plant â chyfarpar, cyfleusterau chwaraeon awyr agored, hamdden anffurfiol a mannau amwynder neu chwarae (h.y. mannau gwyrdd naturiol, mannau chwarae a mannau agored cyhoeddus).

11.321 Mae'r ddarpariaeth mannau agored a nodwyd yn y Sir yn cael ei mapio a'i hasesu yn Asesiad Mannau Agored Sir Gaerfyrddin. Dylid nodi, fodd bynnag, y gall fod ardaloedd ychwanegol o fannau agored nad ydynt yn cael eu hadlewyrchu yn yr Asesiad sy'n gwneud cyfraniad gwerthfawr tuag at ddarparu mannau agored o fewn y gymuned. Er na chaiff yr ardaloedd hyn eu mapio fel rhan o'r CDLl, byddent yn cael eu diogelu serch hynny o dan y polisi hwn os ystyrir bod hynny'n briodol.

11.322 Er bod diogelu mannau agored presennol yn agwedd allweddol ar y polisi uchod, mae hefyd yn rhoi rhywfaint o hyblygrwydd. Mae'n bosibl y bydd ystyried nodweddion demograffig cyfnewidiol, cyflwr a bywiogrwydd y ddarpariaeth bresennol, ac unrhyw batrymau newidiol mewn angen, yn golygu nad yw mannau agored presennol yn ateb y gofynion mwyach. Efallai y bydd darpariaeth dros ben yn cael ei nodi neu gall fod cyfle i wella'r ddarpariaeth bresennol i ddiwallu anghenion y gymuned leol drwy ddatblygiad. Mewn amgylchiadau o'r fath, mae'r polisi yn ceisio darparu ar gyfer gwella neu newid darpariaeth o fewn yr anheddiad fel a lle y bo'n briodol.

11.323 Pan fydd gan gynigion y potensial i gael effaith sylweddol a niweidiol ar ddarpariaeth bresennol, bydd angen i'r ymgeisydd ddangos bod darpariaeth amgen ar gael i gyrraedd y safonau hygyrchedd. Dylid cyfeirio at yr Asesiad Mannau Agored at y diben hwn; dylid ystyried nifer y mannau agored, eu lleoliad a'u math wrth nodi darpariaeth amgen o 'werth cyfatebol'. O ran y patrymau newidiol mewn angen a defnydd, dylid ystyried ymgynghori â Chyngor Chwaraeon Cymru, ochr yn ochr â Gwasanaethau Hamdden a Pharciau 'r Cyngor, y Cynghorau Tref a Chymuned perthnasol, yn ogystal â darparwyr gwasanaethau a sefydliadau eraill sydd â chyfrifoldeb am ddarparu a chynnal a chadw mannau agored yn yr ardal. Dylid nodi mai cyfrifoldeb yr ymgeisydd fydd darparu digon o wybodaeth i ddangos bod y cynnig yn cydymffurfio â'r polisi hwn.

11.324 Mae'r mannau agored hyn yn gwneud cyfraniad pwysig i Seilwaith Gwyrdd y Sir trwy ddarparu ardaloedd ar gyfer hamdden, lleihau effaith y newid yn yr hinsawdd, gwella iechyd a llesiant a gwella bioamrywiaeth a chysylltedd, ymhlith manteision eraill. Dylid ystyried polisi PSD3: Rhwydwaith Seilwaith Gwyrdd a'r angen i gynyddu i'r eithaf y seilwaith gwyrdd o fewn safle a chyflawni natur amlddefnydd trwy ddod â swyddogaethau seilwaith gwyrdd at ei gilydd.

11.325 Mae Asesiad Mannau Agored Sir Gaerfyrddin yn nodi'r ddarpariaeth bresennol o ran mannau agored ledled ardal y cynllun a'r safonau y dylai'r cyngor a datblygwyr anelu at eu cyflawni. Mae'r polisi hwn yn fodd i gyflawni'r safonau hyn sy'n ystyried maint, swyddogaeth a hygyrchedd y ddarpariaeth. Ceir manylion pellach yn yr Asesiad Mannau Agored.

11.326 Wrth benderfynu a oes angen cyfraniad ai peidio, bydd angen ystyried maint, hygyrchedd, ansawdd a'r math o ddarpariaeth mannau agored. Lle y bo diffyg presennol o fewn cymuned a bod y datblygiad arfaethedig yn debygol o waethygu'r sefyllfa yna bydd angen cyfraniad. Yn yr un modd, bydd angen cyfraniad mewn amgylchiadau lle byddai'r datblygiad arfaethedig yn arwain at ddiffyg.

11.327 O ran y Mannau Gwyrdd Naturiol, y Mannau Chwarae a'r Mannau Agored Cyhoeddus a ddarperir, mae'r Cyngor yn cymhwyso'r safonau canlynol:

1. Ni ddylai unrhyw berson fod yn byw mwy na 400m¹ ardal agosaf o Fan Gwyrdd Naturiol (o leiaf 0.5ha).
2. Dylai fod o leiaf un Man Gwyrdd Naturiol o 20ha neu fwy, o fewn 2km i bob cartref.
3. Dylai fod o leiaf un safle Man Gwyrdd Naturiol o 100ha neu fwy, o fewn 5km i bob cartref.
4. Dylai fod o leiaf un safle Man Gwyrdd Naturiol o 500ha neu fwy, o fewn 10km i bob cartref.
5. Dylai fod o leiaf 2ha o Fannau Gwyrdd Naturiol am bob 1000 o'r boblogaeth.

1. Dylai fod o leiaf 2.4ha o Fan Chwarae am bob 1000 o'r boblogaeth
2. Dylai o leiaf 1.6ha o'r 2.4ha fod yn Gyfleusterau Chwaraeon Awyr Agored
3. Dylai o leiaf 0.8ha o'r 2.4ha fod yn Gyfleusterau Chwarae i Blant
4. Dylai pawb fod yn byw o fewn 1,200m i Gyfleusterau Chwaraeon Awyr Agored
5. Dylai pawb fod yn byw o fewn 400m² i Gyfleusterau Chwarae i Blant

1. Dylai fod o leiaf 0.8ha o Barciau a Gerddi am bob 1000 o'r boblogaeth
2. Dylai fod o leiaf 0.6ha o Fannau Gwyrdd Amwynder am bob 1000 o'r boblogaeth
3. Dylai pawb fod o fewn 700m i Barc neu Ardd ffurfiol
4. Dylai pawb fod o fewn 480m i Fan Gwyrdd Amwynder

11.328 Yn ogystal â'r safonau meintiol a hygyrchedd, dylid ystyried ansawdd y ddarpariaeth bresennol, gan ystyried ei chyflwr, ei gofynion ar gyfer cynnal a chadw yn y dyfodol a'i haddasrwydd ar gyfer pob aelod o'r gymuned.

11.329 Mewn sefyllfaoedd lle gellir bodloni'r safonau drwy ddarpariaeth bresennol o ran mannau agored sydd o ansawdd addas, yna bydd angen datganiad ategol gan yr ymgeisydd i ddangos tystiolaeth o hyn. O dan amgylchiadau o'r fath, gall y Cyngor ofyn am swm gohiriedig tuag at gynnal a chadw neu uwchraddio darpariaeth mannau agored gerllaw sydd eisoes yn bodoli lle ystyrir bod angen hynny.

11.330 Mae'n bosibl y bydd sefyllfaoedd lle na ellir bodloni'r safonau, er enghraifft, lle na all y safle ymdopi'n ymarferol â darparu mannau agored ar y safle oherwydd cyfyngiadau ffisegol neu ddylunio, neu lle byddai hynny'n golygu bod y datblygiad yn gwbl anymarferol. O dan amgylchiadau o'r fath, dylai'r datblygwr ddarparu datganiad ategol i egluro pam na ellir cadw at y safonau ar y safle a gall yr Awdurdod Cynllunio Lleol geisio symiau gohiriedig tuag at gynnal a chadw'r man agored presennol yn lle hynny. Dylid cyfeirio at Bolisi INF1 o ran rhwymedigaethau cynllunio a chyfraniadau datblygwyr.

11.331 Cydnabyddir y gall fod ardaloedd ychwanegol o fannau agored nad ydynt yn cael eu hadlewyrchu yn yr Asesiad sy'n gwneud cyfraniad gwerthfawr at ddarparu mannau agored o fewn y gymuned, a gall hyn fod yn arbennig o berthnasol i ardaloedd a ddefnyddir ar gyfer gweithgareddau hamdden anffurfiol. Hefyd, er bod ardaloedd o fannau agored wedi'u categoreiddio fel mathau penodol o ddarpariaeth, cydnabyddir eu bod ar adegau yn gallu cyflawni swyddogaethau mathau eraill o fannau agored. O dan amgylchiadau o'r fath, gellir ystyried eu bod yn gwneud cyfraniad cadarnhaol tuag at sawl math o fan agored.

11.332 Pan fo darparu mannau agored yn rhan o gais cynllunio, dylai'r ymgeisydd nodi sut y cafodd y gwaith o reoli a chynnal a chadw unrhyw ddarpariaeth mannau agored yn y dyfodol ei ystyried. Dylid cyfeirio at Bolisi PSD1 am arweiniad pellach.

11.333 Er mwyn hybu hunaniaeth ddiwylliannol ardal y Cynllun, bydd y Cyngor yn cefnogi a hybu darpariaeth arwyddion gwybodaeth, hysbysfyrddau a byrddau gwybodaeth, arddangosiadau ac arwyddion hysbysebu ar gyfer atyniadau a chyfleusterau twristiaeth dwyieithog Cymraeg a Saesneg. Bydd datblygwyr preifat cyfleusterau twristiaeth a hamdden hefyd yn cael eu hannog i roi cyhoeddusrwydd i'w mentrau busnes trwy gyfrwng y Gymraeg a'r Saesneg. Ni fydd yn ofynnol i hysbysebion ddarparu brand neu enw'r cwmni yn ddwyieithog; fodd bynnag, bydd yn ofynnol i'r holl eiriau ategol neu ychwanegol a ddarperir ar arwyddion yn y parth cyhoeddus a gynigir mewn cais cynllunio gael eu darparu'n ddwyieithog.

11.334 Byddir yn rhoi anogaeth i gyflwyno cynigion ar gyfer arwyddion a hysbysebion dwyieithog sy'n ceisio cyfuno sawl hysbyseb hanfodol o fewn un arwydd.

11.335 Dylai cynigion fod yn rhai o safon uchel o ran dyluniad ac yn barchus o ran eu lleoliad ar y safle, eu maint a'r defnydd o ddeunyddiau i ategu cymeriad ac ymddangosiad yr adeilad neu'r strwythur presennol a'i amgylchoedd ac yn briodol i ddefnydd yr adeilad presennol.

11.336 Lle mae dyluniad y datblygiad presennol yn wael, bydd y Cyngor yn mynnu bod ansawdd dyluniad a/neu ddeunyddiau unrhyw estyniad yn well. Dylid ystyried darpariaethau Polisi SP11: Creu Lleoedd a Lleoedd Cynaliadwy a PSD1: Dylunio Cynaliadwy ac o Ansawdd Da.

11.337 Mae'r cysyniad o seinweddau yn cydnabod eu rôl gadarnhaol o ran creu ymdeimlad o le, yn hytrach na chanolbwyntio ar sŵn fel math o lygredd yn unig.^[26]

11.338 Dylai'r pwyslais fod ar ystyried effaith bosibl seinweddau ar ddatblygiadau arfaethedig (ac yn ei thro effaith bosibl datblygiadau arfaethedig ar seinweddau) ar adeg gynnar. I'r perwyl hwn, mae'r Cynllun hwn yn rhoi pwyslais ar ystyriaeth ddyledus gan randdeiliaid i'r materion hyn fel rhan annatod o'r broses ddylunio o'r cychwyn cyntaf. Fel y cyfryw, ni ddylid ystyried y materion hyn yn ystyriaethau 'technegol' sy'n cael sylw ar wahân neu fel 'ychwanegiad' yn ddiweddarach yn esblygiad y dyluniad / cais cynllunio.

11.339 Mae'r cynllun hwn yn cofleidio egwyddor asiant newid sydd wedi'i wreiddio mewn polisi Cenedlaethol^[27]. I'r perwyl hwn, mae'r Cynllun hwn yn cydnabod pa mor bwysig ydyw bod cychwynnwr newid yn ystyried effaith bosibl y cynnig datblygu ar dderbynyddion y newid.

11.340 Wrth nodi budd economaidd posibl cynigion sy'n gysylltiedig ag economi'r nos, ni ddylai iechyd a llesiant trigolion lleol gael eu peryglu'n ormodol. Gall dull creu lleoedd, sy'n ceisio meithrin consensws ar adeg gynnar, fod yn fodd i gyfryngu'r buddiannau hyn a allai wrthdaro â'i gilydd.

11.341 At hynny, dylai datblygiadau sy'n sensitif i sŵn fel tai, ysgolion ac ysbytai yn agos at y seilwaith trafnidiaeth gael eu dylunio, lle bynnag y bo'n bosibl, mewn modd sy'n cyfyngu ar lefelau sŵn o fewn y datblygiad ac o'i amgylch.^[28] Lle y bo'n briodol, dylid rhoi mesurau lliniaru effeithiol a phriodol ar waith, a'u hymgorffori yn y datblygiad i leihau'r effeithiau i'r eithaf.

11.342 Gall seilwaith gwyrdd fod yn fodd effeithiol i wella iechyd a llesiant, trwy gysylltu anheddau, gweithleoedd a chyfleusterau cymunedol a darparu mannau gwyrdd hygyrch o ansawdd da. Dylid cyfeirio at bolisi PSD3: Rhwydweithiau Seilwaith Gwyrdd.

