Strategaeth a Ffefrir

7. Gweledigaeth ar gyfer 'Un Sir Gâr'

7.1 Mae angen tanategu'r Cynllun Datblygu Lleol diwygiedig gyda gweledigaeth a strategaeth gryno a hirdymor. Er mwyn cyflawni hyn, mae gweledigaeth glir wedi'i datblygu sydd wedi'i hadeiladu ar sail consensws. Mae gweledigaeth y Strategaeth a Ffefrir Ddrafft hon yn nodi sut y bwriedir datblygu, newid neu warchod y sir hyd at 2033.^[16]

7.2 Mae gweledigaeth y Cynllun Datblygu Lleol diwygiedig yn ymgorffori'n uniongyrchol y weledigaeth a nodir yn Strategaeth Gorfforaethol y cyngor "Symud Ymlaen yn Sir Gaerfyrddin: y 5 mlynedd nesaf 2018–2023".^[17] Er nad oes gweledigaeth yng Nghynllun Llesiant Sir Gâr y gellir ei defnyddio'n uniongyrchol, mae gweledigaeth y Cynllun Datblygu Lleol diwygiedig yn adlewyrchu'i bedwar amcan llesiant, sef (1) Arferion Iach (2) Ymyrraeth Gynnar (3) Cysylltiadau Cadarn a (4) Pobl a Llefydd Llewyrchus.

7.3 Mae testun ategol Amcan Llesiant 4 wedi'i ymgorffori yng ngweledigaeth y Cynllun Datblygu Lleol diwygiedig oherwydd pwyslais yr amcan hwn ar "fwyhau cyfleoedd ar gyfer pobl a llefydd yn rhannau trefol a gwledig ein sir". Mae hyn yn ymateb i'r pwyslais cryf ar gydnabod ardaloedd gwledig o fewn y sgyrsiau a geir ynghylch nodi materion. Mae gweledigaeth y Cynllun Datblygu Lleol diwygiedig yn cydnabod ac yn dathlu'r ffaith fod ein sir yn gyferbyniol a'i bod yn ysbrydoli ymdeimlad o le.

7.4 Mae ymagwedd "Un Sir Gâr" yn cydnabod yr angen dros gloriannu gofynion a buddiannau sy'n gwrthgyferbynnu ac yn darparu llwyfan ar gyfer consensws a rhannu perchnogaeth y Cynllun Datblygu Lleol diwygiedig. Mae gweledigaeth y Cynllun Datblygu Lleol diwygiedig hefyd yn cydnabod Bargen Ddinesig Bae Abertawe, gan osod y cywair cadarnhaol a digon uchelgeisiol ar gyfer y Strategaeth a Ffefrir Ddrafft hon.