11.343 Gall newidiadau i seinweddau hefyd effeithio ar rywogaethau sy'n sensitif i darfu gan sŵn. Fel bob amser, dylai cynigion fodloni polisïau a darpariaethau'r Cynllun yn ei gyfanrwydd. Fodd bynnag, gellir cyfeirio'n benodol at Bolisi Strategol 13 – Cynnal a Gwella'r Amgylchedd Naturiol (yn fwyaf nodedig mewn perthynas â safleoedd o bwysigrwydd rhyngwladol i gadwraeth natur).

11.344 Mae polisi cenedlaethol yn cydnabod yr effeithiau negyddol y gall llygredd golau eu cael ar bobl, bioamrywiaeth a chydnerthedd ecosystemau. Yn hyn o beth, mae PCC yn mynnu bod awdurdodau yn mabwysiadu polisïau o ran goleuadau a rheoli llygredd golau^[29].

11.345 Mae rhannau o Sir Gaerfyrddin yn dal i fod yn gymharol annatblygedig gyda goleuadau'n cael effaith gyfyngedig ar awyr y nos. Wrth ddehongli'r polisi hwn, dylai unrhyw oleuadau gael eu dylunio a'u hystyried yn ofalus er mwyn lleihau'r effaith ar ardaloedd cyfagos i'r eithaf. Dylid cyfeirio hefyd at Fap Ardaloedd Tawel Cymru, 2009.

11.346 Ym mhob datblygiad, (ac mewn mannau cyhoeddus yn enwedig) dylai fod rheolaeth sensitif ar olau, a dylid cadw amlygiad i lygredd yn yr aer mor isel ag sy'n rhesymol ymarferol.

11.347 Gall llygredd golau gael effeithiau negyddol ar rywogaethau sy'n arbennig o sensitif i aflonyddwch. Yn yr un modd, gall llawer o rywogaethau a chynefinoedd fod yn sensitif i lygredd aer. Fel bob amser, dylai cynigion fodloni polisïau a darpariaethau'r Cynllun yn ei gyfanrwydd. Fodd bynnag, gellir cyfeirio'n benodol at Bolisi Strategol 13 – Cynnal a Gwella'r Amgylchedd Naturiol (yn fwyaf nodedig mewn perthynas â Safleoedd o Bwysigrwydd Rhyngwladol i Gadwraeth Natur).

11.348 Mae cyfleoedd penodol i gydnabod a chofleidio seilwaith gwyrdd fel rhan o ddull creu lleoedd. Yn hyn o beth, dylid cyfeirio at Bolisi PSD3: Rhwydweithiau Seilwaith Gwyrdd.

Aer

11.349 Cydnabyddir ansawdd yr aer a'i oblygiadau ar gyfer yr amgylchedd, iechyd ac ansawdd bywyd trwy ganllawiau cenedlaethol.^[30] Adlewyrchir hyn hefyd yn amcanion yr Arfarniad o Gynaliadwyedd ac adroddiad sgrinio'r Arfarniad Rheoliadau Cynefinoedd.

11.350 Er bod ansawdd yn dda ar y cyfan yn y Sir, mae tair Ardal Rheoli Ansawdd Aer (ARhAA) ddynodedig – un yn Llandeilo, un yn Llanelli ac un yng Nghaerfyrddin. Gellir cyfeirio at Gynllun(iau) Gweithredu'r Cyngor, tra dangosir ffiniau'r ARhAAoedd hyn ar Fap Cyfyngiadau'r Cynllun hwn.

11.351 Dylai datblygwyr fod yn ymwybodol o bwysigrwydd ymgysylltu'n gynnar â'r Cyngor, yn enwedig o ran y gofyniad posibl i gynnal Asesiad Ansawdd Aer. Er nad yw'r cynllun hwn yn gyfarwyddol o ran yr achosion pan fydd angen asesiad o'r fath, ystyrir bod graddfa a lleoliad y cynnig yn benderfynyddion allweddol yn hyn o beth.

11.352 Dylai unrhyw Asesiad Ansawdd Aer amlygu'r mesurau lliniaru gofynnol fel bod unrhyw risgiau i amwynder a bioamrywiaeth yn cael eu cyfryngu'n briodol. Dylai'r broses o nodi mesurau lliniaru o'r fath geisio adlewyrchu'r cyfleoedd a ddarperir gan y seilwaith gwyrdd fel rhan o ddull creu lleoedd. Dylid cyfeirio at bolisi PSD3: Rhwydweithiau Seilwaith Gwyrdd.

11.353 Dylid nodi nad yw'r gofyniad posibl i gynnal Asesiad Ansawdd Aer yn gyfyngedig i safleoedd o fewn neu ar bwys ARhAAoedd y Sir. Bydd y cynigion yn cael eu hystyried ar sail pob achos unigol; fodd bynnag, ar gyfer cynigion sydd wedi'u lleoli mewn ARhAAoedd mae Swyddogion Rheoli Datblygu'r Cyngor yn debygol o ymgynghori ag Ymarferwyr Iechyd yr Amgylchedd yn y Cyngor yn rheolaidd. Cynghorir ymgeiswyr i ymgysylltu'n amserol â'r Cyngor a chyfeirio at ganllawiau perthnasol fel y bo'n briodol.

11.354 Mae'r Cynllun hwn yn cydnabod y gydberthynas bosibl rhwng ansawdd aer a chyfanrwydd safleoedd yn y Sir sydd o bwysigrwydd rhyngwladol i gadwraeth natur. Mae llawer o'r safleoedd hyn yn cynnwys cynefinoedd sy'n sensitif i ansawdd aer sy'n dirywio.

11.355 Fel bob amser, dylai cynigion fodloni polisïau a darpariaethau'r Cynllun yn ei gyfanrwydd. Fodd bynnag, gellir cyfeirio'n benodol at Bolisi Strategol 13 – Cynnal a Gwella'r Amgylchedd Naturiol (yn fwyaf nodedig mewn perthynas â safleoedd o bwysigrwydd rhyngwladol i gadwraeth natur) yn ogystal â Pholisi INF 2 – Cymunedau Iach. Mae cyfleoedd penodol i gydnabod a chofleidio seilwaith gwyrdd fel rhan o ddull creu lleoedd. Yn hyn o beth, dylid cyfeirio at Bolisi PSD3: Rhwydweithiau Seilwaith Gwyrdd.

11.356 Mae gan Sir Gaerfyrddin etifeddiaeth ddiwydiannol gyfoethog ac amrywiol, gan gynnwys ystod eang o ddiwydiannau megis mwyngloddio, gweithgynhyrchu alcam, gwaith nwy, a thanerdai. Gallai pob un o'r prosesau hyn fod wedi halogi'r ddaear, dyfroedd daear neu dderbynyddion sensitif eraill. Mae'r Cyngor wedi nodi nifer o safleoedd a all fod wedi'u halogi o hyd, neu lle nad oes tystiolaeth i gadarnhau bod adferiad digonol wedi digwydd. Yn yr ardaloedd hyn, efallai y bydd angen ymchwilio ymhellach. Ar adeg ysgrifennu, deellir bod Strategaeth Archwilio Tir Halogedig yn y broses o gael ei hadolygu a'i diweddaru gan y Cyngor.

11.357 Mae gan y Cyngor gyfrifoldeb i nodi tir halogedig a sicrhau ei fod yn cael ei reoli mewn modd priodol, fel a nodir yn Neddf Diogelu'r Amgylchedd 1990.

11.358 Bydd angen i'r Cyngor fod wedi'i argyhoeddi bod y risgiau mewn perthynas â'r safle datblygu arfaethedig wedi cael eu deall yn llawn a bod modd adfer y safle i'r safonau angenrheidiol^[31]. Ni ddylai'r gwaith ddechrau ar y safle hyd nes y bydd gwaith adfer priodol wedi'i gwblhau. Bydd yr effeithiau posibl ar amgylcheddau hanesyddol a naturiol yn cael eu hystyried wrth benderfynu ar unrhyw gynnig, a dylid cyflwyno gwybodaeth briodol gydag unrhyw gais.

11.359 Mae tir halogedig yn cael ei ddiffinio o dan Ddeddf Diogelu'r Amgylchedd 1990 Adran 78A (2) fel: 'Any land which appears to the local authority in whose area it is situated to be in such a condition, by reason of substances in, on or under the land, that

• significant harm is being caused or there is a significant possibility of such harm being caused; or
• pollution of controlled waters is being, or is likely to be, caused.'

11.360 Lle y bo'n briodol, rhoddir sylw dyledus i effaith unrhyw weithrediad adfer ar amgylcheddau naturiol a hanesyddol gyda'r manteision cymharol a'r angen am y cynnig yn cael eu pwyso a'u mesur yn erbyn pwysigrwydd cymharol diddordeb hanesyddol neu naturiol y safle.

11.361 Cynghorir ymgeiswyr i ymgysylltu'n amserol â'r Cyngor wrth nodi unrhyw ofynion fel rhan o gynigion datblygu, o ran adnabod risg a mesurau rheoli / lliniaru.

Arferion Iach – Mae gan bobl ansawdd bywyd da, ac maent yn gwneud dewisiadau iach ynglŷn â'u bywydau a'u hamgylchedd.

11.362 Er y cydnabyddir bod gorgyffwrdd rhwng y themâu ac aseinio polisïau, mae'r canlynol wedi'u nodi o dan y thema hon:

• Polisi Strategol – SP 12: Datblygu Gwledig
• Polisi Strategol – SP 13: Cynnal a Gwella'r Amgylchedd Naturiol
• Polisi Strategol – SP 14: Diogelu a Gwella'r Amgylchedd Adeiledig a Hanesyddol

11.363 Mae'r polisïau canlynol yn ceisio cefnogi'r gwaith o gyflawni amcanion strategol y Cynllun, ond maent hefyd yn darparu cysylltiadau lefel uchel a cydymffurfiaeth eang â'r Nodau Llesiant.

11.364 Mae gan aneddiadau gwledig y Sir rôl bwysig o ran gwella cynaliadwyedd yr ardal ehangach y maent wedi'u lleoli ynddi yn ogystal â chynaliadwyedd cyffredinol y Sir. Mae strategaeth a hierarchaeth aneddiadau'r Cynllun yn adlewyrchu rôl arwyddocaol cymunedau gwledig trwy gefnogi twf ar raddfa gymesur a all wneud cyfraniad cadarnhaol tuag at gynaliadwyedd hirdymor yr economi wledig a chymunedau gwledig.

11.365 Gall datblygu cymesur a sensitif ddarparu'r lefel o dwf y mae ei hangen i gadw a gwella'r gwasanaethau a'r cyfleusterau a ddarperir yn aneddiadau gwledig y Sir. Gall hefyd ddiogelu a hyrwyddo'r Gymraeg mewn ardaloedd gwledig a gwella cyfleoedd cyflogaeth yng nghefn gwlad. Fodd bynnag, mae'r cynllun yn ceisio sicrhau nad yw datblygu a thwf yn cael effeithiau negyddol ar gynaliadwyedd cymuned. Yr allwedd i hyn yw sicrhau na chaniateir datblygu ar raddfa na chyfradd a fyddai'n effeithio ar allu'r gymuned i amsugno ac addasu i dwf a newid. Mae hyn yn hanfodol wrth ystyried yr effeithiau y gall datblygu eu cael ar y seilwaith lleol, bywiogrwydd y Gymraeg a chynaliadwyedd cefn gwlad a'r amgylchedd naturiol.

11.366 Yn hanesyddol mae polisi cynllunio cenedlaethol wedi ceisio cyfyngu ar ddatblygiadau diangen mewn lleoliadau cefn gwlad, yn bennaf er mwyn atal twf gwasgaredig ac anghynaliadwy a gwneud y defnydd gorau o seilwaith, adnoddau a gwasanaethau sydd ar gael yn fwy cyffredin mewn ardaloedd trefol sefydledig.

11.367 Er bod yr egwyddor hon yn dal i fod yn berthnasol a chymwys, mae mwy o gydnabyddiaeth i gefn gwlad fel lle gwaith, fel cartref i lawer, a lle i ymweld ag ef i eraill ac ecosystem hanfodol i bawb. Mae'r Cynllun yn ymrwymedig i fynd i'r afael â chymunedau gwledig a diogelu eu hanghenion. I'r perwyl hwn sefydlodd y Cyngor Grŵp Gorchwyl Materion Gwledig gyda'r nod o asesu anghenion cymunedau gwledig a chymryd camau cadarnhaol i fynd i'r afael â'r rhain. Mae'r Cynllun yn cefnogi nodau'r Grŵp Gorchwyl yn bennaf trwy bolisïau sy'n ymwneud â darparu tai a thai fforddiadwy; yr economi a chyflogaeth; y Gymraeg a'r amgylchedd naturiol. Bydd angen i gynigion datblygu ddangos eu bod yn cyd-fynd â'r polisïau hyn yn ogystal â darpariaethau polisi cynllunio cenedlaethol.

11.368 Mae PCC Rhifyn 10 yn cydnabod bod cefn gwlad yn adnodd deinamig ac amlbwrpas. Mae'n nodi, yn unol â datblygu cynaliadwy a'r egwyddorion cynllunio cenedlaethol, y dylid ei warchod a'i wella lle y bo'n bosibl. Fodd bynnag, mae hefyd yn adlewyrchu'r angen i gydbwyso hyn yn erbyn anghenion economaidd, cymdeithasol a hamdden cymunedau lleol ac ymwelwyr.

11.369 Mae PCC yn nodi y bydd meithrin y gallu i addasu a chydnerthedd yn nod allweddol ar gyfer lleoedd gwledig yn wyneb her sylweddol cynnal ffyniant cymunedau ac argaeledd gwasanaethau yn ogystal â chyfrannu at y nod llesiant cenedlaethol Cymunedau Cydlynus.

11.370 Ceir cydnabyddiaeth glir bod ardaloedd gwledig yn arddangos heriau o ran mynediad at ddulliau trafnidiaeth cynaliadwy a'r disgwyliad yn PCC o ran mynediad at gysylltiadau teithio llesol a chysylltiadau swyddogaethol cynaliadwy. Caiff hyn ei adlewyrchu yn natblygiad yr hierarchaeth aneddiadau yn gyffredinol.

11.371 Mae'r ddealltwriaeth hon am amrywiaeth yn cael ei hadlewyrchu ym Mholisi Cynllunio Cymru yn yr ystyr ei fod yn ystyried gofynion trafnidiaeth gynaliadwy. Mae para 4.1.16 yn cydnabod bod angen adlewyrchu gwahanol ddulliau o ymdrin â thrafnidiaeth gynaliadwy wrth ddiffinio twf mewn aneddiadau gwledig.

11.372 Mae 'r CDLl Diwygiedig hwn yn cydnabod yr amrywiaeth sy'n bodoli o fewn y Sir a'r angen i adlewyrchu hyn yn ei ddull strategol. Mae'r Strategaeth Ofodol yn nodi hierarchaeth aneddiadau ond mae'n ei gosod o fewn fframwaith aneddiadau wedi'i grwpio o dan chwe chlwstwr. Bydd y rhain, a dosbarthiad twf, yn canolbwyntio ar egwyddorion cynaliadwy, ond byddant hefyd yn cydnabod priod rôl, swyddogaeth a chyfraniad aneddiadau o fewn clystyrau penodol.

Yr Economi Wledig

11.373 Mae polisi cenedlaethol yn cydnabod bod economi wledig gref yn hanfodol i gynnal cymunedau gwledig cynaliadwy a ffyniannus. Yn hyn o beth, mae sefydlu mentrau newydd ac ehangu busnesau presennol yn hanfodol i dwf a sefydlogrwydd ardaloedd gwledig.

11.374 Dylid rhoi sylw i effaith datblygiadau o'r fath, ond fel a nodir yn PCC, gellir lleoli llawer o weithgareddau gweithgynhyrchu masnachol ac ysgafn mewn ardaloedd gwledig heb achosi aflonyddwch annerbyniol neu effeithiau niweidiol eraill.

11.375 Er bod ffocws o hyd ar adnabod neu ddyrannu safleoedd i ddiwallu angen am gyflogaeth, cydnabyddir hefyd y bydd angen cyfleoedd ar gyfer cynigion ar raddfa fach lle nad yw'r angen yn cael ei ddiwallu gan ddyraniadau penodol. Mae'r mentrau hyn ar raddfa fach yn gwneud cyfraniad pwysig i'r economi wledig.

11.376 Dylid cyfeirio at ddarpariaethau polisi SP6 a'i fynegiant o ddosbarthiad cynaliadwy darpariaeth tir cyflogaeth.

Anheddau Menter Wledig

11.377 Fel a nodir trwy bolisi cenedlaethol mae angen annedd menter wledig lle mae'n 'galluogi gweithwyr mentrau gwledig i fyw yn eu gweithle neu ger eu gweithle'. Mae hyn yn cynnwys annog pobl iau i reoli busnesau fferm a chefnogi arallgyfeirio ar ffermydd sefydledig.

11.378 Nid rôl na bwriad y CDLl Diwygiedig yw ailadrodd darpariaethau polisi cynllunio cenedlaethol. O ganlyniad, dylid cyfeirio at ddarpariaethau PCC a Nodyn Cyngor Technegol 6 (TAN6)^[32] wrth benderfynu ar geisiadau ar gyfer anheddau menter wledig newydd. Mae polisi cenedlaethol yn datgan yn glir y dylid archwilio cynigion o'r fath yn ofalus i sicrhau bod gwir angen.

11.379 Dylai ceisiadau ar gyfer anheddau menter wledig gael eu hategu gan arfarniad o anheddau menter wledig, a dim ond os yw'n darparu tystiolaeth bendant o'r angen am yr annedd y caiff caniatâd ei roi.

11.380 Er mwyn sicrhau bod anheddau menter wledig yn cael eu cadw at y diben a fwriadwyd mae PCC para 4.2.37 yn ei gwneud yn ofynnol bod amod sy'n cyfyngu ar feddiannaeth ar yr eiddo yn cael ei ddefnyddio a bod yr annedd yn cael ei dosbarthu fel tŷ fforddiadwy (diffiniad a nodir yn Nodyn Cyngor Technegol 2: Cynllunio a Thai Fforddiadwy). Lle y bo'n briodol rhoddir ystyriaeth hefyd i ddefnyddio cytundeb cyfreithiol (adran 106) fel modd i gadw diben yr eiddo fel Annedd Fenter. Bydd hyn yn sicrhau bod yr annedd yn parhau i fod ar gael i ddiwallu'r angen lleol am dai fforddiadwy pe bai ei chyfiawnhad gwreiddiol yn dod i ben.

11.381 Mewn amgylchiadau lle ceir cais cynllunio i godi amodau meddiannaeth amaethyddol presennol neu lle cymerir camau gorfodi am beidio â chydymffurfio â'r amod, rhoddir ystyriaeth i ddisodli amod meddiannaeth amaethyddol gyda'r amod annedd menter wledig a nodir yn TAN6: Cynllunio ar gyfer Cymunedau Gwledig Cynaliadwy^[33].

11.382 Bydd yn ofynnol bod cynigion ar gyfer Datblygiadau Un Blaned yng nghefn gwlad yn darparu ar gyfer anghenion sylfaenol y meddianwyr o ran incwm, bwyd, ynni a thrin gwastraff dros gyfnod o 5 mlynedd^[34]. Dylai unrhyw gynnig gael ei ategu gan gynllun rheoli seiliedig ar dystiolaeth; yn yr achosion hynny lle na ellir dangos hyn, caiff unrhyw gynnig ei ystyried yn erbyn polisïau a darpariaethau'r CDLl hwn a'r polisi cenedlaethol mewn perthynas â datblygiadau yng nghefn gwlad. Byddir yn cyfeirio at ddarpariaethau TAN6 ac mewn perthynas â gofynion y Canllaw Ymarfer Datblygiadau Un Blaned^[35].

11.383 Wrth asesu addasrwydd safle ar gyfer Datblygiad Un Blaned, bydd disgwyl i'r ymgeisydd ystyried ei effaith bosibl ar y dirwedd a bioamrywiaeth, y gallu iddo gael ei sgrinio'n effeithiol yn ogystal â bod yn ddigon agos at Lwybrau Teithio Llesol neu drafnidiaeth gyhoeddus.

11.384 Mae'r polisi'n cydnabod ac yn adlewyrchu cymeriad gwledig y Sir ac ystod a chyflwr y stoc dai. Mae'n ceisio rhoi cyfle a chwmpas i ddarparu anheddau newydd mewn ffordd sy'n sicrhau bod y Sir yn cadw ei chymeriad traddodiadol, gan hefyd beidio â thanseilio nodweddion arbennig Sir Gaerfyrddin wledig.

11.385 Dylid rhoi ystyriaeth benodol i dderbynioldeb effaith weledol cynigion ar y dirwedd. Yn hyn o beth, ni ddylai ei raddfa a'i ddyluniad (gan gynnwys maint y cwrtil preswyl) fod yn anfanteisiol i gymeriad ac ansawdd yr ardal.

11.386 Dim ond os gellir dangos y gwnaed pob ymdrech rhesymol i barhau â defnydd busnes/masnachol neu weithgaredd cymunedol neu sefydlu hynny, fel a nodir ym maen prawf a) uchod, y caniateir ailddefnyddio ac addasu (gan gynnwys trosi) adeilad diwydiannol, masnachol, amaethyddol neu adeilad arall yng nghefn gwlad ar gyfer defnydd preswyl.

11.387 Gellir ystyried cynigion preswyl yn ffafriol lle maent yn rhan o gynllun arfaethedig ar gyfer ailddefnydd busnes. Gellir gosod amodau sy'n ei gwneud yn ofynnol bod y gwaith sy'n angenrheidiol i sefydlu'r busnes/menter yn cael ei gwblhau cyn i'r elfen breswyl gael ei meddiannu. At hynny, gellir defnyddio amod neu rwymedigaeth gynllunio sy'n clymu'r uned breswyl wrth weithrediad y fenter hefyd fel y bo'n briodol.

11.388 Dim ond yr adeiladau hynny sydd o ansawdd pensaernïol priodol a/neu sy'n ymgorffori deunyddiau traddodiadol a gaiff eu hystyried. Yn gyffredinol, ni fydd cynigion ar gyfer adeiladau o saernïaeth fodern, iwtalitaraidd fel unedau ffrâm porth, strwythurau dros dro neu rai sy'n defnyddio deunyddiau fel gwaith bloc concrit, metel neu orffeniadau cladin dalennog eraill yn cael eu hystyried yn briodol i'w haddasu.

11.389 Bydd angen i'r Cyngor fod wedi'i argyhoeddi y gellir sicrhau mannau byw a storio (gan gynnwys garddio) digonol heb yr angen am estyniadau sylweddol i'r adeilad. Yn gyffredinol, ni fydd cynigion i ehangu unedau yn y dyfodol yn cael eu hystyried yn briodol. Yn yr un modd, bydd y Cyngor yn ystyried tynnu'n ôl yr hawliau datblygu a ganiateir arferol i adeiladu estyniadau ac adeiladau atodol.

11.390 Dylid cyfeirio at y CCA mewn perthynas ag Addasu ac Ailddefnyddio Adeiladau Gwledig.

11.391 Mae arallgyfeirio mewn ardaloedd gwledig yn aml yn gallu ychwanegu at ffrydiau incwm a hyfywedd economaidd ffermydd, cryfhau'r economi wledig ac ychwanegu at gyfleoedd cyflogaeth ehangach.

11.392 Bwriedir i gynigion arallgyfeirio ar ffermydd ategu a chefnogi parhad y gweithgarwch ffermio presennol. Ynghyd â'r cynigion, dylid cyflwyno tystiolaeth sy'n rhoi manylion y cyfiawnhad dros y defnydd a'i berthynas â'r gweithgarwch ffermio presennol.

11.393 Lle mae cynnig yn cynnwys siopau fferm, yn aml mae'n rhaid iddynt fewnforio nwyddau sy'n dod o bosibl oddi wrth gyflenwyr lleol eraill. Wrth benderfynu ar gynigion a wneir o dan y polisi hwn, rhoddir ystyriaeth i gyfyngu ar y mathau eang o gynnyrch a werthir ac i'r nifer a werthir. Rhoddir ystyriaeth hefyd i raddfa'r gweithrediad, yn arbennig lle byddai defnydd anghyfyngedig yn arwain at effaith anffafriol ar fywiogrwydd a hyfywedd gweithgareddau manwerthu cyfagos.

11.394 wrth ystyried cynigion ar gyfer arallgyfeirio ar ffermydd, cydnabyddir bod eu cyd-destun gwledig yn golygu na allant gael eu gwasanaethu'n dda gan drafnidiaeth gyhoeddus bob amser. O ganlyniad, er y bydd ei argaeledd yn cael ei gymryd i ystyriaeth wrth ystyried natur a graddfa'r cynnig, cydnabyddir y potensial ar gyfer cynigion arallgyfeirio penodol na ellir ond eu cyrraedd mewn car preifat. Dylai cynigion o'r fath ystyried yr hierarchaeth trafnidiaeth gynaliadwy.

11.395 Lle y bo'n briodol, bydd cytundebau cyfreithiol yn cael eu defnyddio i glymu adeiladau amaethyddol wrth y tir os yw ailddefnydd yn gysylltiedig ag arallgyfeirio ar ffermydd lle mae'n debygol y bydd yr uned amaethyddol yn cael ei darnio.

11.396 Mae Polisi Cynllunio Cenedlaethol yn cydnabod cyfraniad hanfodol economi wledig gref i gefnogi cymunedau gwledig cynaliadwy a ffyniannus. Mae'n ceisio darparu agenda gadarnhaol ar gyfer y potensial i ailddefnyddio adeiladau presennol mewn ardaloedd gwledig at ddibenion busnes.

11.397 Mae cynigion ar gyfer stablau a chyfleusterau marchogol cysylltiedig fel arfer yn gysylltiedig â lleoliad cefn gwlad. Fel arfer bydd angen caniatâd cynllunio ar gyfer datblygu stablau, oni bai bod y ceffylau'n rhan o'r gweithgarwch amaethyddol, neu fod y stabl o fewn cwrtil annedd (sy'n adlewyrchu hawliau datblygu a ganiateir posibl).

11.398 Bydd cynigion nad ydynt yn cael unrhyw effaith niweidiol ar y dirwedd a/neu effaith amgylcheddol niweidiol yn cael eu cefnogi. Yn hyn o beth, bydd disgwyl i gynigion ddangos sut y mae'r datblygiad yn cyd-fynd â'i leoliad cefn gwlad a'r sylw y mae'n ei roi i'r fframwaith aneddiadau a'i leoliad, gan gynnwys adeiladau presennol.

11.399 Dylai codi ménage ar gyfer defnydd domestig preifat gael ei ddylunio fel nad yw'n cael effaith niweidiol ar y dirwedd, ei fod yn dwyn perthynas dda ag adeiladau presennol, a'i fod ar raddfa briodol.

11.400 Ystyrir bod stablau a ménages masnachol yn briodol fel busnesau gwledig lle gellir darparu ar eu cyfer heb niwed i gymeriad yr ardal, a'u bod yn cael eu hystyried yn dderbyniol yn nhermau priffyrdd.

11.401 Mae gan Sir Gaerfyrddin amgylchedd naturiol cyfoethog ac amrywiol gyda nifer o safleoedd dynodedig a rhywogaethau a warchodir. Mae'r polisi hwn yn ceisio cydnabod ansawdd a gwerth yr amgylchedd naturiol a thirweddau ar draws ardal y cynllun, a'u rôl hanfodol o ran diffinio hunaniaeth, cymeriad ac unigrywiaeth y Sir. Mae cydnabyddiaeth i rinweddau sylweddol seilwaith gwyrdd ar gyfer cynnal a gwella bioamrywiaeth a rhwydweithiau ecolegol yn ymhlyg. Cyfeirir at y polisi Rhwydwaith Seilwaith Gwyrdd PSD3.

11.402 Mae diogelu a gwella'r elfennau hyn yn elfen bwysig o'r Strategaeth, sy'n ceisio adlewyrchu nid dim ond y dynodiadau rhyngwladol a chenedlaethol hynny, ond hefyd gyfraniad safleoedd a thirweddau ar y lefel leol. Bydd y CDLl hefyd yn ceisio gwarchod a gwella adnoddau naturiol megis geoamrywiaeth ac ansawdd dŵr, pridd ac aer.

11.403 Mae'r polisi hwn hefyd yn cydnabod elfennau'r amgylchedd naturiol sy'n aml yn gydgysylltiedig a'u cyfraniad at gynnal a gwella bioamrywiaeth, yn ogystal â chreu mannau deniadol a chydlynus ar gyfer cymunedau, a llesiant poblogaeth Sir Gaerfyrddin.

11.404 Mae gwarchod a gwella cysylltedd, a'r cyfraniad a wna i ansawdd tirwedd, amgylchedd naturiol a bioamrywiaeth Sir Gaerfyrddin, yn ystyriaeth bwysig. O ganlyniad, bydd effaith bosibl y Cynllun, ei bolisïau, a'i gynigion ar fuddiannau cadwraeth natur, gwerth amwynder, ansawdd dŵr/pridd/aer, hydroleg, daeareg a chyfundrefnau geomorffolegol yn parhau i lywio'r broses o lunio'r cynllun.

11.405 Mae Asesiad Rheoliadau Cynefinoedd wedi'i gynnal i asesu effeithiau'r Cynllun ar safleoedd a warchodir gan Ewrop, gan gynnwys y rhai sy'n cael eu hystyried ar gyfer eu dynodi.

11.406 Er bod y Cynllun yn cydnabod yr angen am ddatblygiad newydd at ddibenion cymdeithasol ac economaidd, lle y bo'n briodol bydd y Cyngor yn ceisio diogelu nodweddion amgylcheddol Sir Gaerfyrddin. Mae'r Cynllun hefyd yn ceisio sicrhau bod yr amgylchedd naturiol yn cael ei ddiogelu a'i wella trwy bolisi manwl.

11.407 Hefyd, a chan adlewyrchu'r dyletswyddau a osodir ar Awdurdodau Lleol, mae'r Cynllun yn rhoi sylw i ddynodiad y Parc Cenedlaethol a'r diben y'i dynodwyd ar ei gyfer, lle gall effeithio ar ystyriaeth i gynigion cynllunio.

11.408 Mae Gwarchodfeydd Natur Lleol a Safleoedd Daearegol/Geomorffolegol o Bwys Rhanbartholyn nodi ardaloedd sydd o bwysigrwydd lleol ar gyfer cadwraeth natur a gwerth daearegol, a gallant gynnwys safleoedd sy'n cynnwys amrywiaeth o fathau o gynefinoedd neu sy'n cynnal ystod o rywogaethau. Gall diogelu'r safleoedd hyn wneud cyfraniad pwysig i ddyletswydd y Cyngor o dan Adran 6 o Ddeddf yr Amgylchedd (Cymru) 2016. Mae'r nodweddion hyn hefyd yn werthfawr o ran eu cyfraniad i ansawdd yr amgylchedd lleol ac o ran ei gwneud yn bosibl addasu a bod yn gydnerth yn wyneb y newid yn yr hinsawdd.

11.409 O dan amgylchiadau lle gallai'r angen am ddatblygiad wrthbwyso'r angen i ddiogelu safle penodol, yna bydd effaith yn cael ei hosgoi, ei lleihau i'r eithaf a'i lliniaru hyd y bo'n bosibl. Pan fydd effeithiau gweddillol yn parhau, caiff mesurau eu rhoi ar waith i sicrhau bod darpariaeth cynefinoedd bywyd gwyllt amgen neu fesurau creu cynefinoedd yn cael eu darparu er mwyn sicrhau nad oes colled net yng ngwerth cadwraeth yr ardal neu'r nodwedd ar y cyfan. Lle y bo'n briodol, bydd yr awdurdod yn ystyried defnyddio amodau a/neu rwymedigaethau cynllunio i ddarparu mesurau lliniaru a/neu gydbwyso priodol.

11.410 Mae Safleoedd o Bwysigrwydd ar gyfer Gwerth Cadwraeth Natur yn cynnig potensial sylweddol fel adnodd bioamrywiaeth. Er nad oes unrhyw Safleoedd o Bwysigrwydd ar gyfer Gwerth Cadwraeth Natur wedi'u nodi yn ardal y Cynllun, mae mynd ati'n frwd i archwilio dynodiadau o'r fath yn dal yn un o amcanion yr awdurdod. Bydd unrhyw ddynodiad ar gyfer Safleoedd o Bwysigrwydd ar gyfer Gwerth Cadwraeth Natur yn y dyfodol yn unol â'r CCA sy'n dod i'r amlwg ac sy'n nodi'r fethodoleg ddiwygiedig ar gyfer eu hadnabod. Bydd y CCA hyn yn cael eu cynhyrchu ar yr un pryd ag y bydd y Cynllun yn cael ei fabwysiadu.

11.411 Mae'r polisi hwn yn ceisio sicrhau bod y cynefinoedd a'r rhywogaethau a nodir yn Adran 7 Deddf yr Amgylchedd (Cymru) 2016 yn cael eu diogelu'n addas rhag datblygu niweidiol a bod y Cyngor yn cyflawni ei rwymedigaeth i gynnal a gwella bioamrywiaeth a hyrwyddo cydnerthedd ecosystemau. Dylid cyfeirio'n llawn at y CCA Cadwraeth Natur a Bioamrywiaeth. Mae'r CCA hyn yn cynnwys canllawiau i ddatblygwyr a dylent fod o gymorth i weithredu'r polisi hwn a'r CDLl. Lle y bo'n berthnasol, bydd rôl cynefinoedd ac ardaloedd cysylltiedig fel llwybrau cysylltedd, 'rhwydweithiau ecolegol' neu 'rwydweithiau coridor anifeiliaid' yn cael ei hystyried (dylid cyfeirio at Bolisi NE3).

11.412 Lle y bo angen, dylai cynlluniau rheoli sy'n manylu ar faterion megis mesurau lliniaru gael eu cynhyrchu fel rhan o unrhyw gais, a'u cytuno gyda'r awdurdod cyn y rhoddir caniatâd. Dylai trefn fonitro y cytunwyd arni gael ei chyflwyno gyda'r mesurau lliniaru arfaethedig. Gall mesurau lliniaru gynnwys dylunio ac amserlennu gwaith yn ofalus, gan ystyried datblygu fesul cyfnod fel bod amseriad unrhyw waith yn tarfu gyn lleied â phosibl.

11.413 Lle y bo angen, dylai cynigion datblygu geisio gwella bioamrywiaeth. Pan fo angen gwella bioamrywiaeth a lle na chynigir hynny fel rhan o gais, rhoddir pwysau sylweddol ar ddiffyg hynny, ac oni bai bod ystyriaethau perthnasol sylweddol eraill yn nodi fel arall bydd angen gwrthod caniatâd^[37]. Bydd yn ofynnol bod cynigion datblygu'n asesu priodoleddau cydnerthedd ecosystemau yn unol â'r fframwaith a amlinellir ym mharagraff 6.4.9 o PCC10 a bydd disgwyl iddynt ddiogelu a gwella'r priodoleddau hyn ar ôl datblygu.

11.414 O dan amgylchiadau eithriadol, gallai'r angen am ddatblygiad wrthbwyso'r angen i ddiogelu safle penodol. Mewn achosion o'r fath, bydd effaith yn cael ei hosgoi, ei lleihau i'r eithaf a'i lliniaru hyd y bo'n bosibl a phan fydd effeithiau gweddillol yn parhau, caiff mesurau eu rhoi ar waith i sicrhau bod darpariaeth cynefinoedd bywyd gwyllt amgen neu fesurau creu cynefinoedd yn cael eu darparu er mwyn sicrhau nad oes colled net ym mioamrywiaeth yr ardal neu'r nodwedd ar y cyfan.

11.415 Bydd lleoliad a graddfa datblygiad, gan gynnwys natur y cynefinoedd ar y safle a'r ardal gyfagos yn ystyriaeth yn natur unrhyw reolaeth y mae ei hangen.

11.416 Dylai effeithiau posibl datblygiad, naill ai'n unigol neu'n gronnol, gael eu hystyried yn ofalus wrth benderfynu ar unrhyw gynnig. Yn hyn o beth, gall effaith sŵn, dirgryndod, draenio, goleuadau, traffig ac ystyriaethau o ran ansawdd aer ddwyn goblygiadau yn ystod y broses adeiladu neu ar ôl cwblhau unrhyw ddatblygiad.

11.417 Bydd y defnydd o amodau cynllunio a/neu rwymedigaethau cynllunio yn cael ei ystyried lle bo hynny'n briodol.

11.418 Mae'r polisi hwn yn ceisio sicrhau bod coridorau, rhwydweithiau a nodweddion unigryw ecolegol yn cael eu diogelu a'u rheoli'n briodol. Mae'r rhain yn cynnwys nodweddion sydd, oherwydd eu strwythur llinol a pharhaus neu eu swyddogaethau fel 'camau graddol' neu 'goridorau bywyd gwyllt', yn hanfodol ar gyfer lleihau darniad cynefinoedd a rhoi anogaeth ar gyfer mudo a gwasgariad ecolegol neu gyfnewid genetig. Gall diogelu'r nodweddion hyn wneud cyfraniad pwysig i ddyletswydd y Cyngor o dan Adran 6 o Ddeddf yr Amgylchedd (Cymru) 2016. Mae'r rhain hefyd yn werthfawr o ran eu cyfraniad i ansawdd yr amgylchedd lleol ac o ran ei gwneud yn bosibl addasu a bod yn gydnerth yn wyneb y newid yn yr hinsawdd.

11.419 Mae'r nodweddion a fydd yn cyfrannu yn cynnwys: llwyni, ffosydd a chloddiau, waliau cerrig, nentydd, lleiniau cysgodi o goed, coetiroedd, hen goed, parcdiroedd, lonydd gwyrdd, coridorau afonydd, llynnoedd, pyllau, ymylon ffyrdd, neu fosaig cynefinoedd neu rwydweithiau o gynefinoedd eraill sy'n bwysig yn lleol gan gynnwys corsydd mawn, gweundir, gwlypdiroedd, morfeydd heli, twyni tywod a glaswelltiroedd sy'n gyforiog o rywogaethau.

11.420 Mae darparu cysylltedd ecolegol yn un o wasanaeth ecosystemau pwysig y Rhwydwaith Seilwaith Gwyrdd ac mae ei ddiogelu a/neu ei wella yn gyson â Pholisi PSD3 Rhwydwaith Seilwaith Gwyrdd. Wrth nodi'r nodweddion hyn a rhoi'r polisi hwn ar waith, dylid cyfeirio at yr Asesiad Seilwaith Gwyrdd a'r gwaith mapio cysylltiedig.

11.421 Gall datblygiadau fynd ymlaen yn ardal CCA Caeau Mynydd Mawr ar yr amod na fydd unrhyw effaith sylweddol debygol amlwg ar Ardal Cadwraeth Arbennig Caeau Mynydd Mawr (ACA CMM). I'r perwyl hwn, bydd y Cyngor (lle bo'n briodol) yn ceisio cyfraniadau gan ddatblygwyr i ariannu gwaith y Cyngor i gyflawni prosiect rheoli cynefinoedd y Cyngor yn ardal y CCA. Mae rhagor o wybodaeth ar gael yng Nghanllawiau Cynllunio Atodol Caeau Mynydd Mawr (CCA ACA CMM).

11.422 O ran darparu sicrwydd a ffocws gofodol, mae CCA CMM yn egluro disgwyliadau ar bob parti. Mae'r CCA yn darparu mecanwaith i ddatblygwyr geisio lliniaru effaith eu cynigion ar yr ACA trwy gyfrannu at brosiect rheoli cynefinoedd CMM y Cyngor. Er mwyn sicrhau bod y CDLl yn cydymffurfio â'r Rheoliadau Cynefinoedd, bydd y Cyngor (lle y bo'n briodol) yn rhoi blaenoriaeth i sicrhau rhwymedigaethau mewn perthynas ag ACA Caeau Mynydd Mawr ar gyfer cynigion sydd wedi'u lleoli o fewn Ardal CCA CMM. Gall y Cyngor hefyd (lle bo'n briodol) ofyn am wybodaeth fanwl bellach gan ddatblygwyr er mwyn goleuo'r broses o benderfynu ar geisiadau cynllunio.

11.423 Nodir Ardal CCA Caeau Mynydd Mawr ar y Map cynigion. Mae 'r CCA yn seiliedig ar dystiolaeth gadarn. Er nad yw'r CCA yn dadlau o blaid dull haearnaidd / cyffredinol o gyfrifo swm y cyfraniadau gan ddatblygwyr sy'n ofynnol gan y Cyngor, mae'n nodi rhestr codi tâl y mae'n rhaid iddi fod yn fan cychwyn ar gyfer pob trafodaeth. Dylid cyfeirio at y CCA o ran unrhyw gyfraniadau arfaethedig 'mewn nwyddau'.

11.424 Yn eithriadol, ac yn gwbl unol â darpariaethau'r CCA, gall y swm y cytunwyd arno fel cyfraniad fod yn amodol ar drafodaeth.

11.425 Mae gan gynlluniau amddiffyn yr arfordir rôl bwysig o ran diogelu poblogaeth, asedau ac adnoddau'r Sir rhag llifogydd llanwol ac erydu. Mae'r polisi hwn yn ceisio sicrhau bod cynlluniau rheoli arfordirol yn cael eu llunio mewn lleoliadau priodol, ac nad ydynt yn cael effaith niweidiol ar y dirwedd o'u hamgylch. Bydd yn ofynnol i gynlluniau roi sylw i ddiogelu rhywogaethau a chynefinoedd yn unol â Pholisi Strategol SP13.

11.426 Bydd anogaeth yn cael ei rhoi i gynnwys cyfleusterau hamdden a mynediad cyhoeddus priodol o fewn cynlluniau.

11.427 Ni chaniateir cynlluniau rheoli arfordirol newydd at ddibenion galluogi datblygiad newydd mewn ardaloedd lle ceir perygl llifogydd neu erydu arfordirol.

11.428 Bydd disgwyl i gynigion ystyried cynnwys Cynllun Rheoli Traethlin De Cymru (Trwyn Larnog i Benrhyn y Santes Ann) (CRhT2). Mae'r CRhT yn ceisio lleihau'r peryglon hyn i bobl ac i'r amgylcheddau datblygedig, hanesyddol a naturiol, ac yn nodi sut y dylid rheoli'r arfordir yn y dyfodol trwy nifer o bolisïau rheoli perygl llifogydd ac erydu arfordirol hirdymor cynaliadwy ar gyfer yr arfordir.

11.429 Cyfeirir yn benodol at Bolisi NE7: Ardal Rheoli Newid Arfordirol a'i gyd-destun mewn perthynas â datblygiadau o fewn, neu yr effeithir arnynt gan, bolisïau 'dim ymyriad gweithredol' ac 'adlinio a reolir' yn y CRhT.

11.430 Mae'r cynigion sydd yn y CDLl hwn wedi'u paratoi gan roi sylw dyledus i'r polisïau a nodir yn CRhT2.

11.431 Mae gan Sir Gaerfyrddin ardal helaeth o forlin, sy'n ymestyn o aber Afon Llwchwr i Marros. Gellir diffinio'r ardal arfordirol fel ardaloedd lle mae'r tir a'r môr cyfagos yn cael eu hystyried yn gyd-ddibynnol ar ei gilydd.

11.432 Anaml y bydd yr arfordir sydd heb ei ddatblygu yn cael ei ystyried fel y lleoliad mwyaf priodol ar gyfer datblygu, a dylai unrhyw gynigion ystyried cynnwys SMP2, yn ogystal â pholisïau eraill y Cynllun.

11.433 Mae materion sy'n gysylltiedig â newid arfordirol yn cynnwys: risgiau erydu, llifogydd, ansadrwydd tir, y dulliau a ffefrir i fynd i'r afael â risgiau o'r fath, a'r effeithiau ar fioamrywiaeth a chydnerthedd ecolegol.

11.434 Cyfeirir at bolisi NE7: Ardal Rheoli Newid Arfordirol a'i gyd-destun mewn perthynas â datblygiadau o fewn, neu yr effeithir arnynt gan, bolisïau 'dim ymyriad gweithredol' ac 'adlinio a reolir' CRhT2.

11.435 Fel gyda pholisi RE6, dylid ystyried CRhT2 sy'n gosod ystod o bolisïau ar gyfer y morlin, sef 'cadw'r llinell', 'dim ymyriad gweithredol' neu 'adlinio rheoledig', fesul cyfnod polisi (sef: hyd at 2025, 2026 - 2055, a 2056 - 2105).

11.436 Gellir gweld y CRhT2 yn www.southwalescoast.org. Mae PCC yn nodi y dylai Awdurdodau Lleol helpu i leihau perygl llifogydd ac effaith erydu arfordirol trwy osgoi datblygu amhriodol mewn ardaloedd sydd dan fygythiad.

11.437 Mae'r Ardal Rheoli Newid Arfordirol yn cynrychioli lle mae'r polisi CRhT2 a dderbynnir ar gyfer 'dim ymyriad gweithredol' neu 'adlinio rheoledig' yn ystod cyfnod y cynllun.

11.438 Nid ystyrir bod datblygiad preswyl newydd yn addas yn yr Ardal Rheoli Newid Arfordirol. Mae hyn yn adlewyrchu lefel y perygl o erydu arfordirol a llifogydd yn yr ardaloedd hyn. Bydd gweithredu'r dull hwn yr un mor berthnasol i gynigion i newid defnydd adeiladau parhaol eraill i lety preswyl ac anheddau yn lle rhai blaenorol, ac mae'n rhan o ymagwedd ragofalus a arweinir gan yr ystyriaethau polisi a nodir yn y CRhT2.

11.439 Mae'r math o ddefnydd preswyl y mae hyn yn berthnasol iddo yn cynnwys anheddau unigol, fflatiau uwchlaw eiddo masnachol presennol, tai gwarchodol, llety myfyrwyr, hosteli, tai a rennir i bobl anabl, cartrefi nyrsio a chartrefi gofal, addysg breswyl, carafannau sefydlog a chabannau gwyliau (gan gynnwys y rhai sy'n gysylltiedig â hamdden a thwristiaeth) lle maent wedi'u cysylltu â seilwaith ac yn rhan o safle a chanolfannau hyfforddi sefydledig a wasanaethir yn llawn.

11.440 Bydd amodau cynllunio yn cael eu cymhwyso, neu bydd rhwymedigaeth gynllunio yn cael ei sicrhau lle bo angen: cyfyngu ar fywyd cynlluniedig datblygiad neu ddefnydd tymhorol; dileu datblygiad sydd â therfyn amser arno neu anheddau presennol pan ddaw'r defnydd i ben; adolygu caniatadau cynllunio perthnasol; rheoli meddiannaeth ar annedd a adleolwyd.

11.441 Er mwyn galluogi cymunedau arfordirol i addasu i newid arfordirol, mae'r Polisi yn hwyluso adleoli a disodli anheddau parhaol i leoliadau amgen sy'n ddiogel rhag erydu arfordirol. Mae'n ceisio sicrhau bod cymunedau arfordirol yn parhau i fod yn gynaliadwy trwy gynnal lefelau'r stoc dai a lleihau'r risg i bobl ac eiddo.

11.442 Lle y mae angen caniatâd ar gyfer estyniad i eiddo preswyl, fe'i cefnogir lle gellir dangos bod y manteision i'r perchentywr yn drech nag unrhyw gynnydd yn y risg i'r eiddo. Fodd bynnag, rhaid ystyried llesiant y meddianwyr, y perygl i fywyd o ganlyniad i lifogydd, neu erydiad.

11.443 Bydd datblygiadau dibreswyl yn amodol ar yr amserlen a ragwelir ar gyfer colli'r eiddo o ganlyniad i erydu arfordirol. Byddai hyn yn berthnasol i gynigion ar gyfer defnyddiau megis cyfleusterau cymunedol, defnydd busnes, meysydd chwaraeon a chaeau chwarae. Dylai'r asesiad risg ystyried y buddiannau'n llawn yn erbyn y risgiau sy'n gysylltiedig â defnyddio eiddo a allai fod yn gyfyngedig ei oes.

11.444 Lle y bo'n briodol, gellir defnyddio caniatâd cynllunio am gyfnod cyfyngedig i reoli oes arfaethedig datblygiad newydd. Byddai hyn yn caniatáu rheolaeth dros ddyfodol y datblygiad a'r perygl posibl i eiddo a phobl lle bo hynny'n briodol.

11.445 Mae gan Sir Gaerfyrddin dreftadaeth adeiledig hanesyddol a diwylliannol gyfoethog ac amrywiol gydag ystod o Ardaloedd Cadwraeth, Adeiladau Rhestredig a Henebion Cofrestredig. Mae cydnabod treftadaeth adeiledig ardal y Cynllun a'i chadwraeth yn hanfodol i ddarparu ymdeimlad o hanes, cymeriad, ac ymdeimlad o le.

11.446 Mae ardal y Cynllun hefyd yn cynnwys safleoedd a nodweddion archeolegol sydd wedi'u darganfod, ac sydd eto i'w darganfod. Nod y Polisi a'r Cynllun, ar y cyd â deddfwriaeth sylfaenol ar yr amgylchedd adeiledig ac adeiladau hanesyddol, yw diogelu cyfanrwydd diwylliannol y r aneddiadau, nodweddion ac adeiladau hanesyddol yn ardal y Cynllun. Lle y bo'n berthnasol, mae hefyd yn ceisio cyfrannu at wella'r amgylchedd hanesyddol ac adeiledig. Mae hyn yn cydnabod bod ein hasedau hanesyddol yn adnoddau anadnewyddadwy a bod eu cadwraeth yn darparu manteision cymdeithasol, diwylliannol, economaidd ac amgylcheddol.

11.447 Dylai adeiladau hanesyddol, treflun a thirwedd y Sir gael eu hystyried yn asedau a chael eu gwarchod a'u gwella'n gadarnhaol er budd trigolion ac ymwelwyr fel ei gilydd. Effeithir ar y rhain nid dim ond gan newid ac esgeulustod ond hefyd newidiadau i'w lleoliad. Gan hynny, mae hyn yn ystyriaeth bwysig wrth wneud penderfyniadau ar gynigion a allai gael effaith.

11.448 Mae llawer o elfennau o amgylchedd adeiledig a hanesyddol y Sir yn cael eu diogelu trwy ddeddfwriaeth neu ddarpariaethau polisi eraill, a chan hynny nid oes angen polisïau i ymdrin â hwy yn y CDLl diwygiedig. Felly nid yw'r Cynllun yn cynnwys polisïau mewn perthynas â nodweddion ar y dreftadaeth adeiledig megis Henebion Cofrestredig gan eu bod yn cael eu diogelu'n ddigonol mewn mannau eraill.

11.449 Fodd bynnag, ceir agweddau sy'n ymwneud â diogelu'r amgylchedd hanesyddol y gellir mynd i'r afael â hwy drwy'r CDLl diwygiedig, yn enwedig y rhai sy'n ymwneud â nodweddion lleol ac adeiladau lleol.

11.450 Mae canllawiau a deddfwriaeth eglur mewn perthynas â'r canlynol i'w cael o fewn PCC: Rhifyn 10 – Pennod 6: Gwarchod yr Amgylchedd Hanesyddol, a Pholisi SP13 – Cynnal a Gwella'r Amgylchedd Naturiol

11.451 Naturiol sy'n cydnabod pwysigrwydd ardaloedd a nodweddion o'r fath yn y Sir:

• Parciau a Gerddi Hanesyddol^[38] - Mae llawer o barciau a gerddi yn hanesyddol arwyddocaol ac wedi'u rhestru yn y Gofrestr Parciau a Gerddi Hanesyddol yng Nghymru. Mae'r ardaloedd hyn hefyd wedi'u diffinio ar Fap Cynigion y CDLl;
• Tirweddau hanesyddol^[39]
• Gweddillion archeolegol^[40]
• Datblygiadau Galluogi^[41] - mae PCC yn nodi'r darpariaethau y byddai cynnig galluogi yn cael ei ystyried drwyddynt
• Henebion Cofrestredig – caiff y rhain eu diffinio ar y Map Cynigion

11.452 Bydd yr awdurdod yn paratoi CCA fel y bo'n briodol a lle bo angen mewn perthynas â'r Amgylchedd Hanesyddol ac Adeiledig.

11.453 Lle mae cynnig yn un ar gyfer adeilad newydd o fewn ardal gadwraeth, dylai roi sylw i'r canlynol:

• Golygfeydd, fistâu, strydluniau, toeau, coed, mannau agored, bylchau a nodweddion eraill pwysig sy'n cyfrannu at gymeriad neu ymddangosiad yr ardal gadwraeth;
• Ffiniau hanesyddol arwyddocaol neu elfennau eraill sy'n cyfrannu at y ffurf sefydledig ar ddatblygu;
• Y berthynas â'r adeiladau, mannau presennol, a ffurf anheddu sydd eisoes yn bodoli;
• Graddfa, taldra a dwysedd, dyluniad pensaernïol, a deunyddiau.

11.454 Nodweddir Sir Gaerfyrddin gan adnoddau tirwedd amrywiol ac o ansawdd da ac ardaloedd o werth gweledol nodedig. Mae hefyd yn cynnwys amrywiaeth o ddynodiadau tirwedd rhyngwladol a chenedlaethol.

11.455 Mae priodoleddau tirwedd allweddol y Sir yn amrywiol ac yn cynnwys ardaloedd ucheldirol, gwastatiroedd arfordirol a dyffrynnoedd afonydd o werth tirwedd a phwysigrwydd ecolegol uchel. Mae'r rhain yn darparu manteision amgylcheddol, economaidd a chymdeithasol sylweddol ac yn helpu i greu ymdeimlad o le.

11.456 Mae'r Polisi yn ceisio diogelu, cynnal a, lle y bo'n briodol, gwella cymeriad ac ansawdd tirwedd Sir Gaerfyrddin gyda'r nodweddion hynny sy'n cyfrannu at gymeriad unigryw'r Sir yn cael mesurau gwarchod ar lefelau priodol gyda'u harwyddocâd yn cael ei amlygu gan ddefnyddio adnodd LANDMAP Cyngor Cefn Gwlad Cymru gynt.

Sylwer: Adnodd tirwedd sy'n seiliedig ar System Gwybodaeth Ddaearyddol yw LANDMAP lle caiff nodweddion tirwedd, ei phriodweddau a dylanwadau ar y dirwedd eu cofnodi a'u gwerthuso i greu set ddata sy'n gyson yn genedlaethol.

11.457 Bydd y polisi, felly, yn cael ei gefnogi gan Ganllawiau Cynllunio Atodol (CCA) ar Asesiad Cymeriad Tirwedd LANDMAP. Bydd y CCA hyn yn adeiladu ar y gwaith a wnaed a'r darpariaethau polisi o ran Creu Lleoedd a Seilwaith Gwyrdd wrth ddatblygu cyfres integredig o ddogfennau canllaw i lywio cynigion datblygu.

11.458 Bydd y CCA hyn yn nodi ac yn disgrifio ardaloedd a mathau o gymeriad tirwedd nodedig ledled ardal y cynllun.

11.459 Yn hyn o beth pwrpas y polisi yw adlewyrchu hynodrwydd, nodweddion a sensitifrwydd penodol cydrannau tirwedd y sir.

Cysylltiadau Cryf - Pobl, lleoedd a sefydliadau sydd wedi'u cysylltu'n gryf ac sy'n gallu addasu i newid

11.460 Mae'r CDLl Diwygiedig hwn yn ceisio deall a chydnabod rôl cymuned ac ymdeimlad o le trwy geisio dosbarthu datblygiadau newydd mewn modd sy'n cydnabod ac yn parchu rôl a swyddogaeth ein aneddiadau.

11.461 Trwy ddosbarthu twf mewn modd cynaliadwy mae'n cydnabod gwerth cysylltedd. Mae'r Cynllun yn ceisio helpu i greu cymunedau cysylltiedig sy'n gydnerth, yn ffyniannus ac yn gallu meithrin llesiant ymysg trigolion.

11.462 Trwy greu Sir gydnerth, gysylltiedig a chynaliadwy, mae'r Cynllun yn ceisio adlewyrchu'r heriau sy'n wynebu ein cymunedau a'r angen i ymateb yn gadarnhaol. Mae'n pennu fframwaith i gyfrannu at fynd i'r afael â'r newid yn yr hinsawdd ac yn datblygu strategaeth ac agenda bolisi sy'n canolbwyntio ar ddatblygu cynaliadwy, gan gydnabod amrywiaeth y Sir ar yr un pryd.

11.463 Er y cydnabyddir bod gorgyffwrdd rhwng y themâu ac aseiniad polisïau, nodwyd y canlynol o dan y thema hon:

• Polisi Strategol – SP 15: Y Newid yn yr Hinsawdd
• Polisi strategol – SP 16: Dosbarthiad Cynaliadwy – Fframwaith Aneddiadau
• Polisi strategol – SP 17: Trafnidiaeth a Hygyrchedd
• Polisi strategol – SP 18: Adnoddau Mwynol
• Polisi strategol – SP 19: Rheoli Gwastraff

11.464 Mae'r polisïau canlynol yn ceisio cefnogi'r gwaith o gyflawni amcanion strategol y cynllun, ond maent hefyd yn darparu cysylltiadau lefel uchel a cydymffurfiaeth eang â'r Nodau Llesiant.

11.465 Mae'r angen i fynd i'r afael â'r newid yn yr hinsawdd yn her sylfaenol os yw datblygu cynaliadwy a'r rhwymedigaethau o dan Ddeddf Llesiant Cenedlaethau'r Dyfodol 2015 yn mynd i gael eu cyflawni. Bydd y goblygiadau economaidd, cymdeithasol ac amgylcheddol sy'n deillio o'r newid yn yr hinsawdd yn ddwys a bydd methu â mynd i'r afael ag ef yn golygu bod unrhyw ymdrech i gynllunio ar gyfer cynaliadwyedd yn aflwyddiannus.

11.466 Mae'r hinsawdd newidiol a'r effeithiau i Gymru a ragwelir gan Raglen Effeithiau Hinsawdd y DU (UKCIP) yn cyflwyno heriau difrifol i'r system gynllunio. Wrth fynd i'r afael â hwy, mae Polisi Cynllunio Cymru (PCC) yn nodi cyfres o amcanion y dylid eu hystyried wrth baratoi cynllun datblygu.

11.467 Mae'r CDLl yn categoreiddio aneddiadau yn hierarchaeth sy'n adlewyrchu eu cynaliadwyedd cymharol ac yn ystyried yr hierarchaeth trafnidiaeth gynaliadwy. Mae dyhead y Cynllun i leihau'r angen i deithio, yn enwedig mewn car modur preifat, a'i rôl gyfrannol tuag at hwyluso strategaeth trafnidiaeth integredig yn ceisio cyfeirio datblygiadau at leoliadau priodol sy'n cyflawni hyn.

11.468 Mae effaith bosibl perygl llifogydd yn un o'r ystyriaethau pwysig wrth asesu priodoldeb safleoedd i'w cynnwys yn y CDLl. Yn hyn o beth, mabwysiedir dull rhagofalus wrth nodi safleoedd i'w cynnwys yn y Cynllun. Wrth ystyried unrhyw gynigion mewn perthynas â llifogydd rhoddir sylw i ddarpariaethau Polisi Cynllunio Cymru a TAN15: Datblygu a Pherygl Llifogydd sy'n rhoi canllawiau ar asesu datblygiadau sy'n wynebu perygl llifogydd.

11.469 Bydd angen i gynigion yr effeithir arnynt gan berygl llifogydd gyflwyno Asesiad o Ganlyniadau Llifogydd fel rhan o unrhyw gais cynllunio a bydd y Cyngor yn ymgynghori â Cyfoeth Naturiol Cymru (CNC). Os yw perygl llifogydd yn effeithio'n rhannol ar safle, bydd angen i'r datblygwr ystyried effaith y perygl ar y gallu i ddatblygu gweddill y safle. Lle y bo'n briodol, dylent wneud y gwaith tystiolaethol angenrheidiol (gan gynnwys asesiad o ganlyniadau llifogydd a/neu arolwg topograffigol) i raddau sydd wrth fodd Cyfoeth Naturiol Cymru. Dylid rhoi sylw i bolisi CCH4: Rheoli ac Osgoi Perygl Llifogydd a gynhwysir yn y Cynllun hwn.

11.470 Bydd disgwyl i ddatblygiadau ddangos egwyddorion dylunio da i hyrwyddo defnydd effeithlon o adnoddau, gan gynnwys lleihau gwastraff a'r llygredd a gynhyrchir i'r eithaf, a chynyddu effeithlonrwydd ynni a defnydd effeithlon o adnoddau eraill i'r eithaf. Dylid cyfeirio at bolisi SP19 mewn perthynas â gwastraff a'r hierarchaeth gwastraff a lleihau gwastraff i'r eithaf.

11.471 Bydd disgwyl i gynigion datblygu wneud defnydd llawn a phriodol o dir. Dylai effeithiau posibl y newid yn yr hinsawdd fod yn ganolog i'r broses ddylunio, gan gynnwys y cyfraniad y gall lleoliad, dwysedd, cynllun a ffurf adeiledig ei wneud tuag at ddatblygiadau sy'n ymateb i'r hinsawdd.

11.472 Mae Llywodraeth Cymru wedi ymrwymo i ddefnyddio'r system gynllunio i optimeiddio ynni adnewyddadwy a chynhyrchu ynni carbon isel. Mae PCC yn nodi y gall Awdurdodau Cynllunio Lleol wneud darpariaeth gadarnhaol trwy ystyried y cyfraniad y gall eu hardal ei wneud tuag at ddatblygu a hwyluso ynni adnewyddadwy a charbon isel, a galluogi'r cyfraniad hwn i gael ei gyflawni. Pennwyd targedau ynni adnewyddadwy gan Lywodraeth Cymru; un targed yw bod Cymru'n cynhyrchu 70% o'r trydan a ddefnyddir o ynni adnewyddadwy erbyn 2030.

11.473 Rhoddir anogaeth ar gyfer cynigion/defnyddiau tir ac arferion rheoli tir lle maent yn helpu i ddiogelu ac amddiffyn dalfeydd carbon (gan gynnwys mawn). Bydd dull o'r fath yn gwella cydnerthedd yn wyneb effeithiau'r newid yn yr hinsawdd ac yn lleihau'r ffactorau sy'n achosi'r newid yn yr hinsawdd trwy ddiogelu dalfeydd carbon a thrwy fod yn ffynhonnell ynni cynaliadwy.

11.474 Mae PCC yn nodi canllawiau clir o ran y gofynion ar gyfer datblygiadau sy'n ymateb i'r hinsawdd ac adeiladau cynaliadwy. Dylid cyfeirio at y Cyfarwyddyd Ymarfer – Cynllunio ar gyfer Adeiladau Cynaliadwy (Llywodraeth Cymru, 2014).

11.475 Mae'r Polisi hwn yn berthnasol i bob datblygiad ynni adnewyddadwy a charbon isel y mae angen caniatâd cynllunio ar ei gyfer, ac mae'n nodi'r meini prawf y bydd cynigion yn cael eu hasesu yn eu herbyn. Mae'r datblygiadau hyn yn cynnwys ffermydd gwynt ar y tir, tyrbinau gwynt, technoleg solar, biomas, ynni o wastraff, pŵer trydan dŵr a gwres a phŵer cyfunedig.

11.476 Mae'r Polisi hwn yn ategu ymrwymiad Llywodraeth Cymru i leihau ein dibyniaeth ar ynni a gynhyrchir o danwyddau ffosil ac i fynd ati'n frwd i reoli'r newid i economi carbon isel.

Asesiad Ynni Adnewyddadwy

11.477 Cwblhawyd Asesiad Ynni Adnewyddadwy i oleuo a darparu tystiolaeth ar gyfer y polisi hwn ac er mwyn nodi'r potensial ar gyfer cynhyrchu ynni adnewyddadwy yn yr ardal. Mae dull yr Asesiad Ynni Adnewyddadwy wedi dilyn yr hyn a nodir gan Lywodraeth Cymru, a bydd yn helpu i gyrraedd y targedau a nodir yn PCC10. Mae'r Asesiad Ynni Adnewyddadwy yn cynnwys asesiad strategol lefel uchel o'r potensial ar gyfer cynhyrchu ynni adnewyddadwy a charbon isel ar wahanol raddfeydd mewn gwahanol leoliadau.

11.478 Mae tablau 9 a 10 yn manylu ar y cyfraniadau ynni adnewyddadwy realistig y gellid eu gwneud tuag at fodloni cyfran o gyfanswm y galw am ynni o fewn yr Awdurdod.

Technoleg Ynni	Ffactor Capasiti Tybiedig	Potensial Mwyaf* 20033		Presennol		Targed Ychwanegol** 2033		Cyfanswm y Capasiti Gosodedig 2033 (MW)	Cyfanswm yr Ynni a Gynhyrchir 2033 (MWh)
		Capasiti Trydanol (MWe)	Ynni a Gynhyrchir (MWh)	Capasiti Gosodedig (MW)	Ynni a Gynhyrchir (MWh)	Capasiti Gosodedig (MW)	Ynni a Gynhyrchir (MWh)
Ynni Gwynt (presennol yn cynnwys Ardaloedd Chwilio Strategol)	0.27	164.1	388,129	164.1	388,129	0	0	164.1	388,129
Cnwd Ynni Bio-màs (Gwres a Phŵer Cyfunedig)	0.9	18.4	144,857	0	0	0	0	0	0
Ynni o Wastraff gyda Gwres a Phŵer Cyfunedig	0.9	0.7	5,751	0	0	0	0	0	0
Ynni dŵr	0.37	6.7	21,860	6.6	21,304	0.1	417	6.7	21,721
Nwy Tirlenwi	0.6	2.3	11,826	2.3	11,826	0	0	2.3	11,826
Ffermydd Solar Ffotofoltäig	0.1	283.2	248,097	126.5	110,851	60	52,560	186.5	163,411
Arall gan gynnwys gwastraff bwyd, slyri anifeiliaid, gwasarn dofednod, slwtsh carthion, a nwy carthion (Treulio Anaerobig gyda Gwres a Phŵer Cyfunedig)	0.42	3.3	12,046	1.0	3,679	1.3	4,857	2.3	8,536
Adeilad Integredig	0.1	52.7	46,133	29.4	25,792	4.6	4,068	34.1	29,860
Cyfanswm	-	531	878,700	330	561,534	66	61,902	396	623,483
Galw am ynni trydanol 2008					923,148	Galw rhagamcanol am ynni trydanol			917,389
Canran y galw am drydan a atebir gan adnodd ynni adnewyddadwy					61%				68%
* Dyma'r adnodd mwyaf, mae'n cynnwys capasiti presennol a 100% o'r potensial. ** Targedau wedi'u seilio ar ganran y potensial mwyaf namyn yr hyn sy'n cael ei gynhyrchu ar hyn o bryd.

Tabl 9: Crynodeb o'r Adnoddau ar gyfer Trydan Adnewyddadwy

Technoleg Ynni	Ffactor Capasiti Tybiedig	Potensial Mwyaf * 2033		Presennol		Targed Ychwanegol ** 2033		Cyfanswm y Capasiti Gosodedig	Cyfanswm yr Ynni a Gynhyrchir
		Capasiti Gwres (MWt)	Ynni a Gynhyrchir (MWh)	Capasiti Gosodedig (MWt)	Ynni a Gynhyrchir (MWh)	Capasiti Gosodedig (MWt)	Ynni a Gynhyrchir (MWh)	2033 (MW)	2033 (MWh)
Bio-màs Presennol	0.5	36.7	160,953	0	0	0	0	0	0
Boeleri Bio-màs, Pren	0.5	36.3	159,197	0	0	0	0	0	0
Ynni o Wastraff gyda Gwres a Phŵer Cyfunedig	0.5	1.5	6,390	0	0	0	0	0	0
Arall gan gynnwys slyri anifeiliaid, gwasarn dofednod, slwtsh carthion a nwy carthion (Treulio Anaerobig gyda Gwres a Phŵer Cyfunedig)	0.5	3.7	15,990	0.2	986	2.0	8,736	2.2	9,722
Nwy Tirlenwi (gyda Gwres a Phŵer Cyfunedig)	0.5	0	0	0	0	0	0	0	0
Adeilad Integredig	0.2	89.9	157,440	35.0	61,292	11.0	19,230	46.0	80,522
Cyfanswm				35.2	62,278	13.0	27,966	48.2	90,244
Galw am ynni gwres 2008					2,130,266	Galw rhagamcanol am ynni trydanol			1,493,795
Canran y galw thermol a atebir gan adnodd ynni adnewyddadwy					3%				6%
* Dyma'r adnodd mwyaf, mae'n cynnwys capasiti presennol a 100% o'r potensial. ** Targedau wedi'u seilio ar ganran y potensial mwyaf namyn yr hyn sy'n cael ei gynhyrchu ar hyn o bryd.

Tabl 10: Crynodeb o'r Adnoddau ar gyfer Gwres Adnewyddadwy

Ardaloedd Chwilio Strategol

11.479 TAN 8: Cynllunio ar gyfer Ynni Adnewyddadwy yn diffinio Ardaloedd Chwilio Strategol ac ystyrir mai'r ardaloedd hyn yw'r lleoliadau mwyaf priodol ar gyfer datblygu ffermydd gwynt ar raddfa fawr. Mae gan Sir Gaerfyrddin ddwy Ardal Chwilio Strategol, Ardal G: Coedwig Brechfa ac Ardal E: Pontardawe. Derbynnir yr egwyddor o ddatblygiadau tyrbinau gwynt ar raddfa fawr a newid cysylltiedig yn y dirwedd o fewn Ardaloedd Chwilio Strategol.

11.480 Gellir disgrifio Coedwig Brechfa fel ardal helaeth o goedwigoedd di-dor, sy'n amrywio o blanhigfeydd coniffer ar draws llwyfandiroedd ucheldirol i goetiroedd llydanddail hynafol mewn dyffrynnoedd serth, cul. Mae'r goedwig yn goedwig weithiol ac yn safle poblogaidd ar gyfer hamdden awyr agored. Mae dwy fferm wynt yn weithredol o fewn y goedwig ar hyn o bryd, sef Alltwalis a Gorllewin Brechfa. Dylid cyfeirio ffermydd gwynt pellach ar raddfa fawr i'r Ardal Chwilio Strategol hon, a chânt eu cefnogi ar yr amod eu bod yn cyd-fynd â meini prawf iv – vii.

11.481 Mae Ardal E: Pontardawe wedi'i lleoli i raddau helaeth o fewn ffiniau gweinyddol Castell-nedd Port Talbot ac Abertawe. Mae fferm wynt Mynydd y Betws, sydd wedi'i lleoli o fewn Sir Gaerfyrddin bellach yn gweithredu o fewn rhan o Ardal E: Pontardawe.

Ardaloedd Chwilio Lleol

11.482 Mae'r Asesiad Ynni Adnewyddadwy wedi asesu'r potensial i'r Awdurdod ddarparu ynni adnewyddadwy, ac mae wedi dod i'r casgliad y gallai cynhyrchu trydan ar raddfa fwy o ynni solar ac ynni'r gwynt fod yn ddichonadwy mewn rhannau o'r awdurdod. Nodir yr ardaloedd hyn yn yr Asesiad Ynni Adnewyddadwy, ac fe'u hanodir ar y Map Cynigion fel Ardaloedd Chwilio Lleol. Mae Ardaloedd Chwilio Lleol yn cael eu nodi trwy gymhwyso cyfres o dybiaethau a thrwy gynnal ymarfer mapio a ddefnyddiodd haenau o gyfyngiadau. Ystyrir mai'r ardaloedd hyn yw'r ardaloedd â'r cyfyngiadau lleiaf ar allu o fewn yr Awdurdod er mwyn darparu ynni.

11.483 Mae pedair Ardal Chwilio Leol Solar Ffotofoltäig wedi eu clustnodi fel rhai addas ar gyfer cynlluniau rhwng 5MW a 50MW. Clustnodir Ardaloedd Chwilio Lleol er mwyn annog datblygwyr i ymchwilio ymhellach i'r potensial i gael ffermydd solar yn yr ardaloedd hyn. Bydd angen asesiadau safle-benodol pellach i gynorthwyo unrhyw gais cynllunio ar gyfer datblygiadau o'r fath.

LSA S1

LSA S2

LSA S3

LSA S4

11.483 Ni fydd tir o fewn Ardaloedd Chwilio Lleol yn cael ei ddiogelu ar gyfer cynhyrchu ynni; fodd bynnag, rhoddir blaenoriaeth i ddatblygiadau o'r fath lle ceir buddiannau sy'n cystadlu ar yr un pryd.

Technolegau Eraill

11.484 Er bod yr Asesiad Ynni Adnewyddadwy yn cydnabod mai technolegau gwynt a solar sydd â'r potensial mwyaf i gyflenwi ynni adnewyddadwy o fewn y Sir, bydd cynigion ar gyfer technolegau ynni adnewyddadwy eraill, gan gynnwys biomas, ynni o wastraff, pŵer trydan dŵr a nwy tirlenwi hefyd yn cael eu hystyried yn ffafriol, yn amodol ar fodloni darpariaethau'r polisi hwn.

Ystyriaethau Lleoliadol

11.485 Wrth asesu effaith gronnol cynigion, bydd unrhyw niwed annerbyniol i'r dirwedd, effaith weledol, sŵn, ecoleg a dŵr wyneb a dŵr daear hefyd yn cael ei ystyried yn erbyn datblygiadau ynni adnewyddadwy a charbon isel eraill.

11.486 Dylid ystyried amwynder preswylwyr a meddianwyr eiddo cyfagos, a dylid lleihau unrhyw niwsans posibl sy'n deillio o'r datblygiad a'i seilwaith cysylltiedig i'r eithaf. Ni chaniateir cynigion a fyddai'n arwain at niwsans annerbyniol o ganlyniad i weithredu datblygiad o'r fath, megis sŵn, risg i ddiogelwch, ymyrryd â signalau radio, telathrebu neu awyrennau, cysgodion symudol o dyrbinau gwynt a phelydrau a golau tanbaid o baneli solar.

11.487 Bydd angen i gynigion sicrhau nad ydynt yn achosi problemau o ran diogelwch ar y priffyrdd nac yn cael effaith niweidiol ar y rhwydwaith priffyrdd o ganlyniad i draffig adeiladu a chynnal a chadw. Wrth leoli datblygiad, dylid diogelu llwybrau ceffylau a llwybrau troed presennol heb unrhyw golled barhaol i'w hyd a'u hansawdd. Bydd angen dargyfeirio hawliau tramwy cyhoeddus dros dro ac yn briodol yn ystod y cyfnod adeiladu. Rhoddir anogaeth i wella cyfleusterau hamdden presennol a darparu rhai newydd.

11.488 Bydd Canllawiau Cynllunio Atodol yn cael eu cynhyrchu i ymhelaethu ar ddarpariaethau'r polisi hwn.

11.489 Mae polisi cenedlaethol ar ffurf Polisi Cynllunio Cymru'n gosod agenda sy'n ceisio symud tuag at newid i ddulliau trafnidiaeth ar y ffyrdd sy'n cynhyrchu allyriadau isel neu ddim allyriadau. Yn hyn o beth, mae'n cydnabod rôl pwyntiau gwefru trydanol o ran cyflawni'r newid hwnnw^[[1]].

11.490 Wrth arddel y farn hon mae'n argymell mabwysiadu ymagwedd gynaliadwy sy'n cydbwyso anghenion byrdymor yn erbyn amcanion hirdymor mewn perthynas ag ystyriaethau megis lleihau amlygiad y cyhoedd i lygredd yn yr awyr, llygredd sŵn ac ati fel rhan o'r gwaith o baratoi cynlluniau datblygu.

11.491 Fel a adlewyrchir yn ffigur 12 isod, mae polisi Llywodraeth Cymru yn nodi hierarchaeth trafnidiaeth gynaliadwy mewn perthynas â datblygiadau newydd. Mae'r hierarchaeth hon yn cydnabod rôl Cerbydau ag Allyriadau Isel Iawn o ran datgarboneiddio trafnidiaeth, yn enwedig mewn ardaloedd gwledig^[[2]].

Ffigur 12: Yr Hierarchaeth Trafnidiaeth Gynaliadwy ar gyfer Cynllunio

11.492 Mae'r CDLl hwn yn cydnabod amrywiaeth cymunedau ledled Sir Gaerfyrddin gan nodi'n arbennig y nodweddion gwledig yn bennaf sy'n nodweddu llawer o'i hardal. Fel a adlewyrchir ym Mholisi Cynllunio Cymru, mae ardaloedd o'r fath yn aml yn galw am wahanol ymagweddau lle mae trafnidiaeth gynaliadwy yn y cwestiwn ac mae angen i ddatblygiadau newydd adlewyrchu amgylchiadau lleol. Er enghraifft, wrth ddatblygu strategaeth y CDLl, rhoddwyd ystyriaeth i'r potensial ar gyfer twf mewn ardaloedd gwledig ac mae'r broses o nodi safleoedd wedi rhoi sylw i'r hierarchaeth, gan gynnwys mesurau i annog y defnydd o Gerbydau ag Allyriadau Isel Iawn. Yn hyn o beth, mae'r polisi uchod yn rhoi ffocws clir ar fynediad i gerbydau o'r fath fel amcan polisi cadarnhaol ar gyfer datblygiadau ledled yr awdurdod, gan gynnwys mewn cymunedau gwledig.

11.493 Mae'r Cynllun yn cydnabod effeithiau'r newid yn yr hinsawdd a'r newid i ddatgarboneiddio gyda'r angen i hybu mynediad at ddulliau trafnidiaeth amgen yn unol â darpariaethau polisi cenedlaethol. Mae 35% o drigolion Sir Gaerfyrddin yn byw mewn ardaloedd gwledig gyda 65% o'r arwynebedd tir wedi'i ddynodi'n wledig. Mae natur wledig llawer o Sir Gaerfyrddin felly wedi bod yn ystyriaeth allweddol wrth ddatblygu'r strategaeth a dosbarthiad y twf.

11.494 Mae natur wledig yn her arbennig ar gyfer trafnidiaeth gyhoeddus, gyda'r poblogaethau gwasgaredig yn y rhan fwyaf o ardaloedd a chymunedau gwledig, yn cael eu gwasanaethu gan wasanaeth amlder isel.

11.495 Er y cydnabyddir y gall hyrwyddo trafnidiaeth gynaliadwy ac yn wir datgarboneiddio trafnidiaeth yn y pen draw gael ei gyflawni mewn llawer o ardaloedd trefol rhaid iddo beidio â datgymalu'r cysylltiadau rhwng cymunedau trefol a gwledig ymhellach^[[3]]. Mewn perthynas â'n cymunedau o fewn ardaloedd gwledig mae'r Cynllun yn ceisio cyflawni datblygu cynaliadwy mewn ffordd sy'n cyfeirio at ddulliau trafnidiaeth newydd ac amgen ac yn eu hintegreiddio gan gynnwys hyrwyddo cerbydau ag allyriadau isel iawn. Lle mae gan gartref fan parcio wedi'i neilltuo ar ffurf garej neu ddreif/man parcio, fel gofyniad lleiaf dylid darparu soced 16 Amp naill ai mewn garej neu'n agos at fan parcio penodol wedi'i neilltuo ar gyfer ceir. Os nad oes garej, dylid darparu soced allanol ar y wal.

11.496 Dylai cynigion ar gyfer datblygiadau dibreswyl a masnachol gynnwys, fel y gofyniad lleiaf, bwyntiau gwefru ar gyfer 10% o'r mannau parcio ceir. Wrth weithredu'r gofyniad hwn, rhoddir sylw i ddarpariaethau PCC, Rhifyn 10: Paragraff 4.1.39. Nodyn: soced 32 Amp. Mae unedau gwefru annibynnol masnachol yn darparu 2 wefrydd.

11.497 Mae dŵr fel adnodd yn hynod werthfawr ac mae materion fel llygryddion, atal llifogydd, dŵr daear a diogelu a gwella ecosystemau dyfrol i gyd yn ystyriaethau pwysig a adlewyrchir gan ddeddfwriaeth a chanllawiau. Mae'r Gyfarwyddeb Fframwaith Dŵr (2000/60/EC) yn nodi'r gofynion mewn perthynas â'r amgylchedd dŵr a dylid rhoi ystyriaeth lawn i'w chynnwys.

11.498 Gall llygredd dŵr ac ansawdd dŵr gwael o ganlyniad i hyn fod o un ffynhonnell, neu o ffynonellau gwasgaredig, megis o ddŵr ffo amaethyddol a threfol. Mae'r Gyfarwyddeb Fframwaith Dŵr wedi rhoi'r cyfle i weithio gyda sefydliadau partner, yn enwedig Cyfoeth Naturiol Cymru, i gydnabod yr angen i wella'r amgylchedd dŵr cyfan a hybu defnydd cynaliadwy o ddŵr er budd pobl a byd natur. Paratowyd Cynlluniau Rheoli Basn Afon sy'n nodi amcanion a safonau amgylcheddol, a rhaglen o fesurau ar gyfer eu cyflawni.

11.499 Mae Dwr Cymru Welsh Water (DCWW) yn gyfrifol am gyflenwi a thrin dŵr o fewn y Sir. Mae DCWW yn parhau i ateb galw cynyddol am wasanaethau carthffosiaeth trwy fecanweithiau deddfwriaethol a rheoleiddiol, a buddsoddi yn y cyflenwad/galw fel a nodir o fewn y Rhaglen Rheoli Asedau. Bydd y buddsoddiad trwy'r Rhaglen Rheoli Asedau yn cefnogi twf ac adfywio yn y dyfodol.

11.500 Mewn perthynas â Safle Morol Ewropeaidd Bae ac Aberoedd Caerfyrddin (SMEBAM), dylid cyfeirio at Bolisi INF4. Paratowyd CCA Cilfach Tywyn i ymhelaethu ar y Cynllun hwn. Mae'n ceisio cydbwyso ystyriaethau amgylcheddol a datblygiadol gyda'r bwriad o hwyluso'r gwaith o gyflawni twf o fewn y CDLl diwygiedig hyd at 2033.

11.501 Mae'r gydnabyddiaeth bod ystyriaethau amgylcheddol yn gysylltiedig â thwf yn un gysyniadau allweddol datblygu cynaliadwy. O gofio bod yr Awdurdod eisoes wedi ystyried effaith dyraniadau ac ymrwymiadau'r Cynllun a bod y gallu i gyflawni wedi'i gadarnhau, mae 'r Polisi hwn yn syml yn fodd i archwilio materion ar lefel prosiectau neu geisiadau fesul safle, fel a lle y bo'n briodol. Mae'r Polisi hwn yn ceisio rhoi modd i'r Awdurdod ystyried rhinweddau'r cynigion a gyflwynir o fewn cyfnod y cynllun nad ydynt wedi'u nodi yn y Cynllun ar hyn o bryd.

11.502 Gellir gwella ansawdd dŵr trwy nifer o fesurau gan gynnwys dylunio, adeiladu a gweithredu systemau carthffosiaeth yn effeithiol, defnyddio gwlypdiroedd neu fannau gwyrdd ar gyfer lliniaru llifogydd, a defnyddio Systemau Draenio Cynaliadwy. Byddai hyrwyddo arferion da amaethyddol hefyd yn cyfrannu at welliannau mewn ansawdd. Lle bo hynny'n briodol ac yn gymwys i'r system gynllunio, mae'r Cynllun hwn yn nodi mesurau y gellir eu gweithredu.

11.503 Dylai cynigion geisio ymgorffori technegau arbed dŵr, lle bynnag y bo'n bosibl, gan gynnwys cynaeafu dŵr glaw ac ailgylchu dŵr llwyd.

11.504 Mae'r gofynion adnoddau dŵr ar gyfer Sir Gaerfyrddin yn cael eu cyflenwi'n gyfan gwbl gan DCWW, ac mae'r Sir yn gorwedd o fewn system defnydd cysylltiadol Tywi (Parth Adnoddau Dŵr Tywi). Mae'r Cynllun Rheoli Adnoddau diweddaraf gan DCWW yn darogan y bydd gan Barth Adnoddau Dŵr Tywi warged trwy gydol cyfnod y CDLl, yn seiliedig ar y cynnydd a ragwelir yn niferoedd yr aelwydydd yn Sir Gaerfyrddin o 14.6% rhwng 2014 a 2039, gyda chynnydd o 82,751 i 89,532 rhwng 2018 a 2033. Mae'r rhagolwg twf cyffredinol hwn yn fwy na'r twf y darperir ar ei gyfer yn y CDLl.

11.505 Bydd angen mynd ati'n barhaus i fonitro materion sy'n ymwneud ag echdynnu a chyflenwad dŵr, er mwyn sicrhau bod y twf a nodir yn y CDLl hwn yn gymesur ag argaeledd yr adnodd, y tu hwnt i'r mesurau diogelu a ddarperir trwy'r polisi hwn.

11.506 Bydd y Cyngor yn parhau i weithio gydag ac ymgynghori â Cyfoeth Naturiol Cymru a DCWW ar gynigion datblygu fel y bo'n briodol. Bydd y Cyngor hefyd yn ymgynghori â Cyfoeth Naturiol Cymru ar gynigion datblygu yng nghyffiniau coridorau afonydd ac aberoedd. Dylai darpar ddatblygwyr ofyn am gyngor a chydsyniad Cyfoeth Naturiol Cymru pan fo hynny'n briodol. Os yw cynigion yn ymwneud â phrif afon neu gwrs dŵr cyffredin, dylid ymgorffori'r gofyniad am ddull clustogi priodol sy'n ffinio â'r ddwy lan mewn unrhyw gynigion i ddiogelu ac annog bioamrywiaeth leol.

11.507 Fel bob amser, dylai cynigion fodloni polisïau a darpariaethau'r Cynllun yn ei gyfanrwydd. Fodd bynnag, gellir cyfeirio'n benodol at Bolisi Strategol 13 – Cynnal a Gwella'r Amgylchedd Naturiol, yn fwyaf nodedig mewn perthynas â safleoedd o bwysigrwydd rhyngwladol ar gyfer cadwraeth natur. Mae cyfleoedd penodol i gydnabod a chofleidio seilwaith gwyrdd fel rhan o ddull creu lleoedd.

11.508 Mae'r mwyafrif o aneddiadau yn Sir Gaerfyrddin wedi eu lleoli ger afonydd neu'r arfordir. Mae hyn yn adlewyrchu'r patrwm datblygu hanesyddol ac er na all y cynllun ddylanwadu ar batrymau gofodol y gorffennol, gall helpu i lywio'r penderfyniadau gyda llesiant cenedlaethau'r dyfodol mewn golwg.

11.509 Er bod dealltwriaeth am lifogydd afonol a llanwol a chydnabyddiaeth iddynt wedi bod yn ymhlyg mewn arfer cynllunio ers blynyddoedd lawer, ceir ymwybyddiaeth gynyddol bellach o ffynonellau llifogydd eraill – yn enwedig dŵr wyneb. Gall y ffynonellau eraill hyn effeithio ar aneddiadau nad ydynt yn agos at afon neu'r arfordir.

11.510 Mae'r polisi, a chyfeiriad strategol y Cynllun, yn cydnabod ac yn adlewyrchu'r angen am ddull cynaliadwy o ymdrin â pherygl llifogydd. Gan hynny, mae'r Cynllun hwn yn blaenoriaethu diogelu'r gorlifdir annatblygedig neu ddirwystr rhag datblygu ac yn ceisio atal effeithiau cronnol datblygiad cynyddrannol^[43]. Fodd bynnag, mae hefyd yn ceisio cydnabod bod dynameg perygl llifogydd yn gymhleth ac yn ymestyn y tu hwnt i'r goblygiadau ar y safle o ran lleoli datblygiad unigol.

11.511 Mae'r Cynllun yn rhoi sylw i ddarpariaethau polisi cynllunio cenedlaethol ar berygl llifogydd a defnyddiwyd dull rhagofalus wrth lunio polisïau sy'n nodi dynodiadau defnydd tir a chynigion safle benodol. Mae'r Cynllun hefyd yn ceisio cydnabod natur ddynamig perygl llifogydd ond hefyd eu cyfraniad hanfodol i nodweddion amgylcheddol, bioamrywiaeth, rhwydwaith seilwaith gwyrdd, a gwerth tirwedd cynhenid y Sir.

11.512 Cydnabyddir cyfraniad prosesau sianeli naturiol ac mae'r polisi'n rhoi anogaeth i ailgysylltu gorlifdiroedd. O ganlyniad, dylid cynllunio datblygiadau, yn arbennig seilwaith newydd, mewn ffordd nad yw'n arwain at golled net yng ngallu storio gorlifdiroedd, yn rhwystro llifoedd dŵr nac yn cynyddu perygl llifogydd mewn mannau eraill^[44]. Dylid rhoi sylw i Weithio gyda Photensial Ail-gysylltu Gorlifdiroedd Prosesau Naturiol (WWNP)^[45].

11.513 Nodir polisi cenedlaethol mewn perthynas â pherygl llifogydd yn Nodyn Cyngor Technegol 15: Datblygu a Pherygl Llifogydd (2004). Nodir yr ardaloedd lle ceir perygl llifogydd afonol a llanwol ar y Mapiau Cyngor Datblygu sy'n cyd-fynd â'r nodyn. Caiff yr ardaloedd hyn eu categoreiddio'n 4 parth, sef Parth A, Parth B, ac yn fwyaf nodedig Parthau C1 ac C2 sy'n fwy tueddol o brofi llifogydd.

11.514 Bydd datblygiadau mewn ardaloedd lle ceir perygl mawr o lifogydd yn cael eu hystyried dim ond lle gellir dangos y gall y safle gydymffurfio â'r gofynion cyfiawnhau ac asesu a nodir yn TAN 15. Dim ond datblygiadau sydd dan lai o fygythiad fydd yn cael eu caniatáu o fewn Parth C2. Lle cynigir datblygiad mewn ardal o berygl llifogydd dynodedig, rhaid cyflwyno datganiad technegol i gyd-fynd ag ef er mwyn bodloni darpariaethau TAN15 a dangos yn glir y bydd y datblygiad newydd yn lliniaru bygythiad a chanlyniadau llifogydd.

11.515 Mae'r polisi hwn yn ceisio rhoi anogaeth i ymgorffori ynni adnewyddadwy a charbon isel ym mhob datblygiad newydd.

11.516 Bydd Asesiad Ynni yn ymchwilio i'r potensial i ymgorffori a defnyddio technoleg carbon isel, neu i ddefnyddio ffynonellau presennol ynni adnewyddadwy neu rwydweithiau gwresogi ardal. Bydd yn ofynnol bod asesiadau'n dangos sut y gall y datblygiad wneud cyfraniad tuag at lefelau uwch o gynhyrchu ynni o ffynonellau adnewyddadwy neu garbon isel.

11.517 Bydd arweiniad pellach yn cael ei ddarparu yn y Canllawiau Cynllunio Atodol Ynni Adnewyddadwy a Charbon Isel.

11.518 Mae Llywodraeth Cymru wedi nodi targed i gynyddu'r gorchudd coetir yng Nghymru o leiaf 2,000 hectar y flwyddyn o 2020. Mae'r polisi hwn yn ceisio adlewyrchu'r amcan cenedlaethol hwn a'r ymrwymiad i greu coedwig genedlaethol. Ceir cyfleoedd i greu cysylltiadau â seilwaith gwyrdd, ymgorffori cyfleusterau teithio llesol a gwella cyfleoedd twristiaeth a hamdden, yn ogystal â hybu gwell bioamrywiaeth, cysylltedd a chydnerthedd ecosystemau.

11.519 Mae coed, coedwigoedd a choetiroedd yn darparu amrywiaeth o wasanaethau ecosystemau, megis gwella ansawdd aer, darparu effaith oeri a chysgod yn yr haf, lleihau sŵn, dal a storio carbon a chynyddu cydnerthedd yn wyneb yl newid yn yr hinsawdd. Mae coed, coedwigoedd a choetiroedd hefyd yn cynnig gwerth esthetig ac amwynder, a gallant weithredu fel nodweddion ar y dirwedd yn ein haneddiadau a chefn gwlad agored. Maent yn cyfrannu at gadwraeth natur ac yn cynyddu bioamrywiaeth, ac yn aml mae iddynt werth hanesyddol a hamdden. Maent hefyd yn helpu i greu ymdeimlad o 'lesiant'.

11.520 Gall plannu coed, coetiroedd a choedwigoedd fod o gymorth i fynd i'r afael â materion sy'n ymwneud â pherygl llifogydd, gan roi ateb peirianegol meddal y gellir ei gyflawni ar wahân neu ar y cyd â seilwaith caled (strwythurau o waith dyn).

11.521 Mae coed yn cael eu cydnabod fel ffactor sy'n lleihau perygl llifogydd o'r brig i'r gwaelod. Mae'r dail yn lleihau llifogydd mewn dwy ffordd: anweddu; ac, arafu cyfradd llif y dŵr i mewn i afonydd. Ar yr un pryd mae'r gwreiddiau'n helpu i ddraenio dŵr gan leihau'r swm sy'n cyrraedd yr afon, gan hefyd ddal pridd yn ei le sy'n lleihau'r pridd sy'n cyrraedd yr afon gan effeithio ar ei llif. Bydd disgwyl i gynigion ddangos sut y byddant yn cyfrannu at liniaru perygl llifogydd.

11.522 Mae'r Cynllun yn cefnogi plannu math, graddfa, dyluniad, cyfansoddiad oedran a chymysgedd rhywogaethau sy'n briodol i'r ardal leol. Bydd yn ofynnol i gynigion ystyried yr effaith ar dirwedd neu werth cadwraeth natur ardal neu ei threftadaeth hanesyddol adeiledig. Os bydd effaith yn niweidiol, ni fydd y cynnig yn cael ei gefnogi